पुणे विभागात अन्न व औषध प्रशासनाची मोठी कारवाई; तब्बल 16 आस्थापनांचे परवाने निलंबित
पुणे : अन्न व औषध प्रशासनाने राज्यभर सुरू केलेल्या ‘सेफ फूड, सेफ ड्रग, सेफ महाराष्ट्र’ मोहिमेअंतर्गत पुणे विभागात चार दिवसांच्या विशेष तपासणी मोहिमेत मोठी कारवाई केली आहे. ११ ते १४ ऑगस्टदरम्यान हॉटेल, रेस्टॉरंट, ई-कॉमर्स वितरण केंद्रे आणि डेअरी आस्थापनांची तपासणी करण्यात आली. स्वच्छतेचे निकष न पाळणे, अन्न सुरक्षा व मानके कायद्याच्या तरतुदींचे उल्लंघन आणि आवश्यक परवाना नसल्याचे आढळल्याने १६ आस्थापनांचे परवाने व नोंदणी तात्काळ निलंबित करण्यात आले आहेत.
सहआयुक्त (अन्न) डी. वा. भोगावडे यांनी दिलेल्या माहितीनुसार, पुणे जिल्ह्यातील हॉटेल सयाजी (लोणावळा), हॉटेल चुल मटण (लोहेगाव), सिम्पली साऊथ (भोसरी) आणि जेबीएम हॉस्पिटॅलिटी कॅन्टीन (वानवडी) यांच्यावर कारवाई करण्यात आली आहे. तसेच परवान्याविना व्यवसाय सुरू असल्याने कॅम्पमधील बर्गर किंग शाखेला तातडीने व्यवसाय बंद करण्याचे निर्देश देण्यात आले. याशिवाय कराड, कोल्हापूर व सांगली येथील हॉटेल, डॉमिनोज आणि पिझ्झा हटच्या शाखांचाही कारवाईत समावेश आहे.
ई-कॉमर्स क्षेत्रातील झेप्टो (लोहेगाव), ब्लिंक कॉमर्स (नऱ्हे व भवानी पेठ) आणि स्विन्स्टा ईएनटी प्रा. लि. (वारजे) या वितरण केंद्रांवरही अन्न सुरक्षा नियमांचे उल्लंघन आढळल्याने निलंबनाची कारवाई करण्यात आली आहे. डेअरी विभागात ओम साईराम मिल्क अँड मिल्क प्रॉडक्ट्स (खेड), धर्मनाथ दूध शीतकरण केंद्र (आंबेगाव) आणि आर. के. मिल्क (सातारा) यांचे परवाने निलंबित करण्यात आले आहेत.
अन्न सुरक्षा आयुक्त तुकाराम मुंढे यांच्या निर्देशानुसार ही मोहीम सुरू असून, स्वच्छतेच्या निकषांचे पालन न करणाऱ्या आस्थापनांवर पुढेही कठोर कारवाई सुरू राहणार असल्याचे प्रशासनाने स्पष्ट केले आहे. नागरिकांनी अन्नाच्या दर्जा, स्वच्छता किंवा भेसळीबाबत तक्रार असल्यास १८००-२२-२३६५ या टोल-फ्री क्रमांकावर संपर्क साधण्याचे आवाहन करण्यात आले आहे.
सोमवारपासून शाळांजवळ जंक फूडविरोधी मोहीम
अन्न व औषध प्रशासन सोमवारपासून शाळांच्या ५० मीटर परिसरात उच्च चरबी, साखर व मीठ असलेल्या पदार्थांची विक्री करणाऱ्या आस्थापनांविरोधात विशेष मोहीम राबविणार आहे. या प्रतिबंधित क्षेत्रात जंक फूडची विक्री आढळल्यास संबंधितांवर अन्न सुरक्षा व मानके कायद्यानुसार दंडात्मक कारवाई केली जाणार आहे.
.png "Videos"){kind=small}
