गणेशोत्सवात गुंडगिरीला लगाम, तब्बल 2573 जणांना पोलिसांचा दणका; 58 सराईत गुन्हेगार तडीपार

गणेशोत्सवाच्या पार्श्वभूमीवर पिंपरी चिंचवड शहरातील कायदा-सुव्यवस्था अबाधित ठेवण्यासाठी पिंपरी-चिंचवड पोलिसांनी सराईत गुन्हेगार आणि समाजकंटकांविरोधात कारवाईचा धडाका सुरू केला आहे.

पिंपरी : गणेशोत्सवाच्या पार्श्वभूमीवर पिंपरी चिंचवड शहरातील कायदा-सुव्यवस्था अबाधित ठेवण्यासाठी पिंपरी-चिंचवड पोलिसांनी सराईत गुन्हेगार आणि समाजकंटकांविरोधात कारवाईचा धडाका सुरू केला आहे. २२ ऑगस्ट ते १० सप्टेंबर या कालावधीत राबविण्यात आलेल्या विशेष मोहिमेत तब्बल २ हजार ५७३ जणांवर प्रतिबंधात्मक कारवाई करण्यात आली. यातील ५८ सराईत गुन्हेगारांना तडीपार, तर दोन जणांवर ‘एमपीडीए’अंतर्गत कारवाई करून त्यांची कारागृहात रवानगी करण्यात आली आहे. गणेशोत्सवात गर्दीचा फायदा घेत दहशत निर्माण करणे, हुल्लडबाजी करणे किंवा गुन्हेगारी कारवायांना खतपाणी घालणाऱ्यांना कोणतीही सवलत दिली जाणार नसल्याचा स्पष्ट संदेश या कारवाईतून पोलिसांनी दिला आहे.

परिमंडळ चारमध्ये सर्वाधिक कारवाई

पोलिसांच्या चारही परिमंडळांमध्ये गुन्हेगारी प्रवृत्तीच्या व्यक्तींची माहिती संकलित करून त्यांच्यावर प्रतिबंधात्मक कारवाई करण्यात आली. परिमंडळ एकमध्ये ३६२, परिमंडळ दोनमध्ये २४७, परिमंडळ तीनमध्ये ५७२, तर परिमंडळ चारमध्ये तब्बल १ हजार ३९२ जणांवर कारवाई करण्यात आली आहे. त्यामुळे एकूण कारवाईमध्ये परिमंडळ चारचा वाटा सर्वाधिक राहिला.

५८ गुन्हेगार शहराबाहेर

उत्सवाच्या काळात शांततेला बाधा पोहोचविण्याची शक्यता असलेल्या सराईत गुन्हेगारांवर पोलिसांनी विशेष लक्ष केंद्रित केले. महाराष्ट्र पोलीस कायद्याच्या कलम ५६ अंतर्गत ५०, तर कलम ५५ अंतर्गत आठ जणांना तडीपार करण्यात आले. त्यामुळे ५८ गुन्हेगारांना गणेशोत्सव काळात शहराबाहेर राहावे लागणार आहे.

हे सुद्धा वाचा : प्रवाशांच्या सेवेसाठी एसटीचा ताफा होणार अधिक सक्षम; तब्बल 5 हजार ‘लालपरी’ बसेसची निविदा प्रक्रिया पूर्ण

बंधपत्राच्या कारवाईतून गुन्हेगारीला ‘वेसण’

केवळ तडीपारी किंवा ‘एमपीडीए’पुरती कारवाई मर्यादित न ठेवता पोलिसांनी संभाव्य उपद्रवी व्यक्तींवर बंधपत्राची कारवाईही केली. बीएनएसएस कलम १२६ अंतर्गत ४१४ जणांकडून शांतता राखण्याचे बंधपत्र घेण्यात आले. कलम १२८ अंतर्गत ३२, तर कलम १२९ अंतर्गत २२० जणांवर कारवाई करण्यात आली. याशिवाय बीएनएस कलम १६८ अंतर्गत १ हजार ८०० जणांना कायदेशीर नोटिसा बजावण्यात आल्या. बेकायदा दारूविक्री करणाऱ्या ३५ जणांवर दारूबंदी कायद्याच्या कलम ९३ अंतर्गत कारवाई करण्यात आली.

गणेशोत्सव आनंदात साजरा करा; मात्र कायदा हातात घेऊ नका. दहशत, हुल्लडबाजी आणि गैरप्रकार करणाऱ्यांवर कठोर कायदेशीर कारवाई केली जाईल. सोशल मीडियावर अफवा किंवा भडकावू संदेश प्रसारित करणाऱ्यांवरही पोलिसांची करडी नजर आहे. — विनय कुमार चौबे, पोलीस आयुक्त, पिंपरी-चिंचवड.