पिस्तूल विक्रीचा डाव उधळला, गुन्हे शाखेची मोठी कारवाई; चौघांना ठोकल्या बेड्या

पिस्तूल विक्रीसाठी आलेल्या दोघांना गुन्हे शाखेच्या पथकाने शुक्रवारी दिनांक ७ रोजी दुपारी सापळा रचून पकडले आहे. त्यांच्याकडून देशी बनावटीचे पिस्तूल आणि दोन जिवंत काडतुसे जप्त करण्यात आली आहेत.

छत्रपती संभाजीनगर : पिस्तूल विक्रीसाठी आलेल्या दोघांना गुन्हे शाखेच्या पथकाने शुक्रवारी दिनांक ७ रोजी दुपारी सापळा रचून पकडले आहे. त्यांच्याकडून देशी बनावटीचे पिस्तूल आणि दोन जिवंत काडतुसे जप्त करण्यात आली आहेत. चौकशीत पिस्तूल विक्रीसाठी देणाऱ्या दोघांची नावे समोर आली आहेत. पोलिसांनी त्यांनाही ताब्यात घेतले आहे. चौघांकडून पिस्तूल, काडतुसे, दुचाकी आणि मोबाइल असा १ लाख ८२ हजार रुपयांचा मुद्देमाल जप्त करण्यात आला.

ही कारवाई जटवाडा रोडवरील आनंद क्लिनिकजवळ करण्यात आली आहे. शेख शकील शेख नाजीम (वय १९, रा. सईदा कॉलनी, जटवाडा रोड), सय्यद अल्फाज सय्यद अहमद (वय २१, रा. न्यू आलमगीर कॉलनी, जटवाडा रोड), शेख अबु नासेर शेख रशिद (वय २७, रा. आनंद मेडिकलची गल्ली, सईदा कॉलनी), उमर दुर्राणी जिया दुर्राणी (वय २५, रा. गल्ली नं. १, पिली कॉलनी, चंपाचौक) अशी अटक करण्यात आलेल्या आरोपींची नावे असून त्यांच्याविरोधात बेगमपुरा पोलिस ठाण्यात गुन्हा दाखल करण्यात आला आहे.

जटवाडा रोडवर यांनी केली कारवाई

या प्रकरणात गुन्हे शाखेचे हवालदार योगेश चंद्रशेखर गुप्ता (वय ५२) यांनी फिर्याद दिली आहे. त्यानुसार, गुन्हे शाखेचे पथक शुक्रवारी शहरात पेट्रोलिंग करीत असताना पोलिस उपनिरीक्षक अर्जुन कदम यांना जटवाडा रोडवर दोन तरुण पिस्तूल विक्रीसाठी येणार असल्याची माहिती मिळाली. त्यानुसार ते पथकासह त्यांनी जटवाडा रोड गाठला. दुपारी २.४० वाजता संशयीत दोन तरुण दुचाकीवर दिसताच पोलिसांनी त्यांना घेरले. त्यांची झडती घेतली असता शेख शकील याच्याकडे देशी बनावटीचे पिस्तूल आणि दोन जिवंत काडतुसे आढळली. त्याच्यासोबत असलेल्या सय्यद अल्फाज याच्याकडून दुचाकी आणि मोबाइल जप्त करण्यात आला. पिस्तूल कुणी दिले, याबाबत चौकशी केली असता शकील याने शेख अबु नासेर आणि उमर दुर्राणी यांची नावे सांगितली. त्यानुसार पोलिसांनी दोघांना ताब्यात घेतले. ही कारवाई उपनिरीक्षक अर्जुन कदम, हवालदार साळुंके, काळे, गिते आणि अंमलदार खंडागळे यांच्या पथकाने केली.

गॅलरीत पिस्तूलचे फोटो

दोघांच्या मोबाइलची तपासणी केली असता फोटो गॅलरीमध्ये पिस्तूलचे फोटो आढळून आले. तसेच त्यांच्या मोबाइलमधून इतर आरोपींशी फोनवरून संपर्क असल्याचेही पोलिसांच्या निदर्शनास आले. अबु नासेर आणि उमर यांच्याकडून प्रत्येकी एक मोबाइल जप्त करण्यात आला.

हे सुद्धा वाचा : व्हायरल ऑडिओ क्लिपचं प्रकरण भोवलं, विजय चाैधरींंना अटक; ‘या’ तारखेपर्यंत पोलिस कोठडी

१ लाख ८२ हजारांचा ऐवज हस्तगत

या कारवाईत चौघा आरोपींकडून पिस्तूल व दोन काडतुसांसह दुचाकी आणि चार मोबाइल असा १ लाख ८२ हजार रुपयांचा मुद्देमाल जप्त करण्यात आला. प्रकरणात बेगमपुरा पोलिस ठाण्यात गुन्हा दाखल करण्यात आला आहे. पुढील तपास उपनिरीक्षक मारोती मदेवाड करीत आहेत.