तांब्याचे हांडे चोरणाऱ्या महिलांच्या टोळीला ठोकल्या बेड्या; ‘या’ परिसरात सापळा रचून पकडले

जुन्नर येथील व्यावसायिकाच्या भांड्याच्या गोडाऊनमधून नव्वद तांब्याचे हांडे चोरणाऱ्या महिलांच्या टोळीला स्थानिक गुन्हे शाखेच्या पथकाने अटक केली आहे.

जुन्नर : राज्यासह देशभरात चोरट्यांनी धुमाकूळ घातला असून, दररोज चोरटे नागरिकांच्या लाखो रुपयांवर डल्ला मारत आहेत. वाढत्या चोरीच्या घटनांमुळे नागरिकांमध्ये आणि व्यवसायिकांमध्ये भिती पसरत आहे. अशातच आता एक मोठी चोरीची घटना समोर आली आहे. जुन्नर येथील व्यावसायिकाच्या भांड्याच्या गोडाऊनमधून नव्वद तांब्याचे हांडे चोरणाऱ्या महिलांच्या टोळीला स्थानिक गुन्हे शाखेच्या पथकाने अटक केली आहे. त्यांनी चोरलेल्या ९० हांड्यापैकी सुमारे एक लाख ३७ हजार ५०० रुपये किमतीचे ५५ हांडे त्यांच्या ताब्यातून जप्त करण्यात आले आहेत. चोरीची ही घटना २० मार्च रोजी रात्रीच्या वेळी घडली होती.

 

याबाबत जुन्नर पोलीस स्टेशनला व्यावसायिक आनंद हेमंत सासवडे यांनी फिर्याद दिली होती. महाजन आळी-जुन्नर येथील त्यांच्या भांड्याच्या गोडाऊनमधून तीन महिलांनी ही चोरी केल्याचे सीसीटीव्ही फुटेजमध्ये दिसून येत होते. ह्या गुन्ह्याचा स्थानिक गुन्हे शाखेमार्फत समांतर तपास करत असताना परिसरातील सीसीटीव्ही फुटेजची पाहणी केली असता भांड्याच्या गोडाऊनमधून काही अज्ञात महिला हांडे चोरून नेत असताना दिसून आले. यावरून सदरचा गुन्हा अज्ञात महिलांनी केल्याचे निष्पन्न झाले.

दिपक साबळे व पथकाला मिळालेल्या गोपनीय माहितीनुसार याचा गुन्हा सारिका बबन मकवाने, अंजली सुरज वाघमारे, सुरेखा राजू वालेकर (सर्व रा. पंचलिंग झोपडपट्टी वस्ती जुन्नर) यांनी केल्याचे निष्पन्न झाले. गुन्हे शाखेच्या पथकाने मिळालेल्या गोपनीय माहितीनुसार कुरण फाटा, जुन्नर येथे सापळा लावून सदर महिलांना ताब्यात घेतले. त्यांच्याकडे विचारपूस केली असता त्यांनी गुन्हा कबूल केला. संदीप गिल्ल, रमेश चोपडे, धनंजय पाटील यांच्या मार्गदर्शनाखाली प्रमोद क्षीरसागर, किरण अवचर, महादेव शेलार, दिपक साबळे, राजू मोमीन,संदीप वारे,अक्षय नवले, निलेश सुपेकर, नंदा कदम, सुजाता कदम, सागर हिले यांनी ही कारवाई केली आहे.

हे सुद्धा वाचा : हमीपत्र दिलेल्या विकसकांवर पाणीपुरवठ्याची जबाबदारी, दुर्लक्ष केल्यास…; आयुक्तांचा इशारा

पार्क केलेल्या कारच्या डिक्कीतून रोकड चोरली

कल्याणीनगर परिसरात पार्क केलेल्या कारच्या डिक्कीतून अज्ञात चोरट्यांनी ३० हजारांची रोकड तसेच कागदपत्रे चोरून नेल्याचा प्रकार समोर आला आहे. याप्रकरणी ५५ वर्षीय व्यक्तीने येरवडा पोलिस ठाण्यात तक्रार दिली आहे. त्यानूसार, दोन अज्ञात चोरट्यांविरूद्ध गुन्हा नोद केला आहे. हा प्रकार दोन दिवसांपुर्वी भरदुपारी अडीचच्या सुमारास घडला आहे. पोलिसांच्या माहितीनुसार, तक्रारदार हे कल्याणीनगर भागात राहण्यास आहेत. त्यांनी त्यांची कार लेन नंबर ६ मध्ये पार्क केलेली होती. कारच्या डिक्कीत दोन लेदरच्या बॅग व त्यात ३० हजारांची रोकड होती. तर काही कागदपत्रेही होती. अज्ञात चोरट्यांनी डिक्की कशाच्या तरी सहाय्याने उघडून त्यातून या वस्तू चोरून नेल्या. याप्रकरणी अधिक तपास उपनिरीक्षक फंटागरे हे करत आहेत.