दीड वर्षांपासून पोलिसांना गुंगारा देणारे सख्खे भाऊ अखेर जाळ्यात! गुन्हे शाखेची मोठी कारवाई

सहकारनगर पोलिस ठाण्याच्या हद्दीतील गंभीर गुन्ह्यात गेल्या दीड वर्षांपासून फरार असलेल्या दोन सख्ख्ये भाऊ असलेल्या अट्टल गुन्हेगारांना पुणे पोलिसांच्या गुन्हे शाखेच्या दरोडा व वाहनचोरी विरोधी पथक एकने शिताफीने जेरबंद केले आहे.

• दीड वर्षांपासून फरार झालेले सख्खे भाऊ अखेर जेरबंद!
• नोकरी करून पोलिसांना दिला होता चकवा
• पुणे गुन्हे शाखेच्या पथकाची धडक कारवाई

पुणे : सहकारनगर पोलिस ठाण्याच्या हद्दीतील गंभीर गुन्ह्यात गेल्या दीड वर्षांपासून फरार असलेल्या दोन सख्ख्ये भाऊ असलेल्या अट्टल गुन्हेगारांना पुणे पोलिसांच्या गुन्हे शाखेच्या दरोडा व वाहनचोरी विरोधी पथक एकने शिताफीने जेरबंद केले आहे. सागर शैलेश गायकवाड (वय २५) आणि आकाश शैलेश गायकवाड (वय २६, दोन्ही रा. पुणे) अशी अटक केलेल्या दोन्ही आरोपींची नावे आहेत. विशेष म्हणजे, हे दोघेही पोलिसांच्या नजरेपासून लपण्यासाठी सुसगाव येथील एका ओल्डएज होममध्ये आणि कात्रज-कोंढवा परिसरातील एका जिममध्ये नोकरी करत असल्याचे तपासात उघडकीस आले आहे.

 

पोलिस उपायुक्त गौहर हसन यांच्या मार्गदर्शनाखाली दरोडा व वाहनचोरी विरोधी पथक एकचे पोलिस निरीक्षक मारुती खेडकर, पोलिस अंमलदार ज्ञानेश्वर पिंगळे, अमित गद्रे, परमेश्वर नरवडे, साईकुमार कारके, साधना पवार आणि अजित शिंदे यांच्या पथकाने ही कारवाई केली आहे.

नेमकं प्रकरण काय?

सहकारनगर पोलिस ठाण्यात दाखल असलेल्या गुन्ह्यामध्ये भारतीय न्याय संहिता कलम ७४, ३३३, ११५(२), ३५२, ३५१(२)(३)) हे दोन्ही आरोपी मागील दीड वर्षांपासून पोलिसांना गुंगारा देऊन फरार होते. रेकॉर्डवरील पाहिजे व फरार आरोपींचा शोध घेण्याचे आदेश वरिष्ठांनी दिले होते. यादरम्यान, दरोडा व वाहनचोरी विरोधी पथकातील पोलिस अंमलदार ज्ञानेश्वर पिंगळे यांना आरोपी सागर गायकवाड हा सुसगावमधील पायगुडेनगर येथील ‘श्री. माऊली ओल्डएज होम’मध्ये नोकरी करत असल्याची खात्रीशीर माहिती मिळाली. तर दुसरा आरोपी आकाश गायकवाड हा टिळेकर नगरमधील ‘वर्ल्ड फिटनेस जिम’मध्ये कामास असल्याची कुणकुण पोलिस अंमलदार अमित गद्रे यांना मिळाली.

हे सुद्धा वाचा : लॉरेन्स बिश्नोई सरकारचा जावई लागतो काय? मुख्यमंत्र्यांमध्ये हिंमत असेल तर…; सपकाळांची मागणी

पोलिसांचा यशस्वी सापळा

माहितीनंतर दरोडा व वाहनचोरी विरोधी पथकातील पथकाने सुसगाव आणि कात्रज-कोंढवा परिसरात एकाच वेळी सापळा रचला. पोलिसांनी दोन्ही ठिकाणांहून दोन्ही आरोपींना अत्यंत फिल्मी स्टाइलने ताब्यात घेतले. चौकशी दरम्यान त्यांनी गुन्ह्याची कबुली दिल्यानंतर, त्यांना पुढील कायदेशीर कारवाईसाठी सहकारनगर पोलिसांच्या ताब्यात देण्यात आले आहे.