नोकरीत भागेना, बहाद्दराने काढला ड्रग्जचा कारखाना; पोलिसांना सुगावा लागला अन्…

राजस्थानातील २८ वर्षीय महावीरने नोकरी सोडून एक असा व्यवसाय सुरू केला, ज्यातून लाखो रुपयांचा नफा मिळवले. पण एके दिवशी त्याचे बिंग फुटले आणि एमडीएमए ड्रग्ज निर्मितीचा घरातच सुरू केलेला कारखाना उघडकीस आला.

जयपूर : तो नोकरी करत होता. पण, त्यातून मिळणारा पैसा त्याला पुरत नव्हता. नोकरीत सडत राहिलो तर आयुष्य वाया जाईल. काहीतरी मोठे करायला हवे. रातोरात करोडपती व्हायला हवे, या विचारातून राजस्थानातील २८ वर्षीय महावीरने नोकरी सोडून एक असा व्यवसाय सुरू केला, ज्यातून लाखो रुपयांचा नफा मिळवले. पण एके दिवशी त्याचे बिंग फुटले आणि एमडीएमए ड्रग्ज निर्मितीचा घरातच सुरू केलेला कारखाना उघडकीस आला. पोलिसांनी टाकलेल्या छाप्यात तब्बल १०० कोटी रुपयांचे ड्रग्ज आणि इतर साहित्य जप्त केले आहे.

पोलिसांच्या माहितीनुसार, आरोपी महावीर हा २८ लक्ष्मणपुरा कुचेरा येथील रहिवासी आहे. तो सध्या नागौरमधील दीप कॉलनीत राहतो. तो पूर्वी नोकरी करत होता, पण त्याच्या कमाईवर तो असमाधानी होता. अधिक पैशांच्या लोभापायी त्याने नोकरी सोडली. डिसेंबर २०२५ ते जानेवारी २०२६ दरम्यान त्याने एमडीएमए बनवण्याचा प्रयत्न सुरू केला. त्याचे पहिले प्रयत्न अयशस्वी ठरले. त्यानंतर त्याने एमडीएमए उत्पादनाबद्दलची माहिती ऑनलाइन गोळा केली. हळूहळू, त्याने पद्धत शिकून घेतली आणि एक सेटअप तयार करण्यास सुरुवात केली. फेब्रुवारी २०२६ मध्ये नोकरी सोडल्यानंतर, त्याने नागौरमधील एक घर भाड्याने घेतले आणि तिथेच ड्रग्ज उत्पादनाचा कारखाना सुरू केला. ते घर बाहेरून सामान्य दिसत होते, पण आतमध्ये ड्रग्जची फॅक्टरी सुरू होती.

…आणि पोलिसांना लागला फॅक्टरीचा सुगावा

महावीरच्या ह्या ‘उद्योगा’ला ग्रहण लागले १० ऑगस्ट २०२६ रोजी. पोलिसांना महावीरच्या या कारनाम्याची माहिती मिळाली. पोलिसांनी नागौरच्या दीप कॉलनीत कारवाई केली. तेथे महावीरला एमडीएमए बनवण्याच्या साहित्यासह अटक करण्यात आली. पोलिसांनी त्या कारवाईत २० कोटी रुपयांपेक्षा जास्त किमतीचे साहित्य जप्त केल्याचा दावा केला. तथापि, चौकशीनंतर हे प्रकरण आणखी गुंतागुंतीचे झाले. पोलिसांनी महावीरची चौकशी केली. याच दरम्यान, जोधपूर रोडवरील एका घराविषयी माहिती मिळाली. पोलिसांच्या मते, या जागेचा वापरही एमडीएमए बनवण्यासाठी केला जात होता. त्यानंतर पोलिसांचे पथक तेथे पोहोचले. या दुसऱ्या कारवाईत जे काही उघड झाले, त्याने संपूर्ण प्रकरणाचे स्वरूपच बदलून टाकले.

एक फोन, अनेक सिमकार्ड, बदलती ओळख

तपासादरम्यान आणखी एक गोष्ट उघडकीस आली. पोलिसांच्या म्हणण्यानुसार, महावीरकडे अंदाजे १० ते १२ मोबाईल सिमकार्ड होते. तो कधीही एकच सिमकार्ड जास्त काळ वापरत नसे आणि दर १० दिवसांनी ते बदलत असे. पोलिस आता मोबाईलमधील संपर्क आणि इतर पुराव्यांचा तपास करत आहेत. तो कोणाशी संवाद साधत होता? ती रसायने कुठून आली? त्याला एमडीएमए बनवण्याबद्दलची माहिती कुठून मिळाली? आणि सर्वात मोठा प्रश्नः तयार झालेला पदार्थ कुठे गेला? पोलिस या प्रश्नांची उत्तरे शोधत आहेत. त्याच्या चार साथीदारांची भूमिकाही उघडकीस आली आहे. त्यांची चौकशी करून या नेटवर्कमधील दुवे जोडण्याचे प्रयत्न सुरू आहेत.

हे सुद्धा वाचा : माहेरहून पाच लाख रुपये घेऊन ये, नाहीतर…; संभाजीनगरमध्ये विवाहितेचा छळ

पोलिसांच्या छाप्यात काय काय सापडले ?

एमडीएमए ड्रग्ज ५.४१८ किलो.

कॅफीन – २.७४४ किलो.

२४ प्रकारची वेगवेगळी रसायने- २१० लिटर.

साहित्याचे अंदाजे बाजारमूल्य – १०० कोटी आहे.