घटनास्थळी गोळी चाललीच नाही, मग पिस्तूल आले कुठून? राणा सूर्यवंशी हल्ला प्रकरणात पोलिसांचा तपासही संशयाच्या भोवऱ्यात

बारामतीतील उद्योजक राणा सूर्यवंशी यांच्यावर झालेल्या जीवघेण्या हल्ल्याचा तपास जसजसा पुढे जात आहे, तसतसे या प्रकरणातील गूढ अधिकच वाढत चालले आहे. आरोपींकडे पिस्तूल नव्हतेच तर पिस्तूल आले कोठून असा प्रश्न उपस्थित होत आहे.

• बारामतीतील उद्योजक राणा सूर्यवंशी यांच्यावर जीवघेणा हल्ला
• पोलिसांकडून आतापर्यंत पाच जणांना अटक
• हल्ल्यातील पिस्तूल कुठून आले, याचा शोध सुरू

पुणे : बारामतीतील उद्योजक राणा सूर्यवंशी यांच्यावर झालेल्या जीवघेण्या हल्ल्याचा तपास जसजसा पुढे जात आहे, तसतसे या प्रकरणातील गूढ अधिकच वाढत चालले आहे. खऱ्या अर्थाने हल्याच्या आठ दिवसानंतर देखील पुणे ग्रामीण पोलिसांना या हल्यामागील गुढ उकलता आलेले नाही. त्यामुळे पोसिसांच्या तपास देखील संशयाच्या भोवऱ्यात अडकला आहे. पोलिसांनी याप्रकरणात आतापर्यंत ५ जणांना बेड्या ठोकल्या असल्या, तरी आरोपींकडे पिस्तूल नव्हतेच तर पिस्तूल आले कोठून असा प्रश्न उपस्थित होत आहे.

 

पोलिसांनी केलेल्या दाव्यांनुसार हल्ल्यातील प्रत्यक्ष हल्लेखोर आणि सुपारी देणाऱ्यांना अटक केली आहे. तसेच हल्लेखोरांना सत्तूर आणि पैसे पुरवल्याचेही समोर आले आहे. मात्र, जर हा गोळीबाराचा हल्ला होता, तर मग घटनास्थळावरून गोळीची पुंगळी का गायब झाली ? आणि पोलिसांनी ज्या कांबळे नावाच्या व्यक्तीकडे चौकशी केली, त्याने पिस्तूल पुरवल्याचा इन्कार केला आहे. मग जर पिस्तूल वापरले गेले होते, तर ते या मारेकऱ्यांपर्यंत पोहोचवले कोणी ? या अत्यंत महत्त्वाच्या आणि मूलभूत प्रश्नाचे उत्तर पोलिसांकडे अद्याप नाही. समजा, हल्लेखोरांच्या दाव्यानुसार, पिस्तूल वापरलेच नाही तर घटनास्थळावर पिस्तूल आले कोठून असा प्रश्न उपस्थित केला जात आहे.

हल्ल्यामागील साखळी, सुपारी देणारे आणि आरोपी हाती लागूनही मुख्य शस्त्रच पोलिसांना शोधता आलेले नाही, हा तपासातील मोठा गोलमाल मानला जात आहे. सत्तूर व पैसे देणाऱ्याने पिस्तूल देण्याचे नाकारल्याने, या प्रकरणात पोलिस खरी माहिती लपवत आहेत की गुन्हेगारांचे धागेदोरे शोधण्यात यंत्रणा हतबल ठरली आहे, अशी चर्चा आता रंगू लागली आहे.

हे सुद्धा वाचा : शेतकरी चंद्रकांत शिंदे हत्या प्रकरणात मोठी अपडेट, तिघांना अटक; मुख्य आरोपीचा शोध सुरू

पोलिस अजूनही काही संशयितांच्या मागावर आहेत आणि नवीन नावे समोर येत आहेत. मात्र, जोपर्यंत हल्ल्यात वापरले गेलेल्या ‘पिस्तुलाचा खरा स्रोत’ उघड होत नाही, तोपर्यंत पोलिसांची ही कारवाई वरवरची आणि दिशाभूल करणारी तर नाही ना, असा संशय सामान्य नागरिकांमधून व्यक्त होत आहे. एकूणच, आरोपी गळाला लागले असले तरी हल्ल्यातील शस्त्राचे रहस्य उलगडण्याचे मोठे आव्हान अजूनही पोलिसांसमोर कायम आहे.

हे सुद्धा वाचा : निगडीतील २५ एकर जागेवरील वेस्ट-टू-एनर्जी प्रकल्प वादात; नगरसेवकांचे आयुक्तांना निवेदन