शनिवार, 8 ऑगस्ट 2026
सौजन्य - नवराष्ट्र टीम
पुणे : गुन्हेगारांना वठणीवर आणण्यासाठी पुणे पोलिसांकडून राबविला जाणारा ‘धिंड पॅटर्न’ वादाच्या भोवऱ्यात सापडल्यानंतर पुणे पोलिसांनी नरमाईचे धोरण स्विकारले आहे. पोलिस आयुक्त अमितेश कुमार यांनी अटक आरोपींच्या वागणुकीसंदर्भात कठोर मार्गदर्शक सूचना जारी केल्या आहेत. आरोपींचा सार्वजनिक अपमान होईल, अशा कोणत्याही प्रकारची वागणूक देऊ नये, तसेच त्यांचे फोटो किंवा व्हिडिओ सोशल मिडीयावर प्रसिद्ध होणार नाहीत, याची विशेष काळजी घेण्याचे आदेश दिले आहेत.
राष्ट्रीय मानवी हक्क आयोग, सर्वोच्च न्यायालयाच्या निर्देशांबरोबरच भारतीय नागरिक सुरक्षा संहिता (बीएनएसएस) २०२३ आणि महाराष्ट्र पोलिस मुख्यालयाच्या आदेशांचा संदर्भ देत हे परिपत्रक काढण्यात आले आहे. भारती विद्यापीठ पोलिस ठाण्यातील एका प्रकरणातील अल्पवयीन आरोपींची कथित धिंड काढणे आणि अपमानास्पद वागणूक दिल्याच्या घटना तसेच लक्ष्मीनगर पोलिसांनी आरोपींची भररस्त्यात गुडघ्यावर बसवून काढलेल्या धिंडीनंतर राज्य मानवी हक्क आयोगाने गंभीर दखल घेतली. नुकतेच आयोगाच्या समितीने भारती विद्यापीठ पोलिस ठाण्यात येऊन संबंधित अधिकारी यांचे जबाब नोंदवले. नोंदी तसेच सीसीटीव्ही आणि व्हायरल व्हिडीओची चौकशी केली. संबंधित प्रकरणाचा अंतिम अहवाल आयोगाला सादर केला जाणार आहे.
दरम्यान, या पार्श्वभूमीवर पुणे पोलिस आयुक्त अमितेश कुमार यांनी सर्व पोलिस ठाणे, शाखा आणि वरिष्ठ अधिकाऱ्यांना आदेश दिले आहेत. परिपत्रकानुसार, कोणत्याही आरोपीची धिंड काढणे, सार्वजनिक अपमान होईल अशा पद्धतीने फिरविणे किंवा हातपाय बांधून मिरविणे यावर स्पष्ट बंदी घालण्यात आली आहे. अटक ते न्यायालयीन प्रक्रिया पूर्ण होईपर्यंत कायद्यानुसार आणि मानवी हक्कांचा सन्मान राखूनच कारवाई करण्याच्या सूचना देण्यात आल्या आहेत. याशिवाय, अशा प्रकारच्या घटना घडल्यास संबंधित अधिकारी आणि कर्मचाऱ्यांवर शिस्तभंगाची कारवाई केली जाईल, असा इशाराही पोलिस आयुक्तांनी दिला आहे. प्रत्येक पोलिस ठाण्याच्या वरिष्ठ अधिकाऱ्यांनी या सूचनांची अंमलबजावणी होत असल्याची खात्री करून त्याची नियमित नोंद ठेवण्याचे निर्देशही देण्यात आले आहेत.
हे सुद्धा वाचा : आनंदाची बातमी! पुणे जिल्ह्यातील 38 हजार 970 शेतकरी कर्जमुक्त; तब्बल 345 कोटी…
आयुक्तांच्या प्रमुख मार्गदर्शक सूचना
