पोलिसाची टोपी घालून दादागिरी; तोतया पोलिसाला शिवाजीनगर पोलिसांनी ठोकल्या बेड्या

पोलिसांची टोपी घालून कॅब चालकाला रुबाब झाडत त्याला शिवीगाळ तसेच अर्वाच्य भाषेत बोलत असल्याचा एक व्हिडीओ व्हायरल झाला होता. त्यानंतर पोलिसांनाच टीकेला सामोरे जावे लागले होते. शिवाजीनगर पोलिसांनी शोध घेत त्याला पकडल्यानंतर तो पोलिसच नसल्याचे समोर आले आहे.

पुणे : पोलिसांची टोपी घालून कॅब चालकाला रुबाब झाडत त्याला शिवीगाळ तसेच अर्वाच्य भाषेत बोलत असल्याचा एक व्हिडीओ व्हायरल झाला होता. त्यानंतर पोलिसांनाच टीकेला सामोरे जावे लागले होते. परंतु, शिवाजीनगर पोलिसांनी शोध घेत त्याला पकडल्यानंतर तो पोलिसच नसल्याचे समोर आले असून, तो पोलिसांची टोपी घालून रूबाब करत असल्याचे समोर आले आहे. याप्रकरणी मजहर मजीद शेख (वय २७, रा.बुरूड आळी, ता. शिरुर) या तोतया तरुणाला अटक केली आहे. याप्रकरणी महिला पोलिस अंमलदार अश्विनी गगे यांनी तक्रार दिली आहे.

 

शेख हा पोलिस नसून, तो डिलेव्हरी बॉयचे काम करतो. त्याच्या मुजोरीचा एक व्हिडीओ सोशल मिडीयावर व्हायरल झाला होता. माहितीनुसार, दोन- चार दिवसापुर्वी एक व्हिडीओ सोशल मिडीयावर व्हायरल झाला होता. त्यात डोक्याला पोलिसाची कॅप घातलेला तरुण कॅब चालकाला अर्वाच्य भाषेत शिवीगाळ करत बोलत होता. कॅबचालकाकडून वायफायचे पाणी त्याच्या डोळ्यावर उडाले होते. त्याने कॅबची चावी काढून घेऊन शिवीगाळ करत डायल ११२ ला कॉल करतो. तुला दाखवतो आता मी काय करतो ते, तू बाहेरचा आहेत. मी इथला आहे असे म्हणत त्याला धमकावले होते.

कारमधील एक महिला देखील त्याला गयावया करत होती. मात्र आरोपी शेख हा त्यांना पोलिस असल्यासारखे दरडावत होता. हा प्रकार पुणे शहर पोलिस दलातील वरिष्ठ अधिकाऱ्यांच्या निदर्शनास आला. त्यांनी गुन्हे शाखा आणि स्थानिक पोलिसांना या प्रकराची चौकशी करण्याचे आदेश दिले होते. त्यानुसार शिवाजीनगर पोलिसांनी शेख याला शोधून काढले. गणेशखिंड रोड शिवाजीनगर परिसरात हा प्रकार घडल्याचे निदर्शऩास आले. पोलिसांनी आरोपी शेख याला ताब्यात घेतले. त्यावेळी त्याने चौकशीत सांगितले की, खडकी येथून त्याने पिंपरी-चिंचवड पोलिस दलाचा लोगो असलेली टोपी खरेदी केली. तो टोपी घालून तो मिरवत होता. अशी माहिती वरिष्ठ निरीक्षक गिरीषकुमार दिघावकर यांनी दिली.

हे सुद्धा वाचा : पावसामुळे शाळांच्या परिसराती बसथांबा कोसळला, मनसे आक्रमक; महापालिका आयुक्तांकडे केली ‘ही’ मागणी

पोलिस नाहक टिकेचे धनी

तोतया शेख याचा व्हिडीओ सोशल मिडीयात व्हायरल झाल्यानंतर नाहक पोलिसांना टिकेचे धनी व्हावे लागले. पुणे शहर पोलिसांच्या नावाने तो व्हिडीओ व्हायरल झाला होता. दरम्यान, अखेर पोलिसांनी आरोपी शेखला शोधून काढले, त्यावेळी तो पोलिस नसून तोतयागिरी करत असल्याचे पुढे आले.