पुणे शहरात सायबर चोरट्यांचा सुळसुळाट; दोन वेगवेगळ्या प्रकरणांत लाखोंची फसवणूक
पुणे : पुण्यात सायबर चोरट्यांचा सुळसुळाट वाढत असून दोन वेगवेगळ्या प्रकरणांत नागरिकांची लाखो रुपयांची फसवणूक झाल्याचे उघडकीस आले आहे. कारवाईची भीती दाखवून एका तरुणाकडून ४ लाख ८१ हजार रुपये उकळल्याची घटना समोर आली आहे. तर शेअर बाजारात गुंतवणुकीच्या आमिषाने ज्येष्ठ नागरिकाची १७ लाख रुपयांची फसवणूक करण्यात आली आहे. या दोन्ही प्रकरणांत संबंधित पोलीस ठाण्यांमध्ये गुन्हे दाखल करण्यात आले आहेत.
पहिल्या प्रकरणात चंदननगर परिसरात राहणाऱ्या एका तरुणाची सायबर चोरट्यांनी फसवणूक केली आहे. चोरट्यांनी तरुणाच्या मोबाईल क्रमांकावर संपर्क साधून एका खासगी वित्तीय संस्थेकडून ऑनलाइन पद्धतीने कर्ज घेतले असून त्याचे हप्ते थकले असल्याचे सांगितले. हप्ते भरले नाहीत तर कायदेशीर कारवाई करण्यात येईल, अशी भीती दाखवत चोरट्यांनी तरुणाला जाळ्यात ओढले. कारवाईची भीती दाखवून चोरट्यांनी त्याच्याकडून वेळोवेळी ४ लाख ८१ हजार रुपये ऑनलाइन पद्धतीने आपल्या खात्यात जमा करून घेतले. पैसे दिल्यानंतरही चोरट्यांकडून त्याला धमक्या दिल्या जात होत्या. त्यामुळे घाबरलेल्या तरुणाने अखेर चंदननगर पोलीस ठाण्यात तक्रार दाखल केली. या प्रकरणाचा तपास वरिष्ठ पोलीस निरीक्षक नीलेश बडाख करत आहेत.
दरम्यान, दुसऱ्या प्रकरणात शेअर बाजारात गुंतवणुकीचे आमिष दाखवून सायबर चोरट्यांनी कात्रज परिसरातील आंबेगाव येथे राहणाऱ्या एका ज्येष्ठ नागरिकाची १७ लाख रुपयांची फसवणूक केली. चोरट्यांनी त्यांच्या मोबाईल क्रमांकावर संदेश पाठवून शेअर बाजारात गुंतवणूक केल्यास मोठा परतावा मिळेल, असे आमिष दाखविले. त्यानंतर चोरट्यांनी त्यांना विविध कारणे सांगत वेळोवेळी १७ लाख रुपये आपल्या खात्यात जमा करण्यास भाग पाडले. पैसे जमा केल्यानंतर त्यांना कोणताही परतावा मिळाला नाही. फसवणूक झाल्याचे लक्षात आल्यानंतर त्यांनी भारती विद्यापीठ पोलीस ठाण्यात तक्रार दिली. या प्रकरणाचा तपास वरिष्ठ पोलीस निरीक्षक राहुलकुमार खिलारे करत आहेत.
पुण्यात अटकेची भीती दाखवत ज्येष्ठ नागरिकाला लुटले
सायबर चोरट्यांनी पुन्हा एका जेष्ठ नागरिकाला ‘तुम्हाला कोर्टाच्या परवानगीने डिजिटल अरेस्ट केले आहे’ अशी बतावणी करून तब्बल २ कोटी ७४ लाख रुपयांचा गंडा घातल्याची धक्कादायक प्रकार समोर आला आहे. त्यांना एक-दोन दिवस नव्हे तर दोन महिने भीतीच्या छायेत ठेवत त्यांच्याकडून विविध बँक खात्यांमध्ये पैसे ट्रान्सफर करून घेतले आहेत. याप्रकरणी सायबर पोलिसांकडे गुन्हा दाखल केला आहे. याप्रकरणाचा तपास सुरू आहे. याबाबत कोथरूडमध्ये राहणाऱ्या ८२ वर्षीय ज्येष्ठ नागरिकाने तक्रार दिली आहे.
.png "Videos"){kind=small}
