एटीएममध्ये मदतीच्या बहाण्याने फसवणूक; तक्रारदारांना वॉचमनला बोलवायला पाठविले अन्...
पुणे : राज्यासह जगभरात फसवणुकीच्या घटनांमध्ये मोठी वाढ झाली आहे. दररोज सायबर चोरटे नागरिकांच्या लाखो रुपयांवर डल्ला मारत आहेत. वाढत्या फसवणुकीच्या घटनांमुळे नागरिकांमध्ये भिती पसरत आहे. अशातच आता पुण्यातून एक घटना समोर आली आहे. एटीएममध्ये पैसे काढण्यास गेलेल्या ज्येष्ठाला भामट्यांनी मदत करण्याच्या बहाण्याने त्यांचे कार्ड घेऊन गोपनीय पिन क्रमांक पाहून त्यांच्याच खात्यातून पैसे काढल्याची घटना घडली आहे. वानवडी परिसरात ही घटना घढली असून, पोलिसांनी एका आरोपीला अटक केली आहे.
याप्रकरणी आयाज कासम शेख (वय ४०, रा. लोहगाव) याला अटक करण्यात आली आहे. या प्रकरणी भारतीय न्याय संहिता कलमे ३१६ (२) आणि ३१८(४) अंतर्गत गुन्हा दाखल करण्यात आला असून, पुढील तपास सुरू आहे. दरम्यान, एटीएममध्ये व्यवहार करताना अनोळखी व्यक्तींची मदत घेऊ नये आणि पिन गोपनीय ठेवावा, असे आवाहन पोलिसांनी केले आहे.
पोलिसांच्या माहितीनुसार, जगताप चौक येथील एसबीआय बँकेच्या एटीएममध्ये ७३ वर्षीय पुरुष (रा. जांभुळकर गार्डनजवळ, वानवडी) पैसे काढण्यासाठी गेले होते. त्यावेळी एटीएम मशीनची स्क्रीन काळी झाल्याने ते अडचणीत आले. या संधीचा फायदा घेत आरोपीने त्यांना मदत करण्याच्या बहाण्याने एटीएम पिन टाकण्यास सांगितले. त्याने तो लक्षात ठेवला. नंतर ‘वॉचमनला बोलावून आणा’ असे सांगून तक्रारदाराला बाहेर पाठवले. दरम्यान, आरोपीने त्यांच्या एटीएम कार्डचा वापर करून ४० हजार रुपये काढले. तपासात समोर आले की, आरोपीने अशाच पद्धतीने इतर नागरिकांचीही फसवणूक केली असून, एकूण १ लाख ५९ हजार रुपयांना गंडा घातला आहे.
.png "Videos"){kind=small}
