“आमची मांजर त्यांच्या पोपटांकडे….”; मुक्या प्राण्यांमुळे माणसांमध्ये हाणामारी अन्…, पोलिस हैराण

मिळालेल्या माहितीनुसार, अभिषेक सिंग हे कुटुंबासह ताडीवाला रोड परिसरात वास्तव्यास आहेत. त्यांनी घरात लव्हबर्ड्स (छोटे पोपट) पाळले असून त्यांचा पिंजरा घरासमोर ठेवलेला असतो.

मुक्या प्राण्यांमधील वाद पोहोचला पोलिस ठाण्यात
मांजर मालकांविरुद्ध गुन्हा दाखल
पुणे शहरात घडला अनोखा गुन्हा

पुणे: “पुणे तेथे काय उणे” असे म्हणतात ते उगाच नाही. शहरात एखादी किरकोळ घटना कधी मोठ्या वादात रूपांतरित होईल, याचा नेम नाही. पुण्यात घडलेल्या अशाच एका वेगळ्याच प्रकाराने नागरिकांचे लक्ष वेधून घेतले आहे. लव्हबर्ड (पोपट) आणि मांजर यांच्यातील ‘वाद’ अखेर दोन शेजाऱ्यांमधील हाणामारीपर्यंत पोहोचला आणि प्रकरण थेट पोलिस ठाण्यापर्यंत गेले.

पोलिसांनी दिलेल्‍या माहीतीनुसार, ही घटना ताडीवाला रोड परिसरातील भारत मित्र मंडळासमोर 8 मार्चला घडली. याप्रकरणी मांजर पाळणारे शेजारी दिनेश रंगराव पोताबत्तोनी यांच्याविरुद्ध पोलिस ठाण्यात बीएनएसचे कलम 118 (1) नुसार गंभीर मारहाणीचा गुन्हा दाखल करण्यात आला आहे.

मिळालेल्या माहितीनुसार, अभिषेक सिंग हे कुटुंबासह ताडीवाला रोड परिसरात वास्तव्यास आहेत. त्यांनी घरात लव्हबर्ड्स (छोटे पोपट) पाळले असून त्यांचा पिंजरा घरासमोर ठेवलेला असतो. शेजारी राहणारे दिनेश पोताबत्तोनी यांनी मांजर पाळले आहे. हे मांजर परिसरात मोकळेपणाने फिरत असल्याने ते वारंवार सिंग यांच्या घरासमोर येऊन लव्हबर्ड्सच्या पिंजऱ्याभोवती फिरत असे.

पिस्तूल विक्रीसाठी आलेल्या टोळीला ठोकल्या बेड्या; 4 पिस्तुले अन् 7 जिवंत काडतुसे जप्त

काही वेळा मांजरीने पिंजरा ढकलल्याचाही प्रकार घडल्याने सिंग कुटुंबीय त्रस्त झाले होते. याबाबत त्यांनी पोताबत्तोनी यांना मांजरीवर लक्ष ठेवण्यास सांगितले. मात्र याच कारणावरून दोन्ही शेजाऱ्यांमध्ये वाद सुरू झाला.

वाद वाढत गेला आणि काही वेळातच दोन्ही कुटुंबीय रस्त्यावर आले. एकमेकांना शिवीगाळ, धक्काबुक्की करत हा वाद हाणामारीपर्यंत पोहोचला. या मारहाणीत अभिषेक सिंग यांना दुखापत झाली. दरम्यान, दिनेश पोताबत्तोनी यांच्या आईने “आमची मांजर त्यांच्या पोपटांकडे गेली का हे आम्हाला माहिती नाही. त्यांच्या घरीही मांजर आहेत. मुक्या प्राण्यांचा वाद माणसांमध्ये वाढला,” असे सांगितले. घटनेनंतर अभिषेक सिंग यांनी पोलिस ठाण्यात धाव घेऊन तक्रार दाखल केली. त्यानुसार मांजरीच्या मालकाविरुद्ध गुन्हा नोंद करण्यात आला असून पुढील तपास सुरू आहे.

शस्त्रक्रिया व्हायच्या आधी इंजेक्शन दिले अन्…; कणकवलीमध्ये महिलेसोबत घडले तरी काय?

पिस्तूल विक्रीसाठी आलेल्या टोळीला ठोकल्या बेड्या

अवैध पिस्तुलांची विक्री करण्यासाठी आलेल्या तिघांना पिंपरी-चिंचवड गुन्हे शाखेच्या मालमत्ता गुन्हे विरोधी पथकाने सापळा रचून अटक केली आहे. संशयितांकडून चार देशी बनावटीची पिस्तुले, सात जिवंत काडतुसे, तीन मोबाईल फोन आणि एक कार असा सुमारे १० लाख ९२ हजार रुपयांचा मुद्देमाल जप्त करण्यात आला आहे. ही कारवाई सोमाटणे फाटा परिसरात करण्यात आली आहे.