कामावर जाताना काळाचा घाला, भीषण अपघातात दोन कामगारांचा मृत्यू; खेड तालुक्यातील धक्कादायक घटना

खेड तालुक्यातील शिंदे गावात भामचंद्र डोंगराच्या पायथ्याशी रस्त्याकडेला उभ्या असलेल्या कंटेनरला दुचाकीने पाठीमागून जोरदार धडक दिल्याने दोन बिगारी कामगारांचा जागीच मृत्यू झाल्याची दुर्दैवी घटना घडली आहे.

• उभ्या कंटेनरला दुचाकीची भीषण धडक
• दोन कामगारांचा जागीच मृत्यू
• वाहनधारकांच्या सुरक्षेचा प्रश्न गंभीर

चाकण : खेड तालुक्यातील शिंदे गावात भामचंद्र डोंगराच्या पायथ्याशी रस्त्याकडेला उभ्या असलेल्या कंटेनरला दुचाकीने पाठीमागून जोरदार धडक दिल्याने दोन बिगारी कामगारांचा जागीच मृत्यू झाल्याची दुर्दैवी घटना घडली आहे. सकाळी कामावर जात असताना झालेल्या या भीषण अपघातामुळे परिसरात हळहळ व्यक्त होत आहे. या घटनेच्या निमित्ताने चाकण एमआयडीसी परिसरातील रस्त्यांवर होणारे अनधिकृत पार्किंग आणि त्यातून निर्माण होणाऱ्या अपघातांच्या धोक्याचा प्रश्न पुन्हा ऐरणीवर आला आहे.

 

चाकण एमआयडीसी परिसरात अनेक रस्त्यांच्या कडेला अवजड वाहने, कंटेनर आणि ट्रक उभे केले जातात. काही ठिकाणी रस्त्याच्या कडेला उभ्या असलेल्या वाहनांमुळे दृश्यमानता कमी होते, तर वाहतुकीसाठी उपलब्ध असलेली जागाही अपुरी पडते. विशेषतः सकाळी कामगारांची कामावर जाण्यासाठी लगबग सुरू असताना अशा वाहनांमुळे दुचाकीस्वारांना धोका निर्माण होऊ शकतो. रात्रीच्या वेळी पुरेशा प्रकाशाअभावी रस्त्याकडेला उभे असलेले कंटेनर किंवा ट्रक वेळेत नजरेस न पडल्यास अपघाताची शक्यता अधिक वाढते.

औद्योगिक परिसरात हजारो कामगार दररोज दुचाकीवरून प्रवास करतात. मात्र, अवजड वाहनांसाठी नियोजित पार्किंगची पुरेशी व्यवस्था आहे का, रस्त्यांवरील बेकायदा पार्किंगवर नियमित कारवाई होते का आणि अपघातप्रवण ठिकाणी आवश्यक सुरक्षा उपाययोजना केल्या आहेत का, असे प्रश्न या घटनेनंतर उपस्थित होत आहेत.

अपघातानंतरच प्रशासन जागे होणार का?

रस्ते वाहतुकीसाठी आहेत की अवजड वाहनांचे अनधिकृत वाहनतळ बनवण्यासाठी, असा सवाल नागरिकांकडून उपस्थित केला जात आहे. रस्त्याच्या कडेला धोकादायक पद्धतीने उभ्या केलेल्या वाहनांवर वाहतूक पोलिस आणि संबंधित प्रशासनाने नियमित तपासणी करून नियमानुसार कारवाई करणे गरजेचे आहे. त्याचबरोबर प्रतिबंधित ठिकाणी पार्किंग रोखणे, आवश्यक ठिकाणी प्रकाशव्यवस्था करणे आणि अवजड वाहनांसाठी स्वतंत्र पार्किंगची व्यवस्था करण्याची मागणी होत आहे.

हे सुद्धा वाचा : पुरंदर तालुक्यात दुहेरी हत्याकांड! वृद्ध दाम्पत्याला धारदार शस्त्राने संपवलं; कारणही आलं समोर

या अपघाताचा तपास उत्तर महाळुंगे पोलीस करत आहेत. अपघाताचे नेमके कारण आणि संबंधित वाहनाच्या पार्किंगची कायदेशीर स्थिती तपासातून स्पष्ट होईल. मात्र, दोन कामगारांचा जीव गेल्यानंतर तरी अनधिकृत पार्किंगच्या प्रश्नावर ठोस उपाययोजना होणार का, हा प्रश्न कायम आहे.

हे सुद्धा वाचा : ड्रग्ज तस्कराला पकडण्यासाठी धावले, पण काळाचा घाला! पोलीस कर्मचारी जावेद बागसिराज यांचा मृत्यू