Mumbai Crime News: दुसऱ्या लग्नाला विरोध केला, पोटच्या मुलीची हत्या केल्याचा आरोप; वडिलांचा विषारी कट उघड

मुंबईतील वडाळ्यात २० वर्षीय तरुणीचा मृत्यू झाला आणि सुरुवातीला अन्नातून विषबाधा झाल्याचा संशय व्यक्त करण्यात आला. मात्र, शवविच्छेदनात मानेवर गळा आवळल्याच्या खुणा आढळल्याने प्रकरणाला वेगळे वळण मिळाले. दुसऱ्या लग्नावरून घरात वाद होता का? पोलिसांच्या तपासातून धक्कादायक माहिती समोर आली आहे.

• दुसऱ्या लग्नाला विरोध केल्याने मुलीची हत्या केल्याचा वडिलांवर आरोप.
• विषमिश्रित बिर्याणी आणि गळा आवळल्याचा पोलिसांचा संशय.
• पोस्टमार्टम अहवालानंतर आरोपी वडिलांना अटक.

 

मुंबई : वडिलांच्या दुसऱ्या लग्नाला विरोध केल्याने २० वर्षीय मुलीची हत्या केल्याचा धक्कादायक प्रकार मुंबईतील वडाळा परिसरात उघडकीस आला आहे. शरीफ रझा हुसेन खान (वय ४५) असे अटक करण्यात आलेल्या आरोपीचे नाव आहे. मुलीला विषमिश्रित चिकन बिर्याणी खाऊ घालून त्यानंतर गळा आवळल्याचा आरोप त्याच्यावर आहे. सुरुवातीला अन्नातून विषबाधा झाल्याचा बनाव रचण्यात आल्याचे तपासात समोर आले. शवविच्छेदन अहवाल आणि फॉरेन्सिक तपासाच्या आधारे वडाळा पोलिसांनी आरोपीला अटक केली आहे.

दुसऱ्या लग्नावरून घरात वाद

शरीफ खान हा व्यवसायाने कार्पेंटर असून वडाळा पूर्वेतील मॅडोना कॉलनी परिसरात राहतो. नोव्हेंबर २०२५ मध्ये त्याच्या पत्नीचे कर्करोगामुळे निधन झाले होते. त्यानंतर तो आपल्या तीन मुलांसह राहत होता. रिफत (२०), नुझत (१६) आणि अहमद (१०) अशी त्यांच्या मुलांची नावे आहेत. पत्नीच्या निधनानंतर शरीफला दुसरे लग्न करायचे होते. मात्र, त्याच्या दोन्ही मुलींना या लग्नाला विरोध होता. याच कारणावरून घरात वाद निर्माण झाल्याची माहिती समोर आली आहे. या वादातून आरोपीने दोन्ही मुलींना लक्ष्य करण्याचा कट रचल्याचा आरोप पोलिसांकडून करण्यात आला आहे.

हेही वाचा: Crime News: भाईंदरच्या बारमध्ये पोलिसांचा छापा!  २६ जण ताब्यात, तब्बल १० तरुणी …

चिकन बिर्याणीत विष मिसळल्याचा आरोप

२ ऑक्टोबरच्या रात्री शरीफ खानने घरी चिकन बिर्याणी आणली. या बिर्याणीत विषारी पदार्थ मिसळून त्याने रिफतला खाऊ घातल्याचा आरोप आहे. त्याच रात्री लहान मुलगी नुझत उकाडा होत असल्याने मावशीच्या घरी झोपायला गेली होती. त्यामुळे ती घरी नसल्याने तिचा जीव वाचल्याचे सांगितले जाते. बिर्याणी खाल्ल्यानंतर रिफत बेशुद्ध झाल्याचे समोर आले. त्यानंतर तिचा गळा आवळून हत्या केल्याचा आरोप आरोपीवर आहे. या घटनेमागील नेमकी परिस्थिती आणि विषारी पदार्थाचा वापर याबाबत तपास यंत्रणा पुरावे तपासत आहेत.

अन्नातून विषबाधा झाल्याचा बनाव?

३ ऑक्टोबरच्या पहाटे सुमारे पाच वाजता शरीफ खान नातेवाइकांकडे गेला. रिफत प्रतिसाद देत नसल्याचे सांगून तिला अन्नातून विषबाधा झाल्याचा संशय व्यक्त केला. नातेवाइकांनी तिला तातडीने रुग्णालयात दाखल केले; मात्र डॉक्टरांनी तिला मृत घोषित केले. प्रकरणाचे गांभीर्य आणि मृत्यूची संशयास्पद परिस्थिती लक्षात घेऊन रिफतचा मृतदेह शवविच्छेदनासाठी पाठवण्यात आला. केईएम रुग्णालयातील शवविच्छेदनादरम्यान तिच्या मानेवर गळा आवळल्याच्या खुणा आढळल्याचे सांगितले जाते. तिचा मृत्यू गुदमरल्यामुळे झाल्याचे निष्कर्ष समोर आल्यानंतर तपासाला वेग आला.

हेही वाचा: जामिनावर बाहेर येताच पुन्हा चर्चेत! आलिशान गाड्या अन् घोड्यांसोबतच्या स्टंटचा व्हिडिओ व्हायरल; नेमकं काय घडलं?

पोस्टमार्टम अहवालानंतर वडिलांना अटक

शवविच्छेदन अहवाल आणि फॉरेन्सिक तपासातील निष्कर्षांच्या आधारे वडाळा पोलिसांनी शरीफ खान याला अटक केली. न्यायालयाने आरोपीला पोलीस कोठडी सुनावल्याची माहिती आहे. या प्रकरणात विषारी पदार्थाचा वापर, हत्या करण्यामागील हेतू आणि घटनेशी संबंधित अन्य पुरावे यांचा पोलीस तपास करत आहेत. दुसऱ्या लग्नाच्या वादातून पोटच्या मुलीची हत्या केल्याचा आरोप समोर आल्याने परिसरात खळबळ उडाली आहे. या प्रकरणातील पुढील तपासातून आणखी माहिती समोर येण्याची शक्यता आहे.