धक्कादायक! पुण्यात आणखी एका विवाहितेचा छळ; महिलेने गळपास घेऊन संपवलं जिवन

हडपसर भागात सासरच्या जाचाला कंटाळून विवाहितेने गळफास घेऊन आत्महत्या केल्याची घटना घडली आहे. सलग दुसरा प्रकार या भागात घडला आहे.

पुणे : हडपसर भागात सासरच्या जाचाला कंटाळून विवाहितेने गळफास घेऊन आत्महत्या केल्याची घटना घडली आहे. सलग दुसरा प्रकार या भागात घडला असून, आत्महत्येस प्रवृत्त केल्याप्रकरणी फुरसुंगी पोलिसांकडून पती, सासू, सासरे, दिरासह नातेवाईकांवर गुन्हा दाखल केला आहे. प्रतिक्षा अभिषेक खळदकर (वय २७) असे आत्महत्या केलेल्या विवाहितेचे नाव आहे.

याप्रकरणी पती अभिषेक आनंद खळदकर, सासरे आनंद, सासू सविता, दीर चेतन, नणंद वैभवी (सर्व रा. धनकवडी), तसेच निर्मला आवटे यांच्याविरुद्ध गुन्हा दाखल करण्यात आला. याबाबत प्रतिक्षाची आई उषा राजेंद्र हरपळे (वय ४०, रा. हरपळे आळी, फुरसुंगी, हडपसर) यांनी तक्रार दिली आहे.

पोलिसांच्या माहितीनुसार, प्रतिक्षाचा ११ जून २०२० रोजी अभिषेक खळदकर याच्याशी विवाह झाला होता. हुंड्यात प्रतिक्षाला ७ तोळे सोन्याचे दागिने, तसेच विवाहाचा खर्च हरपळे कुटुंबीयांनी केला होता. नांदत असताना प्रतिक्षाला वेळोवेळी टोमणे मारुन तिचा छळ करण्यात आला. छळामुळे ती माहेरी निघून आली. ६ एप्रिल रोजी तिने राहत्या घरात गळफास घेऊन आत्महत्या केली.

प्रतिक्षाचा छळ केल्याने तिने आत्महत्या केली, अशी तक्रार तिची आई उषा हरपळे यांनी नुकतीच दिली. नंतर पोलिसांनी विवाहितेचा शारिरिक आणि मानसिक छळ करुन तिला आत्महत्येस प्रवृत्त केल्याप्रकरणी गुन्हा दाखल केला आहे. सहायक पोलीस निरीक्षक किशोर पवार तपास करत आहेत.