रविवार, 1 नोव्हेंबर 2026
(फोटो सौजन्य-सोशल मीडिया)
Actor Yash: दाक्षिणात्य सुपरस्टार यश सध्या दिग्दर्शक नितेश तिवारी यांच्या आगामी ‘रामायणम्’ चित्रपटामुळे चर्चेत आहे. या चित्रपटात यश रावणाची भूमिका साकारणार आहे, तर अभिनेता रणबीर कपूर प्रभू श्रीरामांच्या भूमिकेत दिसणार आहे. दरम्यान, रावणाची भूमिका साकारण्याबाबत यशने आपल्या मुलासोबत झालेल्या एका खास संभाषणाचा खुलासा केला आहे. यशला रावणाच्या भूमिकेत पाहून त्याच्या मुलाला धक्काच बसला होता. ‘तू वाईट आहेस, तू हे कसं करू शकतोस?’ असा प्रश्न त्याने वडिलांना विचारला होता. अभिनेत्याने एका मुलाखतीत हा रंजक किस्सा सांगितला.
यशने सांगितले की, त्याच्या मुलाला वडील कोण आहेत, याची जाणीव आहे. मात्र, जेव्हा त्याला समजले की, वडील ‘रामायणम्’मध्ये प्रभू श्रीरामांची नव्हे, तर रावणाची भूमिका साकारणार आहेत, तेव्हा त्याला मोठा धक्का बसला. कथेतील खलनायकाची भूमिका आपले वडील कशी काय साकारू शकतात, हे त्याला समजत नव्हते.
यशच्या मुलाने त्याला विचारले, “नाही, तुम्ही खलनायक आहात. तुम्ही हे कसं करू शकता?” मुलाच्या या प्रश्नानंतर यशला त्याला रामायणातील पात्रांचे महत्त्व समजावून सांगावे लागले. अभिनेत्याने सांगितले की, त्याने मुलाला प्रभू श्रीराम हे या कथेतील मुख्य पात्र असून त्यांना आदर्श मानले पाहिजे, असे समजावले.
‘माझ्या भूमिकेला आदर्श मानू नकोस’; यशने मुलाला काय सांगितलं?
यशने मुलाला समजावून सांगितले की, रावण शक्तिशाली आणि प्रभावी असला, तरी जीवनात खरा आणि चिरस्थायी विजय मिळवण्यासाठी प्रभू श्रीरामांप्रमाणे धर्म आणि सदाचाराच्या मार्गावर चालणे महत्त्वाचे आहे. एखाद्या कलाकाराने साकारलेली भूमिका आणि प्रत्यक्ष आयुष्यातील त्याचे व्यक्तिमत्त्व यांत फरक असतो, हेही त्याने मुलाला सांगितले.
याबाबत बोलताना यश म्हणाला, “तू रंगमंचावर एक अभिनेता म्हणून माझी प्रशंसा करू शकतोस; पण मी साकारलेल्या भूमिकेला तुझा आदर्श मानू नकोस.”
मुलाच्या एका प्रश्नाने यशला टाकलं पेचात!
यशने पुढे सांगितले की, मुलाला रामायणाची कथा समजावून सांगत असतानाच त्याने आणखी एक प्रश्न विचारला. कथेच्या शेवटी रावणाचा पराभव होतो आणि त्याचा मृत्यू होतो, हे समजल्यानंतर मुलाने वडिलांनाच त्याबद्दल विचारले.
यशने सांगितले, “माझ्या मुलाने मला विचारले, ‘चित्रपटाच्या शेवटी तुमचा मृत्यू होतो का? तुमचा पराभव होतो का?’ हा प्रश्न माझ्यासाठी थोडा कठीण होता. मी हा चित्रपट साइन केला, तेव्हा माझ्या मनात फक्त एकच विचार होता, तो म्हणजे प्रेक्षकांना उत्कृष्ट अभिनय पाहायला मिळावा. मात्र, माझ्या मुलाकडून मला अशा प्रश्नांना सामोरे जावे लागेल, याची मी कल्पनाही केली नव्हती.”
एका अभिनेत्याने साकारलेली भूमिका आणि तो प्रत्यक्षात कसा आहे, यातील फरक मुलाला समजावून सांगणे हा आपल्यासाठी अनोखा अनुभव असल्याचेही यशने सांगितले.
रावणाच्या भूमिकेसाठी यशची खास तयारी
‘रामायणम्’मध्ये रावणाची भूमिका प्रभावीपणे साकारण्यासाठी यश विशेष मेहनत घेत आहे. एका मुलाखतीत त्याने सांगितले होते की, चित्रीकरणादरम्यान तो सेटवर भगवान शिवाचे मंत्र आणि स्तोत्रे मोठ्या आवाजात लावत असे. रावण हा भगवान शिवाचा परमभक्त मानला जातो. त्यामुळे या वातावरणाचा उपयोग रावणाच्या मानसिकतेत शिरण्यासाठी आणि त्याची व्यक्तिरेखा अधिक प्रभावीपणे साकारण्यासाठी केल्याचे त्याने सांगितले.
याशिवाय, रावणाचा जड मुकुट आणि भव्य पोशाख परिधान करणे हे शारीरिकदृष्ट्या आव्हानात्मक असल्याचेही यशने स्पष्ट केले. त्याच्या या भूमिकेबद्दल प्रेक्षकांमध्ये आधीपासूनच उत्सुकता आहे.
नितेश तिवारी दिग्दर्शित ‘रामायणम्’ हा चित्रपट भारतीय महाकाव्य रामायणावर आधारित आहे. या चित्रपटात रणबीर कपूर प्रभू श्रीरामांच्या, साई पल्लवी सीतेच्या, तर यश रावणाच्या भूमिकेत दिसणार आहे. याशिवाय सनी देओल, रवी दुबे, रकुल प्रीत सिंग, अरुण गोविल, लारा दत्ता, विवेक ओबेरॉय आणि अनुपम खेर यांसारखे कलाकारही महत्त्वाच्या भूमिकांमध्ये दिसणार आहेत.
‘रामायणम्’ दोन भागांमध्ये प्रदर्शित होणार आहे. पहिला भाग ५ नोव्हेंबर २०२६ रोजी, तर दुसरा भाग पुढील वर्षी दिवाळीत प्रदर्शित होणार असल्याचे दिलेल्या माहितीत नमूद करण्यात आले आहे. या दोन्ही भागांचे एकत्रित बजेट अंदाजे ४,००० कोटी रुपये असल्याचेही सांगितले जात आहे. त्यामुळे भारतीय चित्रपटसृष्टीतील या भव्य प्रकल्पाकडे सर्वांचे लक्ष लागले आहे.
