गुरुवार, 29 ऑक्टोबर 2026
(फोटो सौजन्य- सोशल मीडिया)
Ahan Shetty: ‘बॉर्डर २’च्या यशानंतर अभिनेता अहान शेट्टी पुन्हा एकदा अ‍ॅक्शनच्या मैदानात उतरण्यास सज्ज झाला आहे. त्याच्या आगामी ‘सनकी’ या अ‍ॅक्शन ड्रामा चित्रपटाच्या चित्रीकरणाला ३० ऑक्टोबरपासून सुरुवात होणार आहे. या चित्रपटाचं दिग्दर्शन ‘रुस्तम’ आणि ‘मिशन रानीगंज’ यांसारख्या चित्रपटांचे दिग्दर्शक टीनू सुरेश देसाई करणार आहेत. त्यामुळे अहानच्या या नव्या प्रोजेक्टकडे प्रेक्षकांचं लक्ष लागलं आहे.
ज्ञानेंद्र वासुदेव यांनी लेखन केलेला ‘सनकी’ हा मुळात प्रेमपट असून, त्यात भावनिक प्रसंगांसोबतच दमदार आणि थरारक अ‍ॅक्शनही पाहायला मिळणार आहे. चित्रपटाच्या चित्रीकरणाला मध्य प्रदेशातील भोपाळ येथे सुरुवात होणार आहे.
दिग्दर्शक टीनू सुरेश देसाई आपल्या टीमसह भोपाळमध्ये दाखल झाले असून, प्रत्यक्ष शूटिंग सुरू होण्यापूर्वी आवश्यक तयारीला अंतिम स्वरूप दिलं जात आहे. चित्रपटाची कथा आणि त्यातील प्रमुख घटनांबद्दल सध्या गुप्तता राखण्यात आली आहे. निर्माते चित्रपटाशी संबंधित माहिती टप्प्याटप्प्याने प्रेक्षकांसमोर आणणार आहेत.
‘बॉर्डर २’नंतर अहान शेट्टीच्या नव्या प्रवासाला सुरुवात
‘बॉर्डर २’मधील अभिनय आणि चित्रपटाला मिळालेल्या यशानंतर अहान शेट्टी आपल्या आगामी प्रोजेक्ट्सची निवड विचारपूर्वक करत असल्याचं सांगितलं जात आहे. ‘सनकी’च्या माध्यमातून तो पुन्हा एकदा अ‍ॅक्शनप्रधान भूमिकेत दिसणार आहे.
याशिवाय अहान विक्रम भट्ट यांच्या ‘१९२० कोल्ड विंटर’ या चित्रपटातही झळकणार आहे. त्याच्या आणखी काही चित्रपटांच्या चित्रीकरणाला २०२७ मध्ये सुरुवात होण्याची शक्यता आहे. त्यामुळे आगामी काळात अहानच्या वेगवेगळ्या भूमिका प्रेक्षकांना पाहायला मिळू शकतात.
‘सनकी’ची निर्मिती वी द पीपल, रोअरिंग रिव्हर प्रॉडक्शन्स आणि पाल्स अँड पीअर्स एंटरटेनमेंट या निर्मिती संस्थांच्या माध्यमातून करण्यात येत आहे. चित्रपटाचं चित्रीकरण ३० ऑक्टोबरपासून सुरू होणार असून, तो २०२७ च्या पहिल्या सहामाहीत चित्रपटगृहांमध्ये प्रदर्शित करण्याचं नियोजन आहे.
प्रेमकथा, भावना आणि अ‍ॅक्शन यांचा मिलाफ असलेल्या या चित्रपटातून अहान शेट्टी प्रेक्षकांसमोर कोणत्या नव्या अंदाजात येतो, हे पाहणं महत्त्वाचं ठरणार आहे.
