गुरुवार, 29 ऑक्टोबर 2026
(फोटो सौजन्य- सोशल मीडिया)
Priyanka Chopra: जागतिक स्तरावर आपल्या अभिनयाचा ठसा उमटवणारी बॉलिवूडची ‘देसी गर्ल’ प्रियांका चोप्रा लग्नानंतर परदेशात स्थायिक झाली असली, तरी तिचं भारतीय संस्कृतीशी असलेलं नातं आजही कायम आहे. भारतीय सण आणि परंपरा ती तितक्याच उत्साहाने साजऱ्या करते. याचीच झलक तिच्या करवा चौथच्या तयारीतून पाहायला मिळाली आहे. प्रियांकाने तिच्या हातावरील मेहंदीचे फोटो सोशल मीडियावर शेअर केले असून, त्यावर पती निक जोनसचं नावही पाहायला मिळत आहे.
प्रियांका चोप्रा अनेकदा तिच्या कुटुंबासोबत साजऱ्या होणाऱ्या भारतीय सणांचे फोटो सोशल मीडियावर शेअर करत असते. काही दिवसांपूर्वी तिने घरी साजऱ्या केलेल्या दसरा आणि कन्या पूजनाचे फोटो पोस्ट केले होते. आता करवा चौथच्या निमित्ताने तिने इन्स्टाग्राम स्टोरीवर हातावरील मेहंदीचे फोटो शेअर केले आहेत.
परदेशात राहत असूनही भारतीय सणांशी जोडलेली राहणारी प्रियांका तिच्या चाहत्यांचं लक्ष वेधून घेत असते. तिच्या करवा चौथच्या तयारीची सोशल मीडियावरही चर्चा होत आहे.
हातावर काढली पती निक जोनसच्या नावाची मेहंदी
प्रियांकाने तिच्या हातावरील मेहंदीचा फोटो शेअर करत स्वतःच्या हाताने मेहंदी काढल्याचं सांगितलं. या फोटोसोबत तिने करवा चौथ साजरा करणाऱ्या महिलांना शुभेच्छाही दिल्या. मेहंदीच्या डिझाइनमध्ये पती निक जोनसचं नावही दिसत आहे.
तिने आणखी एका स्टोरीमध्ये मेहंदीचा क्लोज-अप फोटो शेअर केला. त्यासोबत ‘गली में आज चांद निकला’ हे गाणंही जोडलं. तसेच चंद्राच्या प्रतीक्षेबद्दल कॅप्शन देत तिने करवा चौथच्या वातावरणाची झलक दाखवली.
मेहंदीचा रंग अधिक गडद व्हावा, यासाठी प्रियांकाने एक मजेशीर प्रश्न विचारला. तिने स्टोरीमध्ये लिहिलं, ‘प्रश्न असा आहे की, साखरेचा पाक चालेल का? ज्यांना माहिती आहे, त्यांना समजेल.’
पारंपरिक पद्धतीनुसार मेहंदी सुकत असताना काही जणी तिच्यावर साखर आणि लिंबाच्या मिश्रणाचा हलका थर लावतात. यामुळे मेहंदी जास्त वेळ ओलसर राहण्यास मदत होते आणि रंग गडद होण्यास हातभार लागू शकतो.
प्रियांकाच्या या प्रश्नातून तिला मेहंदीच्या पारंपरिक पद्धतींबद्दल उत्सुकता असल्याचं दिसून येतं. तिच्या या पोस्टमुळे चाहत्यांना तिचा साधा आणि आपुलकीचा अंदाज पाहायला मिळाला आहे.
परदेशात राहूनही भारतीय संस्कृतीशी घट्ट नातं
प्रियांका चोप्रा आंतरराष्ट्रीय स्तरावर काम करत असली, तरी भारतीय सण साजरे करण्याची तिची परंपरा कायम आहे. कुटुंबासोबतचे सण, पारंपरिक विधी आणि सोशल मीडियावरील तिच्या पोस्टमधून ती भारतीय संस्कृतीशी जोडलेली असल्याचं दिसतं.
