Bhai Khulawalo Song: मालवणी ठसका अन् कोकणी-गोवन संगीताचा तडका; नितीश-रुचिराचं नवं गाणं प्रेक्षकांच्या भेटीला

Bhai Khulawalo Song: नितीश चव्हाण आणि रुचिरा जाधवच्या ‘भाई खुळावलो’ गाण्यात मालवणी ठसका, मिश्कील अंदाज आणि प्रेमात पडलेल्या भाईची भन्नाट कहाणी पाहायला मिळते.

Bhai Khulawalo Song: मालवणी भाषेचा खट्याळपणा, कोकणी-गोवन संगीताचा साज आणि प्रेमात पडलेल्या एका गावठी ‘भाई’ची मजेशीर कहाणी यांचा भन्नाट मिलाफ असलेलं ‘भाई खुळावलो’ हे नवं गाणं प्रेक्षकांच्या भेटीला आलं आहे. पूर्वा म्युझिक प्रस्तुत आणि सेव्हन सीज मोशन पिक्चर्स निर्मित या गाण्यात अभिनेता नितीश चव्हाण आणि अभिनेत्री रुचिरा जाधव प्रमुख भूमिकेत आहेत. गाणं प्रदर्शित होताच सोशल मीडियावर त्याची चर्चा रंगली आहे.

मालवणी भाषेत रंगली प्रेमकहाणी

‘भाई खुळावलो’ या गाण्यात प्रेमात पडलेल्या एका गावातील भाईची गंमतीदार कहाणी पाहायला मिळते. सुरुवातीला या गाण्याचे बोल मराठीत तयार करण्यात आले होते. मात्र, गाण्याला वेगळा आणि हटके टच देण्यासाठी त्याला मालवणी भाषेचा रंग देण्यात आला.

‘खुळावलो’ हा मालवणी भाषेतील शब्द या व्यक्तिरेखेला आणि गाण्याच्या कथेला अगदी योग्य वाटल्याने संपूर्ण गाणं मालवणी भाषेत साकारण्यात आलं आहे. मालवणी आणि कोकणी लोकसंगीतासोबत गोवन संगीताची झलकही गाण्यात पाहायला मिळते.

अकापेला पद्धतीने संगीताची सुरुवात

गाण्याचं संगीत आणि दिग्दर्शन प्रीतीश प्रकाश कामत यांनी केलं आहे. विशेष म्हणजे गाण्याच्या संगीतनिर्मितीची सुरुवात अकापेला पद्धतीने करण्यात आली. केवळ वोकल्सच्या माध्यमातून संगीताचा बेस तयार करण्यात आला आणि त्यानंतर त्यात विविध वाद्यांचा समावेश करण्यात आला.

गायक नागेश मुरवेकर यांच्या खट्याळ आणि मिश्कील आवाजामुळे गाण्याला अस्सल मालवणी रंग मिळाला आहे. स्थानिक फोक आणि तारकर्लीच्या वातावरणाशी जुळणारी संगीताची खास वाईब गाण्यात ऐकायला मिळते.

रुचिरा जाधवला समुद्राची भीती, तरीही केलं शूटिंग

गाण्याच्या चित्रीकरणादरम्यानचा एक मजेशीर किस्सा रुचिरा जाधवने सांगितला. कोकणात शूटिंग होणार असल्याने ती उत्सुक होती. मात्र, शूटिंगदरम्यान समुद्रात बुडण्याचा सीन असल्याचं समजताच तिची चिंता वाढली.

रुचिराला आधीपासूनच पाण्याची भीती असल्याने तिने ही गोष्ट टीमला सांगितली. त्यानंतर प्रोडक्शन टीमने आवश्यक सुरक्षा व्यवस्था आणि लाइफसेव्हर्सची व्यवस्था केली. त्यामुळे तिने हा सीन यशस्वीपणे पूर्ण केला.

विशेष म्हणजे या सीनमध्ये दिसणारे तिचे हावभाव खरे असल्याचं तिने सांगितलं. सकाळी ८ वाजल्यापासून दुसऱ्या दिवशी सकाळी ७ वाजेपर्यंत सुरू असलेल्या या शूटमध्ये नितीश, रुचिरा आणि संपूर्ण टीमने भरपूर धमाल केली.

 

मालवण आणि तारकर्लीत गाण्याचं चित्रीकरण

‘भाई खुळावलो’चं चित्रीकरण मालवण आणि तारकर्ली परिसरात करण्यात आलं आहे. MTDC, तारकर्ली आणि सोलकढी रेस्टॉरंट अशा ठिकाणांचा व्हिडिओमध्ये विशेष वापर करण्यात आला आहे.

नितीश चव्हाणच्या नृत्यालाही गाण्यात विशेष महत्त्व देण्यात आलं असून पुण्यकर उपाध्याय यांनी कोरिओग्राफी केली आहे. मालवणी संवाद, रंगतदार संगीत, नृत्य आणि कोकणातील सुंदर लोकेशन्स यामुळे गाण्याचा व्हिडिओ अधिक आकर्षक झाला आहे.

Drishyam 3 Cast Fees: अजय देवगणच्या मानधनाचा आकडा पाहून व्हाल थक्क! तब्बू आणि रजत कपूरची फी किती

गाण्यामागे मोठी टीम

‘भाई खुळावलो’चे गीतकार सचिन कोतुळकर, अरेंजर उदय साळवी, फिमेल व्होकल्स प्राजक्ता माने आहेत. कोरससाठी गोविंद कांबळे, विपुल कदम, श्रीकांत शिरसाट आणि प्रीतीश कामत यांनी योगदान दिलं आहे. रूपक ठाकूर यांनी मिक्सिंग आणि मास्टरिंग केलं आहे.

व्हिडिओचं दिग्दर्शन आणि एडिटिंग प्रीतीश प्रकाश कामत यांनी, तर छायांकन आणि कलरिंग शशि उपाध्याय यांनी केलं आहे. प्रॉडक्शन डिझाइनची जबाबदारी प्रवीण चिंदरकर आणि त्यांच्या टीमने सांभाळली आहे.

मालवणी भाषेतील मिश्कील अंदाज, कोकणी-गोवन संगीत, नृत्य आणि प्रेमात पडलेल्या ‘भाई’ची भन्नाट कहाणी यामुळे ‘भाई खुळावलो’ हे गाणं सध्या प्रेक्षकांचं लक्ष वेधून घेत आहे. सोशल मीडियावरही या गाण्याची चर्चा पाहायला मिळत आहे.

Ayushmann Khurrana: सात चित्रपट, सात नवे दिग्दर्शक; आयुष्मान खुरानाची हटके काम करण्याची पद्धत चर्चेत