(फोटो सौजन्य- सोशल मीडिया)
Choli Ke Peeche Controversy: दिग्दर्शक सुभाष घई यांच्या कारकिर्दीतील गाजलेल्या चित्रपटांपैकी एक म्हणजे ‘खलनायक’. १९९३ साली प्रदर्शित झालेल्या या चित्रपटात संजय दत्त, माधुरी दीक्षित आणि जॅकी श्रॉफ यांच्या प्रमुख भूमिका होत्या. चित्रपटाने बॉक्स ऑफिसवर दमदार कमाई करत मोठं यश मिळवलं. मात्र, या यशासोबतच ‘खलनायक’ला एका गाण्यामुळे मोठ्या वादालाही सामोरं जावं लागलं होतं.
माधुरी दीक्षितवर चित्रित करण्यात आलेलं ‘चोली के पीछे क्या है’ हे गाणं आजही लोकप्रिय आहे. मात्र, रिलीजच्या वेळी या गाण्यावर अश्लीलतेचा आरोप करण्यात आला होता. अनेक संघटनांनी या गाण्याला तीव्र विरोध केला होता. देशभरात आंदोलने आणि निदर्शने करण्यात आली होती. परिस्थिती इतकी गंभीर झाली होती की, चित्रपटाच्या प्रदर्शनालाच विरोध करण्यात आला होता.
अनेक वर्षांनंतर सुभाष घई यांनी या जुन्या वादाची आठवण सांगितली आहे. ‘टाइम्स नाऊ’ला दिलेल्या मुलाखतीत त्यांनी सांगितलं की, ‘खलनायक’च्या प्रदर्शनापूर्वी ३२ हून अधिक संघटनांनी चित्रपटातील गाण्याविरोधात आंदोलन केलं होतं.
सुभाष घई म्हणाले, “३२ हून अधिक संघटनांनी या गाण्याला विरोध केला. त्या सर्वांची एकच मागणी होती की ते चित्रपट प्रदर्शित होऊ देणार नाहीत. चित्रपट प्रदर्शित करण्यासाठी मी खूप संघर्ष केला. मी त्या सर्व ३२ संघटनांना भेटलो. पुणे ते दिल्लीपर्यंत आंदोलने होत होती. महिला संघटना सर्वाधिक संतप्त झाल्या होत्या.”
घई यांनी पुढे सांगितलं की, त्यांनी सर्व संघटनांना एकच विनंती केली होती—आधी चित्रपट पाहा आणि मग निर्णय घ्या. मात्र, त्या काळात प्रत्येकाचं लक्ष केवळ ‘चोली के पीछे क्या है’ या गाण्याकडे होतं.
या वादाच्या काळात शिवसेनाही चित्रपटाच्या विरोधात असल्याचं सुभाष घई यांनी सांगितलं. त्यामुळे त्यांनी थेट शिवसेनाप्रमुख बाळासाहेब ठाकरे यांची भेट घेण्याचा निर्णय घेतला.
“शिवसेनासुद्धा चित्रपटाच्या विरोधात होती. मग मी बाळासाहेब ठाकरे यांच्याकडे गेलो आणि त्यांना सांगितलं की माझा चित्रपट प्रदर्शित होणार आहे. कृपया तो एकदा बघा,” अशी आठवण घई यांनी सांगितली.
बाळासाहेब ठाकरे यांनी सुभाष घईंचा चित्रपट पाहिला. त्यानंतर दुसऱ्याच दिवशी शिवसेनेच्या ‘सामना’ या मुखपत्रात चित्रपटाबद्दल लेख प्रसिद्ध झाला. या लेखातून चित्रपटाचं कौतुक करण्यात आलं आणि ‘चोली के पीछे’ गाण्याबाबतही सकारात्मक भूमिका मांडण्यात आली.
घई यांच्या म्हणण्यानुसार, बाळासाहेबांनी त्यानंतर शिवसेनेच्या कार्यकर्त्यांना फटकारलं आणि चित्रपटाविरोधातील वातावरण बदललं. त्यामुळे ‘खलनायक’च्या प्रदर्शनाचा मार्ग मोकळा होण्यास मदत झाली.
‘चोली के पीछे क्या है’ या गाण्यावर झालेल्या वादाबाबत सुभाष घई यांची भूमिका आजही स्पष्ट आहे. ते या गाण्याला अश्लील मानत नाहीत. त्यांच्या मते, हे एक लोकगीत आहे.
गाण्याच्या प्रदर्शनापूर्वी सेन्सॉर बोर्डकडून ते कापलं जाईल, अशी भीती त्यांना होती. मात्र, तसं झालं नाही. बिहारच्या काही भागांमध्ये अशाच स्वरूपाची लोकगीतं गायली जात असल्याचंही घई यांनी सांगितलं.
आज ‘चोली के पीछे क्या है’ हे हिंदी चित्रपटसृष्टीतील सर्वाधिक चर्चेत राहिलेल्या आणि लोकप्रिय गाण्यांपैकी एक मानलं जातं. मात्र, या गाण्यामागे इतका मोठा विरोध आणि संघर्ष झाला होता, याचा खुलासा सुभाष घई यांनी अनेक वर्षांनंतर केला आहे.
.png "Videos"){kind=small}
