(फोटो सौजन्य- सोशल मीडिया)
Hanuman Ansh: सध्या बॉक्स ऑफिसवर ‘हनुमान अंश’ या चित्रपटाची जोरदार चर्चा आहे. नीम करोली बाबा यांच्या जीवनावर आधारित या सिनेमाला प्रेक्षकांकडून चांगला प्रतिसाद मिळत असून, चित्रपटाच्या कमाईतही दिवसेंदिवस मोठी वाढ होताना दिसत आहे. विशेष म्हणजे, सुरुवातीला अवघ्या काही लाखांची कमाई करणाऱ्या या सिनेमाने नंतर थेट कोटींच्या घरात मजल मारली.
यशच्या बहुचर्चित ‘टॉक्सिक’सारख्या मोठ्या बजेटच्या चित्रपटाशीही ‘हनुमान अंश’च्या कमाईची तुलना होत आहे. मात्र, या चित्रपटाची खरी कहाणी केवळ बॉक्स ऑफिसपुरती मर्यादित नाही. आता ‘हनुमान अंश’च्या शूटिंगदरम्यानचे काही खास किस्से आणि BTS व्हिडीओ समोर येत असून, चित्रपट पडद्यावर आणण्यासाठी टीमने घेतलेली मेहनत पाहून अनेकांना आश्चर्य वाटत आहे.
आता या चित्रपटाच्या शूटिंगदरम्यानचे काही BTS व्हिडीओ सोशल मीडियावर व्हायरल होत आहेत. या व्हिडीओंमधून चित्रपटाच्या चित्रीकरणासाठी टीमने केलेली मेहनत आणि सेटवरील काही खास नियम समोर आले आहेत.
‘हनुमान अंश’च्या एका BTS व्हिडीओमध्ये चित्रपटाची टीम गावात फिरताना दिसत आहे. चित्रपटातील काही दृश्यं अधिक वास्तववादी वाटावीत यासाठी गावातील स्थानिक लोकांनाच त्याचा भाग बनवण्यात आलं होतं.
दिग्दर्शक विशाल चतुर्वेदी स्वतः गावात माईकवरून लोकांना शूटिंगसाठी येण्याचं आवाहन करताना दिसतात. मोठ्या वयाच्या पुरुषांनी कुर्ता-पायजमा, धोती-कुर्ता किंवा सदरी परिधान करून यावं, तर महिलांनी साडीमध्ये सहभागी व्हावं, अशी विनंती करण्यात आली होती.
व्हिडीओमध्ये दिग्दर्शक गावकऱ्यांना सांगताना दिसतात की, चित्रपटातील एका दृश्यासाठी मोठ्या वयाच्या व्यक्तींची गरज आहे. त्यामुळे ज्यांना सहभागी व्हायचं आहे त्यांनी पारंपरिक वेशभूषेत शूटिंगसाठी यावं.
चित्रपटाच्या शूटिंगदरम्यान सेटवर काही विशेष नियमही पाळले जात होते. दिग्दर्शकांनी सांगितलं की, सेटवर कोणालाही शिवीगाळ करण्यास किंवा मोठ्या आवाजात भांडण्यास मनाई होती. याशिवाय सेटवर मांसाहार आणि मद्यपानालाही परवानगी नव्हती.
विशेष म्हणजे, शूटिंग सुरू करण्यापूर्वी आणि शक्य असल्यास शूटिंग संपल्यानंतर हनुमान चालीसाचं पठण केलं जायचं. सेटवर काही अडचणी निर्माण झाल्या किंवा शूटिंगमध्ये विलंब झाला, तर टीम हनुमान चालीसा म्हणायची.
OTT Movies: जन्माष्टमी स्पेशल! श्रीकृष्ण आणि महाभारतावर आधारित ‘हे’ खास OTT सिनेमे-शोज नक्की पाहा
नीम करोली बाबांची भूमिका साकारणारे अभिनेते शोभिनव सत्य यांनीही शूटिंगदरम्यानचा अनुभव सांगितला. त्यांच्या म्हणण्यानुसार, अनेकदा सकाळी सात वाजता कलाकार आणि टीम सेटवर पोहोचायची, मात्र काही ना काही कारणामुळे सकाळी दहापर्यंत कॅमेरा सुरू होत नसे.
अशा वेळी दिग्दर्शक टीमला हनुमान चालीसा करण्यास सांगायचे. त्यानंतर वातावरणात सकारात्मक बदल जाणवायचा आणि काम सुरळीत व्हायचं, असं त्यांनी सांगितलं.
चित्रपटाच्या प्रमोशनसाठीही निर्मात्यांनी पारंपरिक मार्केटिंगपेक्षा वेगळा मार्ग निवडला. दिग्दर्शकांच्या म्हणण्यानुसार, सुरुवातीला चित्रपटाच्या मोठ्या प्रमोशनल कॅम्पेनसाठी पुरेसा पैसा नव्हता. मात्र, नीम करोली बाबांच्या संदेशाला केंद्रस्थानी ठेवून चित्रपटाचं प्रमोशन करण्याचा निर्णय घेण्यात आला.
‘बडे मंगल’च्या आठ दिवसांमध्ये टीमने भंडारे आयोजित केले आणि लोकांना अन्न वाटप केलं. नीम करोली बाबांचा मुख्य संदेश सेवा आणि गरजू लोकांना अन्न देण्याचा होता, याच विचारातून हा उपक्रम राबवण्यात आला.
चित्रपटाचा थेट प्रचार करण्याऐवजी लोकांपर्यंत महाराजजींचा संदेश पोहोचवण्यावर भर देण्यात आला. यामुळे लोकांमध्ये चित्रपटाच्या टीमबद्दल विश्वास निर्माण झाला, असं दिग्दर्शकांनी सांगितलं.
‘हनुमान अंश’च्या शूटिंगदरम्यान घडलेला आणखी एक प्रसंग दिग्दर्शकांनी सांगितला. चित्रीकरण सुरू असताना अचानक सेटवर एक माकड आल्याचं त्यांनी सांगितलं.
नीम करोली बाबा आणि हनुमान भक्तीशी संबंधित चित्रपटाच्या सेटवर अचानक माकड येणं हा केवळ योगायोग नसून हनुमानजींचा आशीर्वाद असल्याचं दिग्दर्शकांनी मानलं. या घटनेमुळे संपूर्ण टीममध्येही विशेष भावना निर्माण झाल्या.
‘हनुमान अंश’च्या BTS व्हिडीओमधून आता या चित्रपटामागची मेहनत, श्रद्धा आणि वेगळ्या पद्धतीचं प्रमोशन प्रेक्षकांसमोर येत आहे.
.png "Videos"){kind=small}
