(फोटो सौजन्य- सोशल मीडिया)
Inshallah Movie: आलिया भट्ट आणि संजय लीला भन्साळी यांच्या आगामी ‘लव्ह अँड वॉर’ चित्रपटाची चाहते आतुरतेने वाट पाहत आहेत. ‘गंगुबाई काठियावाडी’नंतर ही जोडी पुन्हा एकदा मोठ्या पडद्यावर एकत्र येत आहे. या चित्रपटात आलिया भट्टसोबत रणबीर कपूर आणि विकी कौशल हे देखील मुख्य भूमिकेत दिसणार आहेत. त्यामुळे या त्रिकुटाला पडद्यावर पाहण्यासाठी चाहत्यांमध्ये मोठी उत्सुकता आहे.
दरम्यान, संजय लीला भन्साळी यांचा अनेक वर्षांपासून रखडलेला ‘इन्शाल्लाह’ चित्रपट पुन्हा चर्चेत आला आहे. सात वर्षांपासून रखडलेल्या या प्रोजेक्टबाबत महत्त्वाची माहिती समोर आली असून, संजय लीला भन्साळी आणि आलिया भट्ट पुन्हा एकदा या चित्रपटावर काम करण्याचा विचार करत असल्याचं वृत्त आहे. Inshallah Movie
‘मिड-डे’च्या वृत्तानुसार, आलिया भट्ट आणि संजय लीला भन्साळी यांनी ‘इन्शाल्लाह’ या रखडलेल्या चित्रपटावर पुन्हा काम करण्याचा निर्णय घेतल्याचं सांगितलं जात आहे. जवळपास सात वर्षांपूर्वी या चित्रपटावर काम सुरू करण्यात आलं होतं. मात्र, काही कारणांमुळे हा प्रोजेक्ट पुढे जाऊ शकला नाही.
आता इतक्या वर्षांनंतर या चित्रपटाला पुन्हा सुरुवात करण्याबाबत चर्चा सुरू असल्याचं वृत्त आहे. मात्र, यावेळी चित्रपटाच्या कथानकात काही महत्त्वाचे बदल केले जाण्याची शक्यता आहे.
बदलणार चित्रपटाचं कथानक?
वृत्तानुसार, ‘ Inshallah’ची मूळ कथा रोमँटिक ड्रामावर आधारित होती. मात्र, आता संजय लीला भन्साळी आणि आलिया भट्ट चित्रपटाच्या कथेत काही बदल करण्याबाबत चर्चा करत असल्याचं समोर आलं आहे.
या नव्या आवृत्तीत कथा नेमकी कशी असेल, याबाबत अद्याप अधिकृत माहिती समोर आलेली नाही. त्याचबरोबर आलिया भट्टसोबत या चित्रपटात कोणता अभिनेता मुख्य भूमिकेत असेल, हेही स्पष्ट झालेलं नाही.
सलमान खानसोबत होणार होता चित्रपट
संजय लीला भन्साळी यांनी २०१९ मध्ये ‘इन्शाल्लाह’ बनवण्याची घोषणा केली होती. त्यावेळी या चित्रपटात आलिया भट्टसोबत सलमान खान मुख्य भूमिकेत दिसणार असल्याचं सांगण्यात आलं होतं.
मात्र, सलमान खान आणि संजय लीला भन्साळी यांच्यातील मतभेदांमुळे हा चित्रपट रखडला आणि अखेर त्यावरचं काम थांबलं. त्यानंतर भन्साळींनी आलिया भट्टसोबत ‘गंगुबाई काठियावाडी’ हा चित्रपट केला. या चित्रपटाला प्रेक्षकांचा चांगला प्रतिसाद मिळाला.
जर ‘इन्शाल्लाह’ नव्या स्वरूपात पुन्हा सुरू झाला, तर आलिया भट्ट आणि संजय लीला भन्साळी यांचा हा एकत्रित तिसरा चित्रपट ठरू शकतो. याआधी दोघांनी ‘गंगुबाई काठियावाडी’मध्ये एकत्र काम केलं आहे आणि आता ‘लव्ह अँड वॉर’मध्येही ही जोडी पुन्हा एकत्र आली आहे.
मात्र, ‘इन्शाल्लाह’बाबत आलिया भट्ट किंवा संजय लीला भन्साळी यांच्याकडून अद्याप कोणतीही अधिकृत घोषणा करण्यात आलेली नाही. त्यामुळे हा प्रोजेक्ट प्रत्यक्षात पुन्हा सुरू होणार का आणि त्यात कोण कलाकार दिसणार, याकडे आता चाहत्यांचं लक्ष लागलं आहे.
.png "Videos"){kind=small}
