सोमवार, 5 ऑक्टोबर 2026
(फोटो सौजन्य- सोशल मीडिया)
Sumeet Pathak: मनोरंजनसृष्टीत असे अनेक कलाकार आहेत, ज्यांनी बालकलाकार म्हणून आपल्या अभिनयाची छाप पाडली आणि लहान वयातच प्रेक्षकांच्या मनात खास स्थान निर्माण केलं. काही कलाकार पुढेही अभिनय क्षेत्रात सक्रिय राहिले, तर काहींनी मनोरंजनसृष्टीपासून दूर जात वेगळी वाट निवडली. असाच एक अभिनेता म्हणजे सुमीत पाठक. नाव कदाचित लगेच आठवणार नाही; मात्र १९९३ सालच्या ‘बाजीगर’ चित्रपटात शाहरुख खानच्या बालपणीची भूमिका साकारणारा हा बालकलाकार अनेकांच्या स्मरणात आहे.
सुमीत पाठकने १९९२ मध्ये ‘एक लड़का एक लड़की’ या चित्रपटातून बालकलाकार म्हणून अभिनय क्षेत्रात पदार्पण केलं. त्यानंतर १९९३ मध्ये अब्बास-मस्तान दिग्दर्शित ‘बाजीगर’मध्ये त्याला शाहरुख खानने साकारलेल्या अजय मल्होत्रा या व्यक्तिरेखेच्या बालपणीची भूमिका मिळाली.
चित्रपटात सुमीतचा स्क्रीन टाइम फार मोठा नव्हता, मात्र त्याच्या प्रभावी अभिनयाने प्रेक्षकांचं लक्ष वेधून घेतलं. या भूमिकेसाठी त्याला फिल्मफेअर सर्वोत्कृष्ट बालकलाकार पुरस्कार मिळाल्याचं सांगितलं जातं.
‘बाजीगर’च्या यशानंतर सुमीतने ‘इक्के पे इक्का’, ‘राजकुमार’ आणि ‘माहीर’ यांसारख्या चित्रपटांमध्ये काम केलं. अभिनयासोबतच त्याने शिक्षण आणि प्रशिक्षणावरही लक्ष केंद्रित केलं. त्याने दिल्लीतील नॅशनल स्कूल ऑफ ड्रामामध्ये शिक्षण घेतलं असून शास्त्रीय नृत्याचंही प्रशिक्षण घेतलं.
सलमान खानच्या भावाची भूमिका
बालकलाकार म्हणून मिळालेली ओळख मोठ्या कलाकाराच्या रूपात टिकवणं सोपं नसतं. सुमीत पाठकनेही या संक्रमणाचा अनुभव घेतला. २००२ मध्ये ‘तुमको ना भूल पायेंगे’ या चित्रपटातून त्याने मोठ्या पडद्यावर पुनरागमन केलं. या चित्रपटात त्याने सलमान खानच्या भावाची भूमिका साकारली होती.
त्यानंतर २००४ मध्ये तो वत्सल सेठसोबत ‘टारझन: द वंडर कार’मध्ये दिसला. मात्र, छोट्या पडद्यावरील एका भूमिकेने त्याला विशेष लोकप्रियता मिळवून दिली.
२००५ ते २००७ या काळात हंगामा टीव्हीवरील ‘हीरो-भक्ती ही शक्ती है’ या मालिकेत सुमीतने जॉय सेहगलची भूमिका साकारली. मालिकेच्या कथेनुसार जॉयला देवी दुर्गेकडून महासत्ता प्राप्त होते आणि तो या शक्तींचा वापर वाईटाविरुद्ध लढण्यासाठी करतो.
विशेषतः लहान मुलांमध्ये आणि तरुण प्रेक्षकांमध्ये हा शो लोकप्रिय झाला. त्यामुळे सुमीत पाठकला या भूमिकेतूनही मोठी ओळख मिळाली.
पत्नी श्वेतासोबत उभारली ‘गुलमोहर मीडिया’
अभिनयासोबतच सुमीत पाठकने पडद्यामागच्या जगातही आपली वेगळी ओळख निर्माण केली. पत्नी आणि व्यावसायिक भागीदार श्वेता पाठक यांच्यासोबत त्याने ‘गुलमोहर मीडिया’ची स्थापना केली.
कंपनीने सुरुवातीला भाषा स्थानिकीकरणाच्या क्षेत्रात काम केलं. मात्र कालांतराने पोस्ट-प्रॉडक्शन आणि मीडिया टेक्नॉलॉजीच्या क्षेत्रातही कंपनीने विस्तार केला. मुंबई, बंगळुरू आणि चेन्नईसह भारतातील विविध शहरांमध्ये कंपनीचं कामकाज विस्तारलं आहे.
पारंपरिक स्टुडिओ मॉडेलच्या पलीकडे जात कंपनीने क्लाउड-आधारित एडिटिंग आणि निर्मितीचाही स्वीकार केला. त्यामुळे वेगवेगळ्या ठिकाणी काम करणाऱ्या टीम्सना एकाच प्रोजेक्टवर एकत्र काम करणं शक्य झालं.
‘सत्यमेव जयते’मुळे मिळालं मोठं व्यासपीठ
आमिर खान प्रॉडक्शन्सच्या लोकप्रिय सामाजिक कार्यक्रम ‘सत्यमेव जयते’च्या स्थानिकीकरणाचं काम गुलमोहर मीडियाने हाताळलं. या कार्यक्रमाला अनेक भाषांमधील प्रेक्षकांपर्यंत पोहोचवण्याच्या प्रक्रियेमुळे कंपनीला मोठ्या प्रमाणावर स्थानिकीकरण प्रकल्प हाताळण्याचा अनुभव मिळाला.
यानंतर कंपनीने आपली व्याप्ती आणखी वाढवली. आज गुलमोहर मीडिया केवळ भाषा स्थानिकीकरणापुरती मर्यादित नसून कंटेंट निर्मिती आणि मीडिया तंत्रज्ञान क्षेत्रातही काम करत आहे.
सुमीत पाठकचा मनोरंजन क्षेत्रातील प्रवास केवळ अभिनयापुरता मर्यादित राहिला नाही. त्यांनी व्हॉईस आर्टिस्ट म्हणूनही काम केलं आहे. ‘ऑस्वॉल्ड’, ‘पॉवर रेंजर्स’, ‘रिची रिच’ आणि ‘बेब्लेड’ यांसारख्या लोकप्रिय अॅनिमेटेड शोजसाठी त्यांनी आवाज दिला.
याशिवाय अनेक दक्षिण भारतीय चित्रपटांच्या हिंदी आवृत्त्यांमध्येही त्यांनी काम केलं. हळूहळू सुमीतने कॅमेऱ्यासमोरच्या अभिनयापासून स्वतःला दूर करत मनोरंजनाच्या पडद्यामागील क्षेत्रावर अधिक लक्ष केंद्रित केलं.
भारतीय आणि आंतरराष्ट्रीय कंटेंटवरही काम
गुलमोहर मीडियाने आता आपलं काम भारतीय बाजारपेठेपुरतं मर्यादित न ठेवता आंतरराष्ट्रीय स्तरावरही विस्तारलं आहे. आग्नेय आशियातील प्रेक्षकांपर्यंत भारतीय कंटेंट पोहोचवण्यासाठी कंपनी भारतीय अॅनिमे प्रकल्पांवर काम करत आहे. यासोबतच फ्रान्स आणि जर्मनीसारख्या देशांमधील आंतरराष्ट्रीय कंटेंटवरही कंपनी काम करत आहे.
एकेकाळी ‘बाजीगर’मध्ये शाहरुख खानच्या बालपणीची भूमिका साकारून चर्चेत आलेला सुमीत पाठक आज मनोरंजनसृष्टीच्या पडद्यामागील जगात स्वतःचा ठसा उमटवत आहे. बालकलाकारापासून अभिनेता, व्हॉईस आर्टिस्ट आणि आता मीडिया क्षेत्रातील उद्योजक असा त्यांचा प्रवास नक्कीच लक्षवेधी ठरतो.
