(फोटो सौजन्य-सोशल मिडिया)
Kapil Sharma Dubai Cafe: प्रसिद्ध कॉमेडियन कपिल शर्मा आपल्या विनोदी शैलीमुळे नेहमीच चर्चेत असतो. मात्र, यावेळी तो त्याच्या दुबईतील कॅफेमुळे चर्चेत आला आहे. कपिलने आपल्या ‘कॅप्स कॅफे’ या ब्रँडचा विस्तार करत दुबईमध्ये नवीन आउटलेट सुरू केले आहे. या कॅफेमधील आकर्षक सजावट आणि खास मेन्यूची सध्या चर्चा रंगली आहे. पण या कॅफेमधील खाद्यपदार्थांच्या किमती पाहून तुम्हालाही आश्चर्याचा धक्का बसू शकतो. कारण येथे एका कप मसाला चहासाठी तब्बल ५५० रुपये, तर पाणीपुरीसाठी ८०० रुपये मोजावे लागतात.
कपिल शर्माने गेल्या वर्षी जुलैमध्ये कॅनडामध्ये ‘कॅप्स कॅफे’चे पहिले आउटलेट सुरू केले होते. त्यानंतर ३१ डिसेंबर २०२५ रोजी दुबईतील अल किफाफ परिसरात नवीन आउटलेट सुरू करून त्याने आपल्या व्यवसायाचा विस्तार केला. अलीकडेच कॉमेडियन भारती सिंहने या कॅफेला भेट दिली. त्यानंतर कॅफेच्या सजावटीपासून तेथील मेन्यू आणि खाद्यपदार्थांच्या किमतींपर्यंत अनेक गोष्टी चर्चेत आल्या आहेत.
चहा ५५० रुपये, तर पाणीपुरी ८०० रुपयांना!
भारतात अगदी सहज उपलब्ध होणाऱ्या चहा, पाणीपुरी, डोसा यांसारख्या पदार्थांसाठी दुबईतील या कॅफेमध्ये मोठी किंमत मोजावी लागते. मेन्यूतील काही पदार्थांच्या किमती पाहून अनेकांना आश्चर्य वाटू शकते.
मसाला चहा – ₹५५०
देशी पाणीपुरी – ₹८००
डोसा – ₹७७५
आलू पराठा – ₹७००
सेव पुरी – ₹९०५
बॉम्बे सँडविच – ₹१,०३४
अ‍ॅव्होकॅडो टोस्ट – ₹१,०३४
दाल मखनी – ₹१,०३५
फ्रेंच टोस्ट – ₹१,३००
पेने पास्ता – ₹१,६०४
या मेन्यूमध्ये सर्वात स्वस्त पदार्थ एस्प्रेसो असल्याचे सांगितले जात असून त्याची किंमत ४९० रुपये आहे. तर पेने पास्ता हा सर्वात महागडा पदार्थ असल्याची माहिती समोर आली आहे. मेक्सिकन बाऊल, बटर चिकन आणि पॅनकेक्स यांसारखे पदार्थही येथे मिळतात.
कॅफेची सजावटही आहे खास
‘कॅप्स कॅफे’ची सजावट पॅरिसमधील पेस्ट्री शॉप्सपासून प्रेरित असल्याचे सांगितले जाते. फिकट गुलाबी, पांढऱ्या आणि हस्तिदंती रंगांचा वापर, पांढऱ्या संगमरवराची सजावट आणि सोनेरी रंगाचे तपशील यामुळे कॅफेला आकर्षक लूक मिळाला आहे. या सजावटीमुळे कॅफेचा परिसर फोटो आणि सोशल मीडिया पोस्टसाठीही लक्षवेधी ठरतो.
कॅफेमध्ये भारतीय तसेच आंतरराष्ट्रीय खाद्यपदार्थांची मेजवानी मिळते. मात्र, भारतीयांना परिचित असलेल्या पदार्थांच्या किमती इतर ठिकाणांच्या तुलनेत जास्त असल्याने या कॅफेचा मेन्यू चर्चेचा विषय बनला आहे.
कपिल शर्माचा ‘कॅप्स कॅफे’ ब्रँड यापूर्वी कॅनडातील आउटलेटवर झालेल्या गोळीबाराच्या घटनांमुळेही चर्चेत आला होता. उपलब्ध वृत्तांनुसार, कॅफे सुरू झाल्यानंतर गोळीबाराची घटना घडली होती. त्यानंतर ऑगस्टमध्ये आणखी एक हल्ला झाला, तर ऑक्टोबरमध्ये धावत्या वाहनातून करण्यात आलेल्या गोळीबारात कॅफेच्या समोरील काचेचे नुकसान झाले होते.
काही वृत्तांमध्ये या घटनांचा संबंध लॉरेन्स बिश्नोई टोळीशी जोडण्यात आला होता. मात्र, या दाव्यांची स्वतंत्रपणे पुष्टी झालेली नाही. या घटनांमध्ये कोणीही जखमी झाल्याचे वृत्त नव्हते.
नोव्हेंबरमध्ये ‘किस किसको प्यार करूँ २’ या चित्रपटाच्या प्रमोशनदरम्यान कपिल शर्माला या घटनांबद्दल विचारण्यात आले होते. त्यावेळी त्याने कॅफेला मिळणाऱ्या प्रतिसादाबद्दल सकारात्मक प्रतिक्रिया दिली होती. “प्रत्येक गोळीबाराच्या घटनेनंतर कॅफेला पूर्वीपेक्षा चांगला प्रतिसाद मिळाला आहे. त्यामुळे, जर देव माझ्या पाठीशी असेल, तर सर्व काही ठीक आहे,” असे कपिलने म्हटले होते.
दरम्यान, कपिल शर्मा सध्या नेटफ्लिक्सवरील ‘द ग्रेट इंडियन कपिल शो’मधून प्रेक्षकांचे मनोरंजन करत आहे. एकीकडे त्याच्या शोची चर्चा असताना दुसरीकडे दुबईतील कॅफेमधील महागड्या मेन्यूने सर्वांचे लक्ष वेधून घेतले आहे.
.png "Videos"){kind=small}
