(फोटो सौजन्य -सोशल मीडिया)
Afara Tafari Marathi Movie: पैशांसाठी माणूस काहीही करू शकतो, या गंमतीदार झलक दाखवणारा चित्रपट लवकरच प्रेक्षकांच्या भेटीला येणार आहे. नुकताच ‘अफरातफरी’ या मराठी चित्रपटाचा टीझर प्रदर्शित झाला आहे. या चित्रपटाचा टीझर पाहून प्रेक्षकांची उत्सुकता शिगेला पोहोचली आहे. या चित्रपटाच्या टीझरमधून शशांक शेंडे, संजय नार्वेकर आणि ओंकार भोजने या तीन भावांची भन्नाट केमिस्ट्री पाहायला मिळत असून, त्यांच्या वडिलांनी काढलेली एक खास पॉलिसी आणि त्यातून मिळणाऱ्या तब्बल एक कोटी रुपयांभोवती फिरणारा गोंधळ चित्रपटात पाहायला मिळणार आहे.
मिलिंद झुंबर कवडे दिग्दर्शित हा चित्रपट अ स्कायलाइन सिनेमॅटिक आणि येन मुव्ही स्टुडिओज प्रस्तुत करत असून, आऊट ऑफ द बॉक्स फिल्म्सच्या सहयोगाने हा चित्रपट प्रेक्षकांच्या भेटीला येणार आहे. ‘अफरातफरी’ येत्या ९ ऑक्टोबरला चित्रपटगृहात प्रदर्शित होणार आहे.
टीझरमध्ये शशांक शेंडे, संजय नार्वेकर आणि ओंकार भोजने हे तीन भाऊ दिसतात. त्यांच्या वडिलांनी अशी पॉलिसी काढलेली असते, ज्यानुसार त्यांचा अपघाती मृत्यू झाल्यास तिन्ही मुलांना एक कोटी रुपये मिळणार असतात.
वडिलांच्या मृत्यूनंतर मिळणाऱ्या या मोठ्या रकमेभोवती तिन्ही भावांच्या विचारांची चक्रं फिरताना दिसतात. एक कोटी रुपये मिळवण्यासाठी या तिघांच्या मनात नेमकं काय सुरू आहे? हा प्रश्न टीझरमधून निर्माण होतो.
विशेष म्हणजे, टीझरमध्ये तात्यांचा अपघात होताना दिसतो आणि त्यानंतरच्या दृश्यात त्यांच्या फोटोला हार घातलेला पाहायला मिळतो. त्यामुळे तात्यांचा खरंच अपघाती मृत्यू झाला आहे का? त्यांच्या मृत्यूनंतर तीन भावांना एक कोटी रुपये मिळणार का? आणि या पैशांसाठी या तिघांकडून नेमकी कोणती ‘अफरातफरी’ घडणार? असे अनेक प्रश्न टीझर पाहिल्यानंतर प्रेक्षकांच्या मनात निर्माण होतात.
पैशांचे आमिष, तीन भावांची धावपळ आणि त्यातून निर्माण होणाऱ्या गंमतीदार परिस्थितीभोवती ‘अफरातफरी’ची कथा फिरताना दिसते. त्यामुळे हा चित्रपट प्रेक्षकांना भरभरून मनोरंजनाची मेजवानी देणार असल्याचे टीझरवरून स्पष्ट होते.
दमदार कलाकारांची फौज
‘अफरातफरी’मध्ये मोहन आगाशे, शशांक शेंडे, संजय नार्वेकर, ओंकार भोजने, नेहा खान, प्राजक्ता हनमघर, आसावरी जोशी, हेमंत पाटील, किरण माने आणि कुणाल मेश्राम यांच्या प्रमुख भूमिका आहेत. दमदार कलाकारांची फौज आणि पैशांभोवती फिरणारी विनोदी कथा यामुळे चित्रपटाबाबतची उत्सुकता वाढली आहे.
“प्रेक्षकांची उत्सुकता चित्रपट पाहताना अधिक वाढेल”
चित्रपटाचे दिग्दर्शक मिलिंद झुंबर कवडे म्हणाले, “‘अफरातफरी’ची कथा ही पैशांच्या हव्यासातून निर्माण होणाऱ्या गंमतीदार परिस्थितीभोवती फिरणारी आहे. एका पॉलिसीमुळे तीन भावांच्या आयुष्यात कोणता गोंधळ निर्माण होतो, याची छोटीशी झलक टीझरमधून दाखवली आहे.”
पुढे ते म्हणाले, “शशांक शेंडे, संजय नार्वेकर आणि ओंकार भोजने या तिघांची केमिस्ट्री आणि त्यांच्यातून निर्माण होणारे मजेशीर प्रसंग हे या चित्रपटाचं खास आकर्षण आहे. टीझर पाहून प्रेक्षकांच्या मनात निर्माण झालेले प्रश्न आणि उत्सुकता चित्रपट पाहताना नक्कीच अधिक वाढेल.”
आता एक कोटींची पॉलिसी, तीन भाऊ आणि त्यातून होणारी ‘अफरातफरी’ नेमकी किती मनोरंजक ठरणार, हे ९ ऑक्टोबरला चित्रपटगृहातच पाहायला मिळणार आहे.
.png "Videos"){kind=small}
