(फोटो सौजन्य- सोशल मीडिया)
अश्विनी भावे सध्या अमेरिकेत वास्तव्यास आहेत. कामानिमित्त त्या भारतात येत असतात. अमेरिकेतील घराजवळ त्यांनी ‘The Green Door’ नावाने सुंदर बाग फुलवली आहे. या बागेत विविध प्रकारच्या भाज्या आणि फळभाज्यांची लागवड केली जाते.
याच बागेची खास झलक पाहण्यासाठी ‘असेन मी नसेन मी’ नाटकाची टीम अश्विनी भावेंच्या घरी पोहोचली. ज्येष्ठ अभिनेत्री नीना कुलकर्णी यांना विशेषतः अश्विनींचं ‘Green Door’ पाहायचं होतं. त्यामुळे या भेटीत बागेची सफर हा खास आकर्षणाचा भाग ठरला.
अश्विनी भावे यांनी इन्स्टाग्रामवर शेअर केलेल्या व्हिडीओमध्ये त्यांच्या चेहऱ्यावरचा आनंद स्पष्ट दिसतो. व्हिडीओच्या सुरुवातीला त्या आपल्या लाडक्या मैत्रिणी आणि नाटकाची टीम घरी डिनरसाठी येणार असल्याचं सांगतात.
“आज माझ्या मैत्रिणी माझ्या घरी येणार आहेत. अमृता सुभाष, नीना कुलकर्णी, शुभांगी गोखले यांच्यासह संदेश कुलकर्णी… ‘असेन मी नसेन मी’ या नाटकाची टीम माझ्या घरी आज डिनरसाठी येणार आहे,” असं अश्विनी म्हणतात.
पुढे त्या म्हणतात, “आपली माणसं जेव्हा घरी येतात, तेव्हा खरंच खूप आनंद होतो. पण ज्यावेळेला कुणी मला सांगतं की, तुझं ‘Green Door’ पाहायला मला यायचंय, तेव्हा मग एकदम धडकी भरते… कारण तुम्ही सगळे माझ्या ‘Green Door’वर इतकं प्रेम करता.”
अश्विनी भावे पुढे सांगतात की, नीना कुलकर्णी यांना त्यांची बाग खास पाहायची होती. “मला खूप समाधान वाटतं. आज नीना ताईंना खास ‘Green Door’ पाहायचं होतं. तिला माझ्या बागेत फिरताना आनंद मिळेल, अशी आशा आहे,” असं त्या म्हणाल्या.
यानंतर अश्विनी भावे यांनी आपल्या बागेतील विविध ताज्या भाज्या कलाकारांना दाखवल्या. काकडी, स्वीट टोमॅटो आणि इतर फ्रेश फळभाज्यांची त्यांनी सर्वांना ओळख करून दिली.
बागेतील ताजे स्वीट टोमॅटो पाहून नीना कुलकर्णी आणि अमृता सुभाष यांनी ते चाखूनही पाहिले. ताज्या टोमॅटोची चव घेतल्यानंतर “हे टोमॅटो आउटस्टँडिंग आहेत,” असं म्हणत दोघींनी अश्विनी भावेंचं कौतुक केलं.
अमेरिकेत राहूनही अश्विनी भावे यांनी बागकामाची आवड जपत आपल्या घराच्या परिसरात अशी हिरवीगार बाग फुलवली आहे. त्यासाठी त्यांनी घेतलेली मेहनत पाहून नाटकाच्या टीममधील कलाकारही भारावून गेले.
अश्विनी भावे यांनी शेअर केलेल्या या व्हिडीओवर नेटकऱ्यांनीही भरभरून प्रतिक्रिया दिल्या आहेत. अनेकांनी त्यांच्या साधेपणाचं, प्रेमळ स्वभावाचं आणि सुंदर बागेचं कौतुक केलं.
“अश्विनी ताई खूप प्रेमळ आणि निरागस आहेत,” “सुंदर… एक शब्द आठवतो,” “ताई, बाग खूप सुंदर आहे,” “ही आमची मराठी माणसं… सर्वांशी बोलून-चालून राहतात,” “जराही मोठेपणा नाही,” अशा अनेक कमेंट्स चाहत्यांनी केल्या आहेत.
अश्विनी भावे यांच्या ‘Green Door’ची ही झलक पाहून चाहत्यांनाही त्यांच्या या अनोख्या छंदाची ओळख झाली आहे. परदेशात राहूनही आपल्या मातीशी आणि निसर्गाशी जोडलेलं नातं त्यांनी जपल्याचं या व्हिडीओतून पुन्हा एकदा दिसून आलं.
.png "Videos"){kind=small}
