Bandhu Marathi Movie: प्रेम, जिव्हाळा आणि त्यागाची कहाणी; ‘बंधू’ चित्रपटाचा दमदार ट्रेलर प्रदर्शित

Bandhu Marathi Movie: दोन भावांमधील प्रेम, मतभेद, दुरावा आणि त्यागाची हृदयस्पर्शी गोष्ट सांगणाऱ्या ‘बंधू’ या आगामी मराठी चित्रपटाचा ट्रेलर प्रदर्शित झाला आहे. उपेंद्र लिमये आणि जितेंद्र जोशी यांच्या प्रमुख भूमिका असलेला हा चित्रपट २० नोव्हेंबरला चित्रपटगृहांत दाखल होणार आहे.

• दोन भावांच्या नात्याची हळवी गोष्ट!
• ‘बंधू’ चित्रपटाचा दमदार ट्रेलर प्रदर्शित
• ‘बंधू’ चित्रपट २० नोव्हेंबरला प्रेक्षकांच्या भेटीला

Bandhu Marathi Movie: भाऊ-भावामधील नातं हे प्रेम, जिव्हाळा, मतभेद आणि त्याग अशा अनेक भावनांनी गुंफलेलं असतं. कधी भांडणं, कधी रुसवे-फुगवे, तर कधी एकमेकांच्या आनंदासाठी स्वतःच्या इच्छा बाजूला ठेवणं, हे या नात्याचे वेगवेगळे पैलू असतात. याच अतूट भावबंधांची हृदयस्पर्शी गोष्ट घेऊन येणाऱ्या ‘बंधू’ या आगामी मराठी चित्रपटाचा दमदार ट्रेलर प्रेक्षकांच्या भेटीला आला आहे.(Bandhu Marathi Movie)

गीतकार गुरु ठाकूर यांच्या शब्दांतून व्यक्त झालेलं ‘भाऊ काय, बंधू काय… जणू दूध आणि साय!’ हे नातं ट्रेलरमधून उलगडताना दिसतं. उपेंद्र लिमये आणि जितेंद्र जोशी यांच्या दमदार अभिनयाची झलक असलेला हा ट्रेलर दोन भावांमधील प्रेम, मतभेद आणि भावनिक गुंतागुंत दाखवतो. ट्रेलर प्रदर्शित झाल्यानंतर अवघ्या काही तासांतच सोशल मीडियावर त्याला जोरदार प्रतिसाद मिळाला असून, तो ट्रेंडिंगमध्येही आला आहे.

‘पंजाबी लोकांना लढायला शिकवू नका’; CJP आंदोलनावरून दिलजीत दोसांझ चर्चेत! समाजाबद्दलच्या वक्तव्यावर अभिजीत दिपके काय म्हणाले?

दमदार कलाकारांची फळी

रजत बेदी प्रस्तुत, जे एस् डी स्टुडिओ आणि ट्राईफ्लिक्स एंटरटेनमेंट यांच्या सहकार्याने हा चित्रपट साकारला आहे. प्रणव देसाई, जुही देसाई आणि कुलदीप सुनील ओझा यांनी चित्रपटाची निर्मिती केली आहे. लेखन, संवाद आणि दिग्दर्शनाची जबाबदारी नितीन सिंधूविजय सुपेकर यांनी सांभाळली आहे.

‘आटपाडी नाईट्स’ आणि ‘सरला एक कोटी’ या चित्रपटांनंतर नितीन सुपेकर पुन्हा एकदा मानवी नात्यांच्या भावविश्वाचा वेध घेणारी कथा घेऊन प्रेक्षकांसमोर येत आहेत. उपेंद्र लिमये आणि जितेंद्र जोशी यांच्यासोबत मिताली जगताप आणि मृण्मयी देशपांडे महत्त्वाच्या भूमिकांत दिसणार आहेत. रेणुका दफ्तरदार, स्मिता तांबे, श्रीकांत यादव, विठ्ठल काळे, यशपाल सरणात, ज्ञानरत्न अहिवळे, चैतन्य सोलणकर, श्रीपाद पानसे यांच्यासह अनेक कलाकार या चित्रपटात आहेत.

संगीताचीही सुरेल साथ

चित्रपटातील गीतांना गुरु ठाकूर आणि वैभव देशमुख यांनी शब्दबद्ध केले असून, विजय नारायण गवंडे यांनी संगीत दिले आहे. अजय गोगावले, अतुल गोगावले, अमिता घुगरी आणि शमिका भिडे यांच्या आवाजाने गाण्यांना सुरेल साथ लाभली आहे. गाण्यांचे संगीत हक्क झी म्युझिककडे आहेत.

‘बंधू’च्या ट्रेलर लाँच सोहळ्याला केंद्रीय राज्यमंत्री आणि खासदार रामदास आठवले यांनी विशेष उपस्थिती दर्शवली. त्यांनी ट्रेलरचे कौतुक करत संपूर्ण टीमला चित्रपटाच्या यशासाठी शुभेच्छा दिल्या. प्रेम, जिव्हाळा आणि त्यागाची जाणीव करून देणारा ‘बंधू’ हा चित्रपट २० नोव्हेंबरला चित्रपटगृहांत प्रदर्शित होणार आहे.

Avinash Narkar emotional video : ‘हे होतं रिल,आता रिअल मध्ये सांगतो’; अविनाश नारकरांचा भावनिक व्हिडिओमागचं सत्य उघड