( फोटो सौजन्य- सोशल मिडिया)
Devghar On Rent Marathi Movie:अध्यात्म, रहस्य, थरार आणि ॲक्शन यांचा अनोखा मिलाफ असलेला आगामी मराठी चित्रपट ‘देवघर ऑन रेंट’ सध्या चर्चेत आहे. चित्रपटाचा ट्रेलर नुकताच मुंबईत लाँच करण्यात आला असून, त्यातून गूढ आणि थरारक कथानकाची झलक पाहायला मिळत आहे. विशेष म्हणजे ‘देवघर’ आणि ‘रेंट’ या दोन शब्दांमागे नेमकं कोणतं गूढ दडलं आहे? याची उत्सुकता ट्रेलरमुळे वाढली आहे.
‘देवघर ऑन रेंट’ हा चित्रपट २५ सप्टेंबर २०२६ रोजी महाराष्ट्रासह बेळगाव, हैदराबाद, इंदोर आणि बडोदा येथे प्रदर्शित होणार आहे.
ट्रेलरच्या सुरुवातीपासूनच चित्रपटातील गूढ वातावरणाची जाणीव होते. अर्थपूर्ण संवाद, संशयास्पद घटना आणि व्यक्तिरेखांमधील संघर्ष कथानकातील उत्कंठा वाढवतात. पोलीस तपास, गुन्हेगारी जगत आणि एका रहस्यमय देवघराभोवती घडणाऱ्या घटनांची गुंफण ट्रेलरमध्ये पाहायला मिळते.
चित्रपटात केवळ रहस्य आणि थरार नाही, तर भावनिक पदरही असल्याचे ट्रेलरमधून संकेत मिळतात. देवघराच्या परिसरातील आध्यात्मिक संदर्भ आणि अनाकलनीय घटनांमुळे कथा नेमकी कोणत्या वळणावर जाणार, याची उत्सुकता निर्माण झाली आहे.
‘देवघर ऑन रेंट’मध्ये ॲक्शन सीक्वेन्सलाही विशेष महत्त्व देण्यात आलं आहे. पाठलाग, हाणामारी आणि संघर्षाची झलक ट्रेलरमध्ये पाहायला मिळते. दाक्षिणात्य शैलीच्या ॲक्शनचा वापर करत चित्रपटाचा आवाका भव्य करण्याचा प्रयत्न करण्यात आला आहे.
या चित्रपटात निखिल चव्हाण, अंकित मोहन, भाऊ कदम, शशांक शेंडे, अश्विनी चवरे, वैभव चव्हाण, सुरेश विश्वकर्मा, अनिल नागरकर, सिद्धेश्वर झाडबुके आणि गौतमी पाटील यांच्या भूमिका आहेत.
याशिवाय ‘KGF’ फेम गरुडा राम आणि श्रवण राघवेंद्र हे दाक्षिणात्य कलाकारही महत्त्वाच्या भूमिकांमध्ये दिसणार आहेत. त्यामुळे मराठी कलाकारांसोबत दाक्षिणात्य कलाकारांची जोडी चित्रपटात पाहायला मिळणार आहे.
सचिन रोडे पाटील आणि पूनम चौधरी पाटील यांची निर्मिती
आनंदी पिक्चर्स अमरावती प्रस्तुत आणि राधाकृष्ण प्रोडक्शन निर्मित या चित्रपटाची निर्मिती सचिन रोडे पाटील आणि पूनम चौधरी पाटील यांनी केली आहे. दिग्दर्शन स्वरूप सावंत यांनी केलं आहे. चित्रपटाची संकल्पना पूनम चौधरी पाटील यांची असून कथा, पटकथा आणि संवादलेखन संजय नवगिरे यांनी केलं आहे.
चित्रपटासाठी संगीतकार एस. सागर आणि कबीर शाक्य यांनी संगीत दिलं आहे. कोरिओग्राफी किशोर दळवी यांनी केली असून, डीओपी चैतन्य साळुंके यांनी सिनेमॅटोग्राफीची जबाबदारी सांभाळली आहे. रोहित नागभीडे यांनी पार्श्वसंगीत केलं आहे.
चित्रपटातील ॲक्शन सीक्वेन्सची जबाबदारी राकेश पाटील आणि कार्तिक डंगरी यांनी सांभाळली आहे. कला दिग्दर्शन दिलीप कंधारे, वेशभूषा अपेक्षा गांधी सोनी आणि रंगभूषा सुजीत सुरवसे यांनी केली आहे.
कार्यकारी निर्माते अनुनेहा घोडके आणि निर्मिती व्यवस्थापक यश सणस आहेत. अक्षय लोणदे यांनी सिंक साऊंड, शर्मा यांच्या टीमने प्रकाशयोजना, तर विजय म्हस्के यांनी प्रॉडक्शन हेड म्हणून काम पाहिलं आहे.
आता २५ सप्टेंबरला ‘देवघर ऑन रेंट’ प्रेक्षकांच्या भेटीला येणार असून, अध्यात्म, रहस्य, थरार आणि ॲक्शन यांचं हे मिश्रण प्रेक्षकांना कसं भावतं, हे पाहणं उत्सुकतेचं ठरणार आहे.
.png "Videos"){kind=small}
