Lagna Ani Barach Kahi: ‘लग्न आणि बरंच काही’चा नवा अंदाज; सुनेत्रा पवारांच्या हस्ते पोस्टर अनावरण

Lagna Ani Barach Kahi: ‘लग्न आणि बरंच काही’ या आगामी मराठी चित्रपटाचे पोस्टर सुनेत्रा पवार आणि अदिती तटकरे यांच्या हस्ते मंत्रालयात अनावरण झाले. पूजा सावंत आणि अक्षया नाईक प्रमुख भूमिकेत दिसणार आहेत.

Lagna Ani Barach Kahi: मराठी चित्रपटसृष्टीत सध्या आशयपूर्ण आणि वेगळ्या विषयांवरील चित्रपटांना प्रेक्षकांची पसंती मिळत आहे. अशाच एका वेगळ्या विषयाची मांडणी करणारा ‘लग्न आणि बरंच काही’ हा आगामी मराठी चित्रपट लवकरच प्रेक्षकांच्या भेटीला येणार आहे. स्त्रीचे भावविश्व, लग्नानंतर बदलणारी नाती, वाढणाऱ्या जबाबदाऱ्या आणि स्वतःची ओळख जपण्याचा तिचा प्रवास या चित्रपटातून मांडण्यात आला आहे. नुकतेच या चित्रपटाच्या पोस्टरचे मंत्रालयात अनावरण करण्यात आले.

उपमुख्यमंत्री सुनेत्रा पवार आणि महिला व बालविकास मंत्री अदिती तटकरे यांच्या हस्ते ‘लग्न आणि बरंच काही’च्या पोस्टरचे अनावरण झाले. यावेळी त्यांनी चित्रपटाच्या संपूर्ण टीमचे अभिनंदन करत आगामी वाटचालीसाठी शुभेच्छा दिल्या. पोस्टर अनावरणामुळे चित्रपटाच्या आशयासोबतच त्यामागील महिला नेतृत्वाचीही चर्चा सुरू झाली आहे.

तीन पिढ्यांतील महिलांना जोडणारी कथा

म्हाळसा एंटरटेन्मेंटच्या डॉ. संजना सुरेश पै आणि अव्यान आर्ट्सच्या अंजली तुषार नान्नजकर यांच्या निर्मितीतील या चित्रपटाचे दिग्दर्शन वेदांती दाणी यांनी केले आहे.

चित्रपटाच्या विषयाचे कौतुक करताना अदिती तटकरे यांनी मुलीच्या जन्मापासून तिचे बालपण, तारुण्य आणि पुढील आयुष्यापर्यंतच्या विविध अनुभवांकडे वेगळ्या दृष्टिकोनातून पाहण्याचा प्रयत्न या चित्रपटातून करण्यात आल्याचे नमूद केले. आजी, आई, सध्याची पिढी आणि पुढील पिढी अशा तीन पिढ्यांतील महिलांना हा विषय जोडणारा ठरेल, असा विश्वासही त्यांनी व्यक्त केला.

तसेच, हा चित्रपट केवळ महिलांसाठीच नाही, तर पुरुषांनाही नातेसंबंध आणि आयुष्याकडे पाहण्याचा नवा दृष्टिकोन देईल, असेही त्यांनी सांगितले.

लग्नापलीकडचा स्त्रीचा प्रवास

‘लग्न’ ही केवळ आयुष्यातील एक घटना नसून त्यानंतर स्त्रीच्या आयुष्यात अनेक बदल घडतात. बदलती नाती, वाढणाऱ्या जबाबदाऱ्या, स्वतःच्या इच्छा-आकांक्षा आणि स्वप्नांकडे पाहण्याचा दृष्टिकोन या सगळ्याचा संवेदनशील वेध ‘लग्न आणि बरंच काही’ या चित्रपटातून घेतला जाणार आहे.

विशेष म्हणजे चित्रपटाच्या पडद्यामागील निर्मितीमध्येही महिलांचा मोठा सहभाग आहे. चित्रपटाचे संगीत वैशाली सामंत, छायाचित्रण स्मिता निर्मळ, संकलन भक्ती मायाळू, संवाद शर्वरी पेटकर, कथा यशश्री मसूरकर, तर वेशभूषेची जबाबदारी अपेक्षा गांधी सोनी यांनी सांभाळली आहे.

याशिवाय मीडिया दिग्दर्शन प्रज्ञा सुमती, डिजिटल मार्केटिंग अश्मिकी टिळेकर आणि पब्लिसिटी डिझाइन प्राजक्ता डोंगरे यांनी केले आहे.

The Revolutionaries: १८५७ नंतरच्या भारतातील क्रांतिकारकांची कहाणी; ‘द रेव्होल्यूशनरीज’चा २४० हून अधिक देशांत प्रीमियर

पूजा सावंत आणि अक्षया नाईक प्रमुख भूमिकेत

अभिनेत्री पूजा सावंत आणि अक्षया नाईक या चित्रपटात महत्त्वाच्या भूमिकांमध्ये दिसणार आहेत. त्यामुळे त्यांच्या अभिनयातून स्त्रीच्या आयुष्यातील नातेसंबंध आणि भावनिक पैलू कशा पद्धतीने मांडले जातात, याची उत्सुकता प्रेक्षकांना आहे.

मंत्रालयात पोस्टर अनावरण झाल्यानंतर ‘लग्न आणि बरंच काही’च्या कथानकाबाबत प्रेक्षकांची उत्सुकता आणखी वाढली आहे. स्त्रीच्या दृष्टिकोनातून लग्न, नाती, जबाबदाऱ्या, आकांक्षा आणि स्वतःची ओळख यांचा वेध घेणारा हा चित्रपट प्रेक्षकांना काय अनुभव देतो, हे पाहणे महत्त्वाचे ठरणार आहे.

Hiten Tejwani: हितेन तेजवानीची मराठी चित्रपटसृष्टीत दमदार एन्ट्री, साकारणार आजवरची सर्वात वेगळी भूमिका!