( फोटो सौजन्य- सोशल मीडिया)
Maitreya Marathi Movie: सर्वांच्या लाडक्या गणपती बाप्पाच्या आगमनाला आता काहीच दिवस शिल्लक आहेत. त्यामुळे सर्वत्र गणेशोत्सवाची तयारी आणि भक्तीमय वातावरण पाहायला मिळत आहे. याच उत्साहात भर घालणारं ‘तुझे नाव घेता’ हे बहारदार गणपती गीत नुकतंच प्रेक्षकांच्या भेटीला आलं आहे. आगामी ‘मैत्रेया’ चित्रपटातील हे गाणं सध्या चर्चेत असून, ढोल-ताशांचा जल्लोष, भक्तीमय वातावरण आणि धमाकेदार नृत्य यामुळे गाण्याने प्रेक्षकांचं लक्ष वेधून घेतलं आहे.
‘तुझे नाव घेता’ हे गाणं समर, आयुषी, स्काय आणि रूची यांच्यावर चित्रीत करण्यात आलं आहे. गणपती उत्सवाचा जल्लोष, कलाकारांचा उत्साह आणि दमदार बीट्स यामुळे गाण्याला खास फेस्टिव्ह रंग आला आहे.
या गाण्यात प्रेक्षकांना एक खास सरप्राईजही पाहायला मिळतं. दिग्दर्शिका क्रांती रेडकर वानखेडे आणि अभिनेत्री उर्मिला कानेटकर या दोघींची खास नृत्य अदाकारी गाण्यात पाहायला मिळणार आहे. अनेक काळानंतर या दोघींना एकत्र नृत्य करताना पाहण्याची संधी मिळणार असल्याने गाण्याची रंगत आणखी वाढली आहे.
‘तुझे नाव घेता’ या गाण्याला गुरू ठाकूर यांचे शब्द लाभले असून पंकज पडघन यांनी संगीत दिलं आहे. तर शिवम सिंग आणि अपूर्वा निषाद यांच्या दमदार आवाजात हे गाणं स्वरबद्ध करण्यात आलं आहे.
गणपती बाप्पाच्या भक्तीचा भाव आणि उत्सवाचा जल्लोष यांचा सुंदर मेळ या गाण्यात साधण्यात आला आहे. आकर्षक नृत्य, दमदार संगीत आणि कलाकारांचा उत्साह यामुळे गणेशोत्सवाच्या वातावरणात हे गाणं रंग भरणार असल्याचं दिसत आहे.
गाण्याबद्दल दिग्दर्शिका क्रांती रेडकर वानखेडे म्हणाली, “गणपती बाप्पा आणि मराठी माणसाचं नातं खूप खास आहे. त्यामुळे ‘तुझे नाव घेता’ हे गाणं करताना त्यात भक्ती तर असावीच, परंतु त्याचबरोबर गणपतीच्या उत्सवाचा आनंद, उत्साह आणि जल्लोषही दिसावा, अशी आमची इच्छा होती.”
ती पुढे म्हणते, “पंकज पडघन यांचं संगीत, गुरू ठाकूर यांचे शब्द आणि शिवम सिंग व अपूर्वा निषाद यांचे आवाज यामुळे गाणं खूप सुंदर जमून आलं आहे. उर्मिला आणि मी अनेक काळानंतर एकत्र नृत्य करताना दिसणार आहोत, हा माझ्यासाठीही खास अनुभव आहे.”
संगीतकार पंकज पडघन यांच्या मते, गाण्यात गणपती बाप्पाच्या भक्तीचा भाव आणि उत्सवाचा जल्लोष या दोन्ही गोष्टी संगीतामधून जाणवाव्यात, यासाठी पारंपरिकतेसोबत आजच्या पिढीलाही आवडेल असा उत्साहपूर्ण साउंड ठेवण्यात आला आहे.
क्रांती रेडकर आणि उर्मिला कानेटकर यांच्या नृत्याची खास झलक हे गाण्याचं आणखी एक आकर्षण ठरणार आहे. त्यामुळे गणेशोत्सवाच्या पार्श्वभूमीवर हे गाणं प्रेक्षकांना नक्कीच भावेल, अशी अपेक्षा व्यक्त केली जात आहे.
Sayani Gupta: सायानी गुप्ताच्या ‘आसमानी’ची जगभरात भरारी; दोन महिन्यांत १० फिल्म फेस्टिव्हलमध्ये निवड
‘मैत्रेया’ २३ ऑक्टोबरला प्रेक्षकांच्या भेटीला
समर टाईम्स प्रॉडक्शन प्रस्तुत ‘मैत्रेया’ या चित्रपटाचं लेखन आणि दिग्दर्शन क्रांती रेडकर वानखेडे यांनी केलं आहे. मनोज खळतकर हे चित्रपटाचे निर्माते असून अमन खळतकर सहनिर्माते आहेत.
चित्रपटात समर, आयुषी, स्काय आणि रूची यांच्या प्रमुख भूमिका आहेत. ‘तुझे नाव घेता’ या गाण्यामुळे चित्रपटाची उत्सुकता आणखी वाढली असून, ‘मैत्रेया’ येत्या २३ ऑक्टोबरला प्रेक्षकांच्या भेटीला येणार आहे.
.png "Videos"){kind=small}
