(फोटो सौजन्य- सोशल मीडिया)
Miranda Warning movie: मालिका आणि चित्रपटांमधील अभिनयातून घराघरात पोहोचलेली अभिनेत्री जान्हवी किल्लेकर आता एका वेगळ्या आणि रंजक भूमिकेतून प्रेक्षकांच्या भेटीला येणार आहे. जान्हवी आगामी ‘मिरांडा वॉर्निंग’ या सस्पेन्स थ्रिलर चित्रपटात महत्त्वाची भूमिका साकारत आहे. नुकताच या चित्रपटातील तिचा लूक समोर आला असून, त्याने चित्रपटाबद्दलची उत्सुकता आणखी वाढवली आहे.
‘मिरांडा वॉर्निंग’च्या नव्या पोस्टरमध्ये जान्हवी किल्लेकरचा वेगळा अंदाज पाहायला मिळत आहे. तिच्या चेहऱ्यावरील भाव आणि नजर अनेक प्रश्न निर्माण करणारी आहे. त्यामुळे चित्रपटातील तिची भूमिका नेमकी काय आहे, याबद्दल प्रेक्षकांमध्ये उत्सुकता निर्माण झाली आहे.
२७ नोव्हेंबर रोजी हा चित्रपट सर्वत्र प्रदर्शित होणार आहे. त्यामुळे जान्हवीच्या भूमिकेभोवती असलेलं गूढ चित्रपट प्रदर्शित झाल्यानंतरच उलगडणार आहे.
फार्महाऊसवरील खुनाच्या घटनेभोवती फिरणार कथा
‘मिरांडा वॉर्निंग’ची कथा हेरिटेजवाडी नावाच्या फार्महाऊसवर घडलेल्या खुनाच्या घटनेभोवती फिरते. या घटनेनंतर सुरू होणाऱ्या थरारक शोधात अनेक रहस्यं उलगडत जातील. या तपासादरम्यान नेमकं काय घडतं, हे चित्रपटातून पाहायला मिळणार आहे.
या चित्रपटात आदिनाथ कोठारे एका रफटफ पोलिस अधिकाऱ्याच्या भूमिकेत दिसणार आहेत. सस्पेन्स आणि थ्रिलरच्या पार्श्वभूमीवर तयार करण्यात आलेल्या या चित्रपटात दमदार कथानकासोबतच कसलेले कलाकार आणि तांत्रिकदृष्ट्या सक्षम मांडणी पाहायला मिळणार असल्याचं सांगण्यात आलं आहे.
‘भाग्य दिले तू मला’ या मालिकेसह ‘सायको रंगा’सारख्या चित्रपटातून जान्हवी किल्लेकरने आपल्या अभिनयाची छाप पाडली आहे. त्यानंतर ‘बिग बॉस’ या रिअॅलिटी शोमधून तिच्या लोकप्रियतेत आणखी वाढ झाली.
आता जान्हवी ‘मिरांडा वॉर्निंग’च्या माध्यमातून पुन्हा एकदा वेगळ्या भूमिकेतून प्रेक्षकांसमोर येत आहे. सस्पेन्स थ्रिलरमध्ये तिची भूमिका नेमकी कशी असेल, याबद्दल चाहत्यांमध्ये उत्सुकता आहे.
सचिन धोत्रेंचं दिग्दर्शन
सतनाम फिल्म्स स्टुडिओ आणि ओपन गेट मुव्हीज यांच्या माध्यमातून ‘मिरांडा वॉर्निंग’ची निर्मिती करण्यात आली आहे. सचिन धोत्रे यांनी चित्रपटाचं लेखन, निर्मिती आणि दिग्दर्शनाची जबाबदारी सांभाळली आहे. यापूर्वी त्यांनी २०२३ मध्ये ‘गेट-टुगेदर’ या चित्रपटाचं दिग्दर्शन केलं होतं.
चित्रपटाचं लेखन रवींद्र मठाधिकारी आणि सायली मठाधिकारी यांनी केलं आहे. अल्ट्रा मीडिया एंटरटेनमेंटचे सुशीलकुमार अग्रवाल आणि सुकल्प चित्रच्या कल्पक जोशी यांनी या चित्रपटाची प्रस्तुती केली आहे.
आता ‘मिरांडा वॉर्निंग’मध्ये जान्हवी किल्लेकरची भूमिका नेमकी काय आहे आणि हेरिटेजवाडी फार्महाऊसवरील खुनाचं रहस्य कसं उलगडणार, याची उत्तरं जाणून घेण्यासाठी प्रेक्षकांना २७ नोव्हेंबरपर्यंत प्रतीक्षा करावी लागणार आहे.
.png "Videos"){kind=small}
