(फोटो सौजन्य-सोशल मिडिया)
गुरुवार, २६ नोव्हेंबर रोजी सायंकाळी ६ वाजता ठाण्यातील राम गणेश गडकरी रंगायतन येथे हा सांगीतिक आणि सांस्कृतिक सोहळा रंगणार आहे. विशेष म्हणजे, या कार्यक्रमाला रसिकांसाठी विनामूल्य प्रवेश असणार आहे.
कला क्षेत्रातील विविध मान्यवरांच्या योगदानाचा गौरव करण्यासाठी विठ्ठल उमप फाऊंडेशनतर्फे दरवर्षी ‘मृद्गंध पुरस्कार’ प्रदान केला जातो. यंदाच्या पुरस्कारासाठीही विविध क्षेत्रांतील प्रतिभावंतांची निवड करण्यात आली आहे. पद्मश्री तालयोगी श्री सुरेश तळवलकर यांना जीवनगौरव पुरस्काराने सन्मानित करण्यात येणार आहे. तर लोककला क्षेत्रातील योगदानासाठी पद्मश्री भिकल्या लाडक्या धिंडा, छायाचित्रण आणि पत्रकारितेसाठी पद्मश्री सुधारक ओळवे, अभिनय व दिग्दर्शनासाठी संदेश कुलकर्णी, अभिनय क्षेत्रासाठी अभिनेत्री अमृता सुभाष आणि नवोन्मेष प्रतिभा-गायक या विभागात चैतन्य देवडे (माऊली) यांना पुरस्कार प्रदान केला जाणार आहे.
शाल, पुष्पगुच्छ, मानपत्र आणि लोकशाहीर विठ्ठल उमप यांची प्रतिकृती असलेले आकर्षक मानचिन्ह असे या पुरस्काराचे स्वरूप आहे.
लोककलेचा वारसा नव्या पिढीपर्यंत पोहोचवण्याचा संकल्प
याबाबत बोलताना लोकशाहीर विठ्ठल उमप यांचे चिरंजीव, प्रसिद्ध गायक आणि विठ्ठल उमप फाऊंडेशनचे अध्यक्ष नंदेश उमप म्हणाले, “लोककला ही महाराष्ट्राच्या संस्कृतीची खरी ओळख आहे. बाबांनी आपल्या कलेतून सर्वसामान्य माणसाच्या मनात एक वेगळं स्थान निर्माण केलं. रसिकांनी त्यांच्यावर भरभरून प्रेम केलं आणि तेच प्रेम आज आम्हालाही मिळत आहे. बाबांचा लोककलेचा वारसा जपतानाच नव्या पिढीपर्यंत पोहोचवणे, कलाकारांना व्यासपीठ उपलब्ध करून देणे आणि समाजाप्रती आपली जबाबदारी पार पाडणे, हेच आमचे ध्येय आहे.”
याच भावनेतून यंदा विठ्ठल उमप फाऊंडेशनतर्फे दुष्काळग्रस्त शेतकऱ्यांना मदतीचा हात दिला जाणार असल्याचेही त्यांनी सांगितले.
या समारोहात पार्श्वगायिका प्रियांका बर्वे, अरुण पेदे वेसावकर आणि त्यांचे सहकारी आपल्या कलाविष्कारातून लोकशाहीर विठ्ठल उमप यांना सांगीतिक मानवंदना अर्पण करणार आहेत. या सोहळ्याला महाराष्ट्राचे उपमुख्यमंत्री एकनाथ शिंदे, सांस्कृतिक कार्यमंत्री आशिष शेलार, आमदार जितेंद्र आव्हाड, खासदार नरेश म्हस्के, ठाण्याचे आमदार संजय केळकर, आमदार निरंजन डावखरे आणि आरपीआय नेते नानासाहेब इंदिसे यांच्यासह अनेक मान्यवर उपस्थित राहणार आहेत. अभिनेत्री डॉ. समीरा गुजर या कार्यक्रमाचे सूत्रसंचालन करणार आहेत.
लोककलेचा सन्मान, कलाकारांना प्रोत्साहन आणि समाजाप्रती संवेदनशीलता या त्रिसूत्रीवर काम करणारे विठ्ठल उमप फाऊंडेशन नंदेश उमप यांच्या नेतृत्वाखाली लोकशाहीरांचा समृद्ध वारसा पुढे नेत आहे. त्यामुळे २६ नोव्हेंबरचा हा सोहळा केवळ स्मृतिदिनापुरता मर्यादित न राहता महाराष्ट्राच्या लोककलेचा उत्सव आणि एका अजरामर कलावंताला सुरांच्या माध्यमातून वाहिलेली आदरांजली ठरणार आहे.






