(फोटो सौजन्य-सोशल मिडिया)
Sachin Pilgaonkar: मराठी मनोरंजनविश्वातील लोकप्रिय अभिनेते सचिन पिळगांवकर आणि दिवंगत अभिनेते लक्ष्मीकांत बेर्डे यांची मैत्री सर्वश्रुत आहे. या दोघांनीही आपल्या अभिनयाने आणि विनोदी शैलीने प्रेक्षकांच्या मनावर अधिराज्य गाजवलं. आजही त्यांचे चित्रपट प्रेक्षक आवडीने पाहतात. नुकत्याच दिलेल्या एका मुलाखतीत सचिन पिळगांवकर यांनी लक्ष्मीकांत बेर्डे यांच्याशी संबंधित एक भावूक आठवण सांगितली. ‘नवरा माझा नवसाचा’ या गाजलेल्या चित्रपटात लक्ष्मीकांत बेर्डे यांना महत्त्वाची भूमिका द्यायची होती; मात्र त्यांच्या आजारपणामुळे ही इच्छा अपूर्ण राहिली. हा प्रसंग सांगताना सचिन पिळगांवकर भावूक झाले.
लक्ष्मीकांत बेर्डे यांच्याविषयी बोलताना सचिन पिळगांवकर म्हणाले, “लक्ष्या आजही माझ्यात जगतो, इतका तो माझा चांगला मित्र होता.” त्यांच्या या शब्दांतून दोघांमधील घट्ट मैत्रीची प्रचिती येते. लक्ष्मीकांत बेर्डे आज आपल्यात असते, तर त्यांनी आणखी अनेक चित्रपट एकत्र केले असते आणि प्रेक्षकांचं मनोरंजन केलं असतं, अशी भावनाही सचिन यांनी व्यक्त केली.
‘नवरा माझा नवसाचा’मधील ती भूमिका लक्ष्मीकांत बेर्डेंसाठी होती विचारात
सचिन पिळगांवकर दिग्दर्शित ‘नवरा माझा नवसाचा’ या चित्रपटाच्या निर्मितीदरम्यान लक्ष्मीकांत बेर्डे रुग्णालयात होते. आजारपणामुळे त्यांचं काम थांबलं होतं. अशा कठीण काळात सचिन पिळगांवकर यांनी त्यांची भेट घेतली आणि आपल्या चित्रपटात काम करण्याची विनंती केली होती.
सचिन यांनी चित्रपटात काम करण्याविषयी सांगितल्यानंतर लक्ष्मीकांत बेर्डे यांनी आपल्या प्रकृतीची चिंता व्यक्त केली. मात्र, सचिन यांनी त्यांना धीर देत, त्यांच्या प्रतीक्षेत थांबण्याची तयारी दर्शवली होती. त्यामुळे लक्ष्मीकांत यांच्या चेहऱ्यावरही आनंद दिसून आला होता.
‘नवरा माझा नवसाचा’ या चित्रपटात अभिनेते प्रदीप पटवर्धन यांनी साकारलेली बाबू कालियाची भूमिका मूळतः लक्ष्मीकांत बेर्डे यांच्यासाठी विचारात घेतली होती, असं सचिन पिळगांवकर यांनी सांगितलं. चित्रपटाच्या कथानकात ही भूमिका महत्त्वाची होती. लक्ष्मीकांत यांनी आपल्या खास विनोदी शैलीत ही व्यक्तिरेखा साकारली असती, तर तिची रंगत आणखी वाढली असती, अशी भावना व्यक्त केली जाते.
मात्र, चित्रपट प्रदर्शित होण्याआधीच लक्ष्मीकांत बेर्डे यांचं निधन झालं आणि त्यांना या चित्रपटात पाहण्याची सचिन पिळगांवकर यांची इच्छा अपूर्ण राहिली. आजही लक्ष्मीकांत बेर्डे यांच्या आठवणी मराठी प्रेक्षकांच्या मनात जिवंत आहेत. त्यांच्या आणि सचिन पिळगांवकर यांच्या मैत्रीचा हा भावूक किस्सा पुन्हा एकदा जुन्या आठवणींना उजाळा देणारा ठरला.
.png "Videos"){kind=small}
