(फोटो सौजन्य- सोशल मीडिया)
Sohla Movie Trailer: अभिनेत्री सोनाली बेंद्रेने बॉलिवूडमध्ये आपल्या अभिनयाची वेगळी ओळख निर्माण केली आहे. आता सोनाली बेंद्रे मराठी सिनेसृष्टीशी जोडली गेली असून, तिच्या प्रस्तुत ‘सोहळा’ या बहुप्रतिक्षित चित्रपटाचा ट्रेलर नुकताच प्रदर्शित झाला आहे. हळुवार नातेसंबंध, बालपण आणि ग्रामीण जीवनातील भावविश्वाची झलक दाखवणाऱ्या या ट्रेलरने प्रेक्षकांचे लक्ष वेधून घेतले आहे. ‘सोहळा’ हा चित्रपट १६ ऑक्टोबरला चित्रपटगृहात प्रदर्शित होणार आहे.
‘सोहळा’मध्ये एका गावात राहणाऱ्या लहान मुलाची आणि त्याच्या कुटुंबाची अत्यंत संवेदनशील आणि भावनिक गोष्ट पाहायला मिळणार आहे. ग्रामीण जीवनातील ऊब आणि आपुलकीच्या पार्श्वभूमीवर चित्रपटाची कथा घडते. बालपण, कुटुंब, मैत्री आणि मुलं आपल्या आजूबाजूचं जग हळूहळू समजून घेण्याच्या प्रक्रियेचा या चित्रपटातून शोध घेतला जातो.
मराठीत ‘सोहळा’ म्हणजे ‘उत्सव’. महाराष्ट्रातील कुटुंब आणि समुदायांमध्ये साजऱ्या होणाऱ्या पारंपरिक वयात येण्याच्या सोहळ्याच्या संकल्पनेवरून चित्रपटाचं नाव ठेवण्यात आलं आहे. त्यामुळे चित्रपटाच्या नावातच त्याच्या कथेशी जोडलेली एक खास भावना दडलेली आहे.
ट्रेलरबद्दल बोलताना सोनाली बेंद्रेने या चित्रपटाशी आपण लगेच जोडले गेल्याचं सांगितलं. ती म्हणाली, “या चित्रपटाशी मी लगेचच जोडले गेले. हे विश्व साधं आणि ओळखीचं आहे. यात असे काही छोटे-छोटे क्षण आहेत, जे कालांतराने आपल्याला कायमचे लक्षात राहतात.”
पुढे ती म्हणाली, “मला आशा आहे की, जेव्हा लोक हा ट्रेलर पाहतील, तेव्हा त्यांनाही तसंच काहीसं जाणवेल, जे मला ‘सोहळा’ पहिल्यांदा पाहताना जाणवलं होतं. कदाचित पश्याच्या कथेत त्यांना स्वतःच्याच आयुष्यातील एखादा अंशही सापडेल.”
सोनाली बेंद्रे पहिल्यांदाच मराठी चित्रपटाच्या प्रेझेंटर
बॉलिवूड अभिनेत्री सोनाली बेंद्रे ‘सोहळा’च्या माध्यमातून पहिल्यांदाच मराठी चित्रपटाच्या प्रेझेंटर म्हणून काम करत आहे. त्यामुळे तिचं हे मराठी सिनेसृष्टीशी जोडले जाणं विशेष ठरत आहे. ट्रेलरमधून चित्रपटाच्या भावविश्वाची झलक पाहिल्यानंतर या वेगळ्या कथेसाठी प्रेक्षकांची उत्सुकता वाढली आहे.
‘सोहळा’मध्ये प्रवीण डाळिंबकर, देवदत्त प्रशांत गोणे, वर्षा मालवडकर, वैष्णवी संजय घोडके आणि अलेस्सांड्रा व्हेलन मेरेडिझ यांच्या प्रमुख भूमिका आहेत. चित्रपटाचं दिग्दर्शन सैकत बागबान यांनी केलं आहे.
गोल्डी बहल आणि ‘कॅरीऑन फिल्म्स’च्या बॅनरखाली सचिन श्रीवास्तव, रत्ना श्रीवास्तव आणि कविता बागबान यांनी या चित्रपटाची निर्मिती केली आहे. आता ट्रेलरनंतर ‘सोहळा’मधून बालपण आणि नात्यांची ही हळुवार गोष्ट प्रेक्षकांना कशी भावते, याकडे सर्वांचं लक्ष लागलं आहे.
.png "Videos"){kind=small}
