Natya Lekhan Protsahan Yojana: मराठी नाटककारांसाठी मोठी संधी! ‘नाट्यलेखन प्रोत्साहन योजना’ जाहीर; विजेत्यांना मिळणार रोख बक्षिसं

Natya Lekhan Protsahan Yojana: मराठी नाटककारांसाठी अखिल भारतीय मराठी नाट्य परिषदेची ‘नाट्यलेखन प्रोत्साहन योजना’ जाहीर. उत्कृष्ट अप्रकाशित दोन अंकी नाट्यसंहितांना रोख बक्षिसं मिळणार.

• मराठी नाटककारांसाठी ‘नाट्यलेखन प्रोत्साहन योजना’
• उत्कृष्ट नाट्यसंहितांना मिळणार रोख पारितोषिक
• नाट्यसंहिता पाठवण्यासाठी ‘या’ अटी

शीतलकुमार शिंदे, धाराशिव : मराठी रंगभूमीवर आपल्या लेखणीची छाप उमटवू इच्छिणाऱ्या नवोदित आणि अनुभवी नाटककारांसाठी महत्त्वाची संधी उपलब्ध झाली आहे. अखिल भारतीय मराठी नाट्य परिषदेने यंदाही ‘नाट्यलेखन प्रोत्साहन योजना’ जाहीर केली आहे. या योजनेअंतर्गत दर्जेदार आणि अप्रकाशित दोन अंकी मराठी नाट्यसंहिता मागवण्यात आल्या असून, इच्छुक नाटककारांनी आपल्या संहिता २० ऑक्टोबरपर्यंत पाठवाव्यात, असे आवाहन नाट्य परिषदेचे मध्यवर्ती नियामक मंडळ सदस्य तथा धाराशिव शाखेचे अध्यक्ष विशाल शिंगाडे यांनी केले आहे. Natya Lekhan Protsahan Yojana

बदलत्या सामाजिक वास्तवाला, नातेसंबंधांना आणि आजच्या काळातील विविध प्रश्नांना नाटकाच्या माध्यमातून मांडणाऱ्या नव्या लेखनाला प्रोत्साहन देणे हा या योजनेचा उद्देश आहे. नवोदितांसोबतच अनुभवी नाटककारांनाही आपल्या लेखनाला व्यासपीठ मिळवून देण्यासाठी ही योजना महत्त्वाची ठरणार आहे.

उत्कृष्ट नाट्यसंहितांना रोख पारितोषिक

या योजनेत निवड होणाऱ्या उत्कृष्ट नाट्यसंहितांना रोख पारितोषिक देण्यात येणार आहे. प्रथम क्रमांकासाठी २१ हजार रुपये, द्वितीय क्रमांकासाठी १५ हजार रुपये, तृतीय क्रमांकासाठी ११ हजार रुपये, तर चतुर्थ क्रमांकासाठी ३ हजार रुपये असे पारितोषिक देण्यात येईल.

याशिवाय संगीत नाटकासाठी स्वतंत्र ११ हजार रुपयांचे विशेष पारितोषिक देण्यात येणार आहे. त्यामुळे संगीत नाटक लिहिणाऱ्या नाटककारांनाही या योजनेतून प्रोत्साहन मिळणार आहे.

पारितोषिकप्राप्त संहितांचे प्रकाशन होणार

या योजनेतील आणखी एक महत्त्वाची बाब म्हणजे पारितोषिकप्राप्त नाट्यसंहितांचे प्रकाशन करण्याचा नाट्य परिषदेचा मानस आहे. याबाबत केंद्रीय अध्यक्ष प्रशांत दामले यांनी माहिती दिली आहे. त्यामुळे लेखकांना केवळ आर्थिक पारितोषिकच नव्हे, तर त्यांच्या लेखनाला व्यापक व्यासपीठ मिळण्याची संधीही उपलब्ध होणार आहे.

नाट्यसंहिता पाठवताना ‘या’ अटी महत्त्वाच्या

योजनेत सहभागी होण्यासाठी नाटककारांनी नाट्यसंहितेच्या दोन टंकलिखित किंवा सुवाच्य प्रती पाठवणे आवश्यक आहे. नाट्यसंहिता मराठी भाषेतील आणि दोन अंकी असावी. तसेच संबंधित संहिता यापूर्वी कोणत्याही माध्यमातून प्रकाशित झालेली किंवा नाट्यप्रयोगासाठी सादर केलेली नसावी.

इच्छुक नाटककारांनी आपली संहिता अखिल भारतीय मराठी नाट्य परिषद, यशवंतराव चव्हाण नाट्य संकुल, मामा परमानंद मार्ग, माटुंगा, मुंबई या पत्त्यावर २० ऑक्टोबरपूर्वी पाठवावी.

Aarti Solanki: ‘बाप्पाला अक्षरश: हवेत लटकवून ठेवणं…’; गणेशमूर्तींच्या बदलत्या ट्रेंडवर आरती सोलंकी संतापली, पोस्ट व्हायरल

प्रवेश अर्ज आणि योजनेची सविस्तर माहिती नाट्य परिषदेच्या संकेतस्थळावर उपलब्ध आहे. अधिक माहितीसाठी ८५९१७०६८८७ या क्रमांकावर संपर्क साधता येईल.

धाराशिवमधील नाटककारांनी संधीचा लाभ घ्यावा

धाराशिव जिल्ह्यात नाट्यलेखनाची समृद्ध परंपरा असून, अनेक हौशी आणि नवोदित लेखकांकडे रंगभूमीला नवा आशय देण्याची क्षमता आहे. त्यामुळे जिल्ह्यातील नाटककारांनी या योजनेत सहभागी होऊन आपल्या लेखणीतील कथा रंगभूमीपर्यंत पोहोचवावी, असे आवाहन विशाल शिंगाडे यांनी केले आहे.

मराठी रंगभूमीवर नव्या कथा आणि नव्या लेखकांना संधी देण्याच्या दृष्टीने ‘नाट्यलेखन प्रोत्साहन योजना’ महत्त्वाची ठरणार असून, इच्छुक नाटककारांनी अंतिम मुदतीपूर्वी आपल्या नाट्यसंहिता पाठवण्याचे आवाहन करण्यात आले आहे.

Rohit Sharma: क्रिकेटच्या मैदानानंतर रोहित शर्माची नवी इनिंग; ‘फॅमिली फुल हाऊस’मधून करणार मनोरंजनविश्वात पदार्पण