
(फोटो सौजन्य- सोशल मीडिया)
Samay Raina: प्रसिद्ध कॉमेडियन समय रैना त्याच्या विनोदी शैलीमुळे आणि अनेकदा वादग्रस्त वक्तव्यांमुळे चर्चेत असतो. आता समय पुन्हा एकदा चर्चेचा विषय ठरला आहे, मात्र यावेळी कारण वेगळं आहे. समय रैनाला दादासाहेब फाळके इंटरनॅशनल फिल्म फेस्टिव्हल पुरस्कार २०२६मध्ये ‘कॉमेडियन ऑफ द इयर’ पुरस्कार जाहीर झाला आहे. त्याच्या पुरस्काराच्या घोषणेनंतर सोशल मीडियावर संमिश्र प्रतिक्रिया उमटत असून, काही नेटकऱ्यांनी या निर्णयाबद्दल नाराजी व्यक्त केली आहे.
दादासाहेब फाळके इंटरनॅशनल फिल्म फेस्टिव्हल पुरस्कार २०२६च्या विजेत्यांची यादी २० नोव्हेंबर रोजी जाहीर करण्यात आली. यंदाच्या पुरस्कारांमध्ये हॉलिवूडपासून बॉलिवूडपर्यंतच्या अनेक दिग्गज कलाकारांचा समावेश आहे. प्रसिद्ध अमेरिकन गायिका टेलर स्विफ्टला ‘इंटरनॅशनल आर्टिस्ट ऑफ द इयर’ पुरस्कार जाहीर झाला आहे. तर भारतीय कॉमेडियन समय रैनाला ‘कॉमेडियन ऑफ द इयर’ पुरस्काराने गौरवण्यात येणार आहे.
या पुरस्कारांच्या यादीत हॉलिवूड अभिनेता मायकेल बी. जॉर्डन, दिग्दर्शक पॉल थॉमस अँडरसन आणि जेम्स कॅमेरॉन यांच्यासह भारतीय चित्रपटसृष्टीतील अनेक कलाकारांचा समावेश आहे. ज्येष्ठ अभिनेते कमल हासन यांनाही चित्रपटसृष्टीतील त्यांच्या योगदानासाठी सन्मानित करण्यात आले आहे.
समय रैना आपल्या हटके विनोदी शैलीने आणि स्टँडअप कॉमेडीने प्रेक्षकांना खळखळून हसवतो. त्याच्या विनोदाची खास शैली आणि लोकप्रियतेमुळे त्याला ‘कॉमेडियन ऑफ द इयर’ पुरस्कार जाहीर झाला आहे. मात्र, या घोषणेनंतर सोशल मीडियावर काही नेटकऱ्यांनी नाराजी व्यक्त केली आहे. समयला हा पुरस्कार देण्याचा निर्णय अनेकांना पटलेला नाही. त्यामुळे पुरस्काराची घोषणा होताच त्याच्या नावावरून सोशल मीडियावर चर्चा सुरू झाली आहे.