(फोटो सौजन्य-सोशल मीडिया)
Sunil Lahri Video: रामानंद सागर यांच्या ‘रामायण’ मालिकेतून घराघरांत पोहोचलेले प्रसिद्ध अभिनेते सुनील लहरी सध्या त्यांच्या एका वक्तव्यामुळे चर्चेत आले आहेत. ‘रामायण’मध्ये त्यांनी लक्ष्मणाची भूमिका साकारली होती. सुनील लहरी यांचा एक व्हिडीओ सध्या सोशल मीडियावर मोठ्या प्रमाणात व्हायरल होत आहे. या व्हिडीओच्या माध्यमातून त्यांनी देशवासीयांना आगामी काळाबाबत सावध राहण्याचं आवाहन केलं आहे.
सुनील लहरी यांनी सोशल मीडियावर व्हिडीओ शेअर करताना आगामी काळाबाबत चिंता व्यक्त केली आहे. हवामानातील बदलांमुळे ‘एल निनो’चा प्रभाव जाणवू शकतो आणि त्याचा परिणाम दुष्काळ, पाणीटंचाई तसेच अन्नधान्याच्या उपलब्धतेवर होऊ शकतो, असं त्यांनी म्हटलं आहे.
आपत्ती येण्याची वाट न पाहता नागरिकांनी आतापासूनच दैनंदिन वापरातील वस्तूंची बचत करण्याचा प्रयत्न करावा, असं आवाहन त्यांनी केलं आहे. विशेषतः खाद्यपदार्थ, तेल, पेट्रोल आणि डिझेल यांचा वापर काही प्रमाणात कमी करण्याचा सल्ला त्यांनी दिला आहे.
‘एल निनोमुळे मोठ्या संकटांचा सामना करावा लागू शकतो’
व्हिडीओमध्ये सुनील लहरी म्हणतात, “नमस्कार मित्रांनो, आजकाल एका शब्दाची खूप चर्चा होत आहे : ‘एल निनो’. याचा संबंध निसर्ग, हवामान आणि वातावरणातील बदलांशी आहे. एल निनोमुळे जगाला, विशेषतः आशियाई देशांना आणि आपल्या देशालाही मोठ्या संकटांचा सामना करावा लागू शकतो.”
पुढे ते म्हणतात की, हवामानात बदल होऊन मोठ्या प्रमाणात उष्णता वाढू शकते. त्यामुळे पाण्याची समस्या निर्माण होण्याची शक्यता आहे. पिकांचं नुकसान होऊ शकतं, तसंच खतांची उपलब्धताही प्रभावित होऊ शकते. खतं, तेल आणि इंधन यांसारख्या काही गोष्टींसाठी भारत इतर देशांवर अवलंबून असल्याचंही त्यांनी नमूद केलं.
‘पैसा असूनही वस्तू नसतील तर त्याचा काय उपयोग?’
सुनील लहरी यांनी पुढे नागरिकांना बचतीचं महत्त्व पटवून देताना म्हटलं, “आपल्याकडे पैसा असला तरी आपण त्याचे काहीही करू शकत नाही, कारण जर आपल्याकडे वस्तूच नसतील, तर आपण त्यांचे काय करणार?”
त्यामुळे आता हळूहळू उपलब्ध साधनसंपत्ती वाचवण्याची वेळ आली असल्याचं त्यांनी सांगितलं. भारतीयांना बचतीची सवय असून संकटांचा सामना करण्याचीही सवय असल्याचं त्यांनी म्हटलं.
आगे आने वाला समय विपदाओं से भरा हो सकता है हमको एकजुट होकर उससे लड़ने के लिए तैयार रहना चाहिए कहते हैं आग लगाने पर कुआं नहीं खोदा जाता कुआं आग लगने की संभावना देख कर पहले खोदा जाता है होशियार रहे सतक रहे
The times ahead may b full of disasters.We all should unite n ready2fight https://t.co/VLTz9uG8ql — Sunil lahri (@LahriSunil) October 5, 2026
‘कोविडच्या काळात आपण टिकून राहिलो’
कोरोना महामारीचा संदर्भ देत सुनील लहरी म्हणतात, “आपण खूप हुशार आहोत. भारतीयांना बचत करण्याची सवय आहे. आपल्याला संकटांशी लढण्याचीही सवय आहे. कोविड-१९च्या काळात आपण न थांबता टिकून राहिलो. त्याचप्रमाणे, मला खात्री आहे की आपण या संकटावरही मात करू.”
आपला व्हिडीओ लोकांना घाबरवण्यासाठी नसून नागरिकांनी वेळीच सावध व्हावं, या उद्देशाने असल्याचंही सुनील लहरी यांनी स्पष्ट केलं आहे. त्यांनी प्रत्येकाने आपल्या वापराचा विचार करून दैनंदिन गरजेच्या वस्तूंचा वापर सुमारे १५ ते २० टक्क्यांनी कमी करण्याचा प्रयत्न करावा, असं म्हटलं आहे.
ते उदाहरण देताना म्हणतात, “विहीर आग लावण्यासाठी खोदली जात नाही; आग लागण्याची शक्यता विचारात घेऊन विहीर खोदली जाते.”
त्यामुळे संकट प्रत्यक्ष समोर येण्यापूर्वीच आपण सज्ज राहिल्यास त्याचा सामना करणं अधिक सोपं जाईल, असा संदेश सुनील लहरी यांनी या व्हिडीओच्या माध्यमातून दिला आहे. सध्या त्यांचा हा व्हिडीओ सोशल मीडियावर चर्चेचा विषय ठरत आहे.
.png "Videos"){kind=small}
