( फोटो सौजन्य- सोशल मिडिया)
Tumbbad Movie: अभिनेता सोहम शाह यांच्या ‘तुम्बाड’ चित्रपटाने रिलीज झाल्यापासूनच प्रेक्षकांच्या मनावर वेगळी छाप पाडली आहे. अनोखी कथा, भयावह वातावरणनिर्मिती, दमदार अभिनय आणि अप्रतिम व्हिज्युअल एस्थेटिक्स यामुळे या चित्रपटाने देश-विदेशात मोठा कल्ट फॉलोइंग निर्माण केला. त्यामुळे ‘तुम्बाड’ हा केवळ एक सिनेमा न राहता प्रेक्षकांसाठी एक कल्ट फ्रँचायझी बनला आहे. आजही या चित्रपटाची लोकप्रियता कमी झालेली नाही, याची प्रचिती यंदाच्या गणेशोत्सवात आली.
गणेश चतुर्थीच्या पवित्र सणानिमित्त देशभरातील अनेक ठिकाणी ‘तुम्बाड’च्या थीमवर आधारित आकर्षक गणपती मंडप साकारण्यात आले आहेत. सोशल मीडियावर या मंडपांचे फोटो आणि व्हिडीओ मोठ्या प्रमाणात व्हायरल होत असून, ‘तुम्बाड’च्या चाहत्यांनी आपल्या कल्पकतेतून चित्रपटातील भयावह जग गणेशोत्सवाच्या सजावटीत उतरवल्याचे पाहायला मिळत आहे.
या मंडपांमध्ये चित्रपटातील प्रसिद्ध हस्तरच्या व्यक्तिरेखेपासून प्रेरित सजावट, लाल रंगाच्या भयावह भिंती, प्रवेशद्वारावर भांड्यासारखी वस्तू हातात घेतलेली देवीची मूर्ती आणि गणेशमूर्तीच्या मागील बाजूस उभं केलेलं भीतीदायक वातावरण लक्ष वेधून घेत आहे. काही ठिकाणी ‘तुम्बाड’च्या जगाची आठवण करून देणारे भयावह कॉरिडॉर आणि सेटसदृश रचना साकारण्यात आल्या आहेत.
2018 मध्ये प्रदर्शित झालेल्या ‘तुम्बाड’ने आपल्या लोककथांवर आधारित कथानक आणि वेगळ्या मांडणीमुळे हळूहळू मोठा चाहतावर्ग निर्माण केला. विशेष म्हणजे 2024 मध्ये चित्रपट पुन्हा प्रदर्शित झाल्यानंतर त्याला प्रेक्षकांचा आणखी मोठा प्रतिसाद मिळाला. री-रिलिजनंतर ‘तुम्बाड’ने बॉक्स ऑफिसवर दमदार कामगिरी करत आपल्या पहिल्या प्रदर्शनापेक्षाही अधिक प्रेक्षकांना आकर्षित केलं.
या यशामुळे चित्रपटाची लोकप्रियता केवळ जुन्या चाहत्यांपुरती मर्यादित नसून नव्या पिढीतही ‘तुम्बाड’ची क्रेझ कायम असल्याचं दिसून आलं.
दरम्यान, ‘तुम्बाड’च्या आगामी सिक्वेलचीही प्रेक्षक आतुरतेने वाट पाहत आहेत. ‘तुम्बाड 2’मध्ये नवाजुद्दीन सिद्दीकीची एन्ट्री झाल्यानंतर चित्रपटाची चर्चा आणखी वाढली. त्यात आता अभिनेत्री आलिया भट्टदेखील एका महत्त्वपूर्ण भूमिकेत दिसणार असल्याची घोषणा करण्यात आली आहे.
अभिनेता-निर्माता सोहम शाह यांनी जुलैमध्ये या महत्त्वपूर्ण कास्टिंगची घोषणा केली होती. त्यामुळे सोहम शाह, नवाजुद्दीन सिद्दीकी आणि आलिया भट्ट हे कलाकार या बहुप्रतीक्षित फ्रँचायझीच्या पुढील अध्यायात एकत्र दिसणार आहेत.
‘तुम्बाड’च्या थीमवर गणपती मंडप साकारण्यापासून ते ‘तुम्बाड 2’बद्दल वाढणाऱ्या उत्सुकतेपर्यंत, या फ्रँचायझीचा चाहतावर्ग किती मोठा आहे, याची पुन्हा एकदा प्रचिती आली आहे.
.png "Videos"){kind=small}
