गुरुवार, 22 ऑक्टोबर 2026
भारतीय रेल्वे: १० सप्टेंबरपासून ३६ दिवसांचा ब्लॉक (संग्रहित फोटो)
नवी दिल्ली : सर्वात आरामदायी आणि परवडणारा प्रवास म्हणून भारतीय रेल्वेला प्राधान्य दिले जाते. मात्र, आता या रेल्वेसेवेत अडथळा येण्याची शक्यता आहे. कारण, चंदीगड रेल्वे स्थानकावर सुरू असलेल्या सुधारणा कामामुळे, 10 सप्टेंबर ते 15 ऑक्टोबर या कालावधीत 36 दिवसांचा वीज आणि वाहतूक ब्लॉक लागू केला जाणार आहे. परिणामी, अनेक गाड्यांचे मार्ग बदलले जातील, काही रद्द होतील आणि इतरांवर अंशतः परिणाम होईल.
10 सप्टेंबर ते 15 ऑक्टोबर या कालावधीत एकूण 12 गाड्या रद्द केल्या जातील. यामध्ये दिल्ली-कालका एक्सप्रेस, कालका-अंबाला पॅसेंजर, चंदीगड-अमृतसर एक्सप्रेस, चंदीगड-फिरोजपूर एक्सप्रेस, जालंधर-अंबाला पॅसेंजर, अंबाला-दौलतपूर चौक पॅसेंजर आणि अंबाला-जालंधर पॅसेंजर यांचा समावेश आहे. सहा गाड्या त्यांच्या मूळ स्थानकावरून किंवा त्यांच्या अंतिम स्थानकाच्या आधीच सुटतील. रामनगर-चंदीगड एक्सप्रेस १४, २१ आणि २८ सप्टेंबर, तसेच ५ आणि १२ ऑक्टोबर रोजी फक्त अंबाला कॅन्टपर्यंत धावेल आणि तेथूनच परत येईल. अजमेर-चंदीगड एक्सप्रेस ११ ते १३ ऑक्टोबर दरम्यान १३ दिवसांसाठी अंबाला कॅन्ट येथेच थांबेल आणि तेथूनच सुरू होईल.
दरम्यान, उदयपूर-चंदीगड एक्सप्रेस २३ सप्टेंबर ते १५ ऑक्टोबर दरम्यान ६-७ दिवसांसाठी फक्त अंबाला कॅन्टपर्यंत धावेल. ही ट्रेन अंबाला येथील प्लॅटफॉर्म क्रमांक १ ऐवजी प्लॅटफॉर्म क्रमांक २ वरून सुटेल. परिणामी, अंबाला-चंदीगड विभाग अंशतः रद्द केला जाईल. दोन गाड्या वळवलेल्या मार्गांवरून धावतील आणि चंदीगडमधील व आसपासच्या काही स्थानकांवर थांबणार नाहीत.
प्रवाशांची गैरसोय टाळण्याचा रेल्वेचा प्रयत्न
लालकुआं-अमृतसर एक्सप्रेस ३ आणि १० ऑक्टोबर रोजी अंबाला-सिरहिंद-सनेहवाल मार्गे वळवण्यात येईल. या कालावधीत, ही गाडी चंदीगड, साहिबजादा अजित सिंग नगर (मोहाली) आणि न्यू मोरिंडा स्थानकांवर थांबणार नाही. प्रवाशांच्या सोयीसाठी आणि गर्दी कमी करण्यासाठी, १० सप्टेंबर ते १५ ऑक्टोबर दरम्यान आठ गाड्या साहिबजादा अजित सिंग नगर (मोहाली) स्थानकावर तात्पुरत्या थांबतील. यामध्ये संबलपूर-जम्मू तवी एक्सप्रेस, टाटानगर-जम्मू तवी एक्सप्रेस (८ सप्टेंबर ते १३ ऑक्टोबर), आग्रा-होशियारपूर एक्सप्रेस, सहर्सा-अमृतसर एक्सप्रेस आणि अमृतसर-देहराडून एक्सप्रेस यांचा समावेश आहे.
