बंगळुरू : कर्नाटकात विधानसभा निवडणुका (Karnataka Assembly Elections) होत आहे. भाजपसह काँग्रेस, जेडीएसकडून ही निवडणूक जिंकण्यासाठी विशेष प्रयत्न केले जात आहेत. त्यात भाजपच्या उमेदवारांच्या प्रचारासाठी खुद्द पंतप्रधान नरेंद्र मोदी (PM Narendra Modi) प्रचाराच्या मैदानात उतरले आहेत. पंतप्रधान मोदींची कर्नाटकात जाहीरसभा झाली. यामध्ये त्यांनी काँग्रेस आणि जेडीएसवर हल्लाबोल केला.
एका रॅलीला संबोधित करताना पंतप्रधान मोदी यांनी विविध मुद्यांवर भाष्य केले. त्यांनी म्हटले की, ‘जेडीएस आणि काँग्रेस हे कर्नाटकच्या विकासातील सर्वांत मोठे अडथळे आहेत. ते टीम म्हणून लढले तरी कर्नाटकमधील जनता त्यांना सत्तेवर येण्याची संधी देणार नाही. कर्नाटकची ही निवडणूक केवळ आमदार, मंत्री किंवा येत्या पाच वर्षांसाठी मुख्यमंत्री बनवण्याची निवडणूक नाही. येत्या 25 वर्षात विकसित भारताच्या रोडमॅपचा पाया मजबूत करण्यासाठी ही निवडणूक आहे’.
डबल इंजिनचे सरकार निवडून द्यावे लागेल
काँग्रेस हा पक्ष जुने इंजिन आहे. जे नेहमीच विकासात अडथळा आणते. काँग्रेसने काहीही केले तरी कर्नाटकची जनता खोट्या आश्वासनांच्या जाळ्यात अडकणार नाही. कर्नाटकातील जनतेला राज्याच्या विकासासाठी डबल इंजिनचे सरकार निवडून द्यावे लागेल, असे त्यांनी म्हटले आहे.
भाजप शेतकऱ्यांसाठी काम करतंय
केंद्र सरकारने पीएम किसान सन्मान निधीला पाठवलेल्या पैशात येथील भाजप सरकारने आणखी 4 हजार रुपयांची भर घातली आहे. त्यामुळे कर्नाटकातील लाखो शेतकरी कुटुंबांच्या बँक खात्यात 18 हजार कोटी रुपये पोहोचले आहेत.
