लखनौ : हमीरपूर खाण प्रकरणातील आरोपी माजी मंत्री गायत्री प्रजापती यांची मैत्रिण गुड्डा देवी यांच्या घरावर छापा टाकताना ईडीच्या पथकाने भिंतींमधून मोठी रोकड जप्त केली. वास्तविक, ईडी लखनौ झोनच्या पथकाने माजी मंत्र्यांच्या 13 ठिकाणांवर छापे टाकले. देशातील चार शहरांमध्ये अमेठी, लखनौ, दिल्ली आणि मुंबई या ठिकाणी छापे टाकण्यात आले. यामध्ये 44 लाख रुपये रोख आणि बेनामी संपत्तीची कागदपत्रे जप्त करण्यात आली.
गुड्डा देवी यांचे गायत्री प्रजापतीसोबत जवळचे संबंध असल्याची माहिती ईडीला मिळाली होती. त्यांच्या निवासस्थानी गुप्तचर माहितीच्या आधारे ईडीने छापा टाकला. छाप्यादरम्यान गुड्डा देवी घरी नव्हत्या. ईडीच्या टीमने घराच्या शेजारी राहणाऱ्या गुड्डा देवीच्या आईकडून चाव्या घेतल्या. यानंतर घरात प्रवेश केला. छाप्यादरम्यान घरात विशेष काही सापडले नाही.
यावर ईडीचे पथक आपल्याला काहीतरी चुकीची माहिती मिळाल्याचा विचार करत होती. मात्र, ईडीच्या सदस्यांनी भिंती ठोठावल्यावर त्यांना काहीतरी विचित्र दिसले. भिंत पोकळ असल्यासारखे वाटले. यानंतर भिंती पाडण्याचा निर्णय घेण्यात आला. तेथे रोख रक्कम आणि दागिन्यांचा खजिना सापडला. ईडीच्या पथकाने रोख मोजण्यासाठी मशीन मागवली.
प्रजापती यांचा मुलगा ताब्यात
गायत्री प्रजापती यांच्या घरावर छापे टाकल्यानंतर ईडीची टीम त्यांचा लहान मुलगा अनुराग प्रजापतीसोबत लखनौला आली. या संपूर्ण प्रकरणात अनुरागची चौकशी सुरू आहे. छाप्यादरम्यान, गायत्री यांच्या पत्नी आमदार महाराजी देवी यांची प्रकृती बिघडली. गायत्री प्रजापती यांच्या मुलीने रडत मानसिक छळ केल्याचा आरोप केला.
.png "Videos"){kind=small}
