उत्तर प्रदेश, छत्तीसगडसह देशातील अनेक राज्यांत मुसळधार पावसाचा अंदाज; हवामान विभागाने जारी केला अलर्ट…

उत्तर भारतातील काही भागांमधून मान्सूनने माघार घेतल्यानंतर, पश्चिमेकडील वारे पूर्वेकडे सरकत आहेत, ज्यामुळे उत्तरेकडील डोंगराळ आणि मैदानी भागात पावसाळा संपत आहे.

नवी दिल्ली : देशातील अनेक राज्यांत मुसळधार पाऊस होताना दिसत आहे. त्यातच आता पुढील काही दिवसांत देशाच्या जवळपास अर्ध्या भागात पुन्हा मुसळधार पाऊस पडण्याची शक्यता आहे. बंगालच्या उपसागरात आणि म्यानमारजवळ तयार झालेल्या प्रणालीचा परिणाम पुढील आठवड्यापर्यंत देशाच्या अनेक भागात दिसून येईल असे हवामान तज्ज्ञांचे म्हणणे आहे.

हवामान खात्याने शेतकऱ्यांना त्यांच्या पिकांचे संरक्षण करण्यासाठी आवश्यक पावले उचलण्याचा सल्ला दिला आहे. उत्तर भारतातील काही भागांमधून मान्सूनने माघार घेतल्यानंतर, पश्चिमेकडील वारे पूर्वेकडे सरकत आहेत, ज्यामुळे उत्तरेकडील डोंगराळ आणि मैदानी भागात पावसाळा संपत आहे. ही परिस्थिती फार काळ टिकणार नसल्याचा अंदाज आहे. कारण बंगालच्या उपसागरात सतत अनेक प्रणाली विकसित होत आहेत. तसेच बंगालच्या उपसागरातून पूर्वेकडील वाऱ्यांमुळे वेगाने पुढे येणाऱ्या पश्चिमेकडील वाऱ्यांमध्ये बदल दिसून येईल.

हेदेखील वाचा : Maharashtra Rain Alert: पाऊस इतका का पेटलाय? ‘या’ तारखेपासून राज्यात प्रचंड…; शेतकऱ्यांवर मोठे संकट येणार

पुढील तीन दिवसांत मुसळधार पाऊस पडण्याची शक्यता देखील आता वर्तवण्यात आली आहे. हवामान विभागाच्या अंदाजानुसार, पुढील दोन ते तीन दिवसांत ईशान्य भारत, पश्चिम बंगाल, झारखंड, ओडिशा, छत्तीसगड आणि मध्य प्रदेशात मुसळधार ते अतिमुसळधार पाऊस पडण्याची शक्यता आहे.

पावसाचा होऊ शकतो विस्तार

हवामान विभागाच्या मते, उत्तर ओडिशा आणि वायव्य बंगालच्या उपसागरावर आधीच सक्रिय असलेले कमी दाबाचे क्षेत्र या पावसात महत्त्वाची भूमिका बजावेल. याव्यतिरिक्त, २५-२६ सप्टेंबर रोजी मध्य बंगालच्या उपसागरावर आणखी एक कमी दाबाचे क्षेत्र तयार होण्याची अपेक्षा आहे, ज्यामुळे ओडिशापासून गुजरातपर्यंत पावसाचा विस्तार होऊ शकतो. २६ ते ३० सप्टेंबर दरम्यान महाराष्ट्र, कोकण आणि गोव्यातही मुसळधार पाऊस पडण्याची शक्यता आहे.

महाराष्ट्रातही मुसळधार पावसाचा अंदाज

राज्यात गेले काही दिवस मुसळधार पाऊस कोसळत आहे. मराठवाडा, विदर्भात तर पावसाने नुसता धुमाकूळ घातला आहे. राज्यात ओला दुष्काळ जाहीर होण्याची शक्यता आहे. राज्य सरकारने शेतकऱ्यांना मदतीची घोषणा केली आहे. गेल्या काही दिवसांपासून राज्यात मुसळधार पाऊस सुरू आहे. हवामान विभागाने राज्यात पुन्हा एकदा मुसळधार पावसाचा इशारा दिला आहे.

हेदेखील वाचा : सीना नदीने धारण केले रौद्ररूप; महापूर आल्याने शेतकऱ्यांचे मोठे नुकसान, नदीकाठच्या गावांना…