भाजपच्या 'या' आमदाराची पक्षातूनच हकालपट्टी; सहा वर्षांसाठी काढून टाकलं, कारणही आलं समोर...
बंगळुरु : गेल्या काही दिवसांपासून राजकारणात अनेक घडामोडी घडत आहेत. त्यात आता कर्नाटकातून मोठी राजकीय घडामोड समोर आली आहे. कर्नाटकचे आमदार बसनगौडा पाटील यटनाल यांना भाजपने सहा वर्षांसाठी हकालपट्टी केली आहे. बसनगौडा पाटील यांच्या हकालपट्टीचे कारण आता समोर आले आहे. अलीकडच्या काळात भाजपकडून करण्यात आलेली अशा स्वरूपाची ही पहिलीच कारवाई आहे.
भारतीय जनता पक्षाने (भाजप) आमदार बसनगौडा पाटील यटनाल यांना 6 वर्षांसाठी पक्षातून काढून टाकले आहे. राज्यस्तरीय पक्ष नेतृत्वावर टीका आणि पक्षाच्या सूचनांचे उल्लंघन केल्यामुळे ही कारवाई करण्यात आली आहे. भारतीय जनता पक्षाच्या (भाजप) केंद्रीय शिस्तपालन समितीने 26 मार्च रोजी एक पत्रक जारी करून, यटनाल यांच्या पक्ष शिस्तीच्या वारंवार उल्लंघनांना गांभीर्याने घेत ही कारवाई केली. समितीला असे आढळून आले की, यटनाल यांनी वारंवार पक्ष शिस्तीचे उल्लंघन केले होते. त्यामुळे त्यांच्यावर ही कारवाई करण्यात आली.
यापूर्वी, कन्नड चित्रपट अभिनेत्री रान्या राव यांच्याविरुद्ध अपमानास्पद टिप्पणी केल्याबद्दल भारतीय जनता पक्षाचे (भाजप) आमदार बसनगौडा पाटील यटनाल यांच्याविरुद्ध गुन्हा दाखल करण्यात आला होता. आता भाजपने बसनगौडा पाटील यटनाल यांना पक्षविरोधी वक्तव्य केल्याप्रकरणी त्यांची पक्षातून हकालपट्टी करत कारवाई केली आहे.
राज्य युनिटचे अध्यक्ष बी. वाय. विजयेंद्र आणि त्यांचे वडील व माजी मुख्यमंत्री बी. एस. येडियुरप्पा यांच्याशी मतभेद असलेले कर्नाटकातील बंडखोर नेते बसनगौडा पाटील यटनाळ यांच्याविरुद्ध व्हीप जारी करत भाजप पक्षश्रेष्ठींनी बुधवारी ही कारवाई केली आहे.
.png "Videos"){kind=small}
