बुधवार, 23 सप्टेंबर 2026
President Murmu : एआय समाधान देऊ शकतं, पण योग्य प्रश्न विचारणं आपली जबाबदारी; राष्ट्रपती मुर्मू यांच मोठे भाष्य, सौजन्य : आयएएनएस
राष्ट्रपती द्रौपदी मुर्मू (President Murmu) यांनी बुधवारी उच्च शिक्षणात मल्टीडिसिप्लिनरी (अनेक विषयांचे एकत्रिकरण) चे उपयोग करण्याचे आवाहन केले. त्या म्हणाल्या की, हवामान बदल, कृत्रिम बुद्धिमत्ता (एआय), गरिबी उन्मूलन आणि लोकशाहीसारख्या जटील समकालीन समस्यांचे समाधान एकाच क्षेत्रातून होऊ शकत नाही.
तसेच त्या विद्यार्थ्यांना म्हणाल्या की, कृत्रिम बुद्धिमत्ता (एआय) समाधान देऊ शकते, पण त्याला योग्य प्रश्न विचारणे आपली जबाबदारी आहे. टेक्नॉलॉजी वेगाने कार्य करते, पण तिचा वापर कोणत्या पद्धतीने करावा याचा विचार विद्यार्थ्यांना करायला हवा.
गुजरातच्या वडोदरामधील महाराजा सयाजीराव विद्यापीठाच्या 75 व्या दिक्षांत समारंभाला संबोधित करताना राष्ट्रपती मुर्मू म्हणाल्या की, विद्यापीठात शिक्षणाचे अनेक विषय आहेत, जे ज्ञानाच्या विविध शाखांना एकत्रित आणण्याची परिस्थिती निर्माण करतात. त्या पुढे म्हणाल्या की, कला शाखेपासून विज्ञान शाखेपर्यंत, टेक्नॉलॉजी ते मेडिसिन, लॉ पासून ते सामाजिकशास्त्र, फाइन आर्ट्सपासून परफॉर्मिंग आर्ट्स, मॅनेजमेंटपासून ते पत्रकारितेपर्यंत हे विद्यापीठ ज्ञानाच्या अनेक क्षेत्रांमध्ये शिक्षण देत आहे.
राष्ट्रपती म्हणाल्या की, समाजासमोर येणाऱ्या समस्या आता एकमेकांशी अधिक जोडलेल्या आहेत आणि त्यांचे निराकरण करण्यासाठी विविध विषयांच्या ज्ञानाची आवश्यकता आहे. त्या पुढे म्हणाल्या की, हवामान बदल हा केवळ पर्यावरणशास्त्राच्या अभ्यासाचा विषय नाही. कृत्रिम बुद्धिमत्ता (एआय) हा केवळ संगणकशास्त्राचा विषय नाही. आरोग्य हा केवळ वैद्यकशास्त्र किंवा वैद्यकीय विज्ञानाचा विषय नाही. गरिबी दूर करणे हा केवळ अर्थशास्त्रज्ञाचा विषय नाही. लोकशाही हा केवळ राज्यशास्त्राचा विषय नाही.
आता आपल्याला अनेक समस्यांचे समाधान शोधण्यासाठी अनेक विषयांना एकत्रित करून (मल्टीडिसिप्लिनरी) काम करण्याच्या दृष्टीकोनाची गरज असल्याचे राष्ट्रपतींनी यावेळी स्पष्ट केले.
राष्ट्रपती म्हणाल्या की, विद्यार्थ्यांनी आता फक्त आपल्या शिक्षणाच्या खास विषयापर्यंत मर्यादित न राहता विविध गोष्टींचे ज्ञान आणि आपला दृष्टीकोन विकसित करण्याची गरज आहे. आपल्याला एका वैज्ञानिकासारखी जिज्ञासा, एका कलाकारासारखी संवेदनशीलता, एका इतिहासकारासारखा दृष्टीकोन, अर्थशास्त्राप्रमाणे समज आणि समाजशास्त्राप्रमाणे चेतनेची गरज असल्याचे राष्ट्रपती म्हणाल्या.
BJP MLA Son Missing: भाजप आमदाराचा मुलगा बेपत्ता; अपहरण,दहशतवादाचा संशय अन् नाट्यमय घडामोडी
दरम्यान दिक्षांत समारंभात 229 विद्यार्थ्यांना डॉक्टर ऑफ फिलॉसॉफी डिग्री, 2,857 विद्यार्थ्यांना मास्टर डिग्री, 8,863 विद्यार्थ्यांना बॅचलर डिग्री आणि 657 विद्यार्थ्यांना पोस्टग्रॅज्युएट डिप्लोमासाठी पात्र ठरवण्यात आले.
