सौजन्य : सोशल मीडिया
कोटा : राजस्थानच्या कोटा शहरातून पुन्हा एकदा धक्कादायक बातमी समोर आली आहे. NEET परीक्षेची तयारी करणाऱ्या 20 वर्षीय विद्यार्थ्याने वसतिगृहात आत्महत्या (Youth Suicide) केली आहे. सुमित असे आत्महत्या केलेल्या विद्यार्थ्यांचे नाव असून, तो हरियाणातील रोहतक जिल्ह्यातील रहिवासी होता. तो गेल्या एक वर्षापासून कोटा येथील कुन्हडी लँडमार्क सिटी येथील वसतिगृहात राहत होता.
देशातील कोचिंग हब समजल्या जाणाऱ्या कोटा शहरात या वर्षात आतापर्यंतची ही नववी आत्महत्या आहे. मिळालेल्या माहितीनुसार, मृत विद्यार्थी सुमित हा NEET परीक्षेच्या तयारीसाठी खासगी कोचिंग क्लासला जात होता. रविवारी सायंकाळी सुमितच्या कुटुंबीयांनी वसतिगृहाच्या वॉर्डनला वारंवार फोन करूनही सुमितकडून प्रतिसाद मिळत नसल्याची माहिती दिली. त्यानंतर वॉर्डनने सुमितच्या खोलीचा दरवाजा ठोठावला मात्र उत्तर मिळाले नाही.
यानंतर पोलिसांना पाचारण करण्यात आले आणि दरवाजा तोडला असता सुमित लटकलेला आढळून आला. विद्यार्थ्याने हे पाऊल का उचलले याचा पोलीस तपास करत आहेत. सुमितचा मृतदेह शवागारात ठेवण्यात आला आहे. त्यांचे कुटुंबीय कोटा येथे पोहोचल्यानंतर पोस्टमार्टम केले जाईल.
