उत्तर प्रदेशात सपा-काँग्रेसचं अखेर ठरलं; ‘इतक्या’ जागा देण्यावर झालं एकमत

समाजवादी पक्षाचे नेतृत्व आणि काँग्रेस हायकमांड यांच्यात जागांच्या संदर्भात चर्चा झाल्याची माहिती आहे. काँग्रेसने उत्तर प्रदेशात 17 जागांवर निवडणूक लढवण्याचे मान्य केले. परंतु, लखीमपूर खेरी आणि श्रावस्ती या जागा त्यांना द्याव्यात, अशी काँग्रेसची इच्छा आहे.

लखनौ : समाजवादी पक्षाचे नेतृत्व आणि काँग्रेस हायकमांड यांच्यात जागांच्या संदर्भात चर्चा झाल्याची माहिती आहे. काँग्रेसने उत्तर प्रदेशात 17 जागांवर निवडणूक लढवण्याचे मान्य केले. परंतु, लखीमपूर खेरी आणि श्रावस्ती या जागा त्यांना द्याव्यात, अशी काँग्रेसची इच्छा आहे. या बदल्यात ते पश्चिम उत्तर प्रदेशातील बुलंदशहरची जागा सोडण्यास तयार आहेत.

समाजवादी पक्षाने या प्रस्तावावर विचार केला असून, अंतिम निर्णय लवकरच दिला जाईल, अशी माहिती समोर आली आहे. दोन्ही पक्षांमधील जागांबाबतचा गोंधळ रात्रीपर्यंत सुरू होता. त्यामुळे समाजवादी पक्षाचे अध्यक्ष अखिलेश यादव यांनी घोषणा करूनही राहुल गांधींच्या रायबरेलीतील भारत जोडो न्याय यात्रेला हजेरी लावली नाही. न्याय यात्रा मंगळवारी अमेठी, रायबरेली मार्गे उन्नावकडे रवाना झाली.

लखनौमध्येही सपाचा एकही प्रतिनिधी राहुल यांच्या दौऱ्यात सहभागी झाला नाही. त्यामुळे यूपीमध्येही ‘इंडिया’ची आघाडी तुटल्याचे मानले जात होते. सपाने मंगळवारी संध्याकाळी 11 उमेदवारांची घोषणा केली होती. यामध्ये त्यांनी वाराणसीच्या जागेवरूनही आपला उमेदवार उभा केला होता, जी आधी काँग्रेसला दिली जाईल, असे सांगितले जात होते. मात्र, काँग्रेसने सहमती दिल्यानंतर यूपीमध्ये भारत आघाडी कायम राहील, असे चित्र दिसत आहे.

काँग्रेसला दिल्या 17 जागा

यामध्ये रायबरेली, अमेठी, कानपूर, फतेहपूर सिक्री, बांसगाव, सहारनपूर, प्रयागराज, महाराजगंज, वाराणसी, अमरोहा, झाशी, बुलंदशहर, गाझियाबाद, मथुरा, सीतापूर, बाराबंकी आणि देवरिया यांचा समावेश आहे. काँग्रेस बुलंदशहर किंवा मथुरेतून एक जागा परत करेल आणि त्या बदल्यात श्रावस्ती घेईल. अखिलेश यादव यांनी याला जवळपास सहमती दर्शवली आहे.