नवराष्ट्राच्या बातमीची दखल; शिवसैनिकांच्या दणक्यानंतर रामलीला गार्डनमध्ये आता रोज पोलिसांची गस्त
विजय काते, मीरा-भाईंदर : मीरा-भाईंदरमधील नवघर परिसरातील रामलीला गार्डनमध्ये वाढलेले गैरप्रकार, अमली पदार्थांचे सेवन करणाऱ्यांचा वावर आणि महिलांच्या सुरक्षेचा गंभीर प्रश्न ‘नवराष्ट्र’ने बातमीच्या माध्यमातून मांडल्यानंतर पोलिस प्रशासनाने त्याची दखल घेतली आहे. पोलिसांनी गार्डनची पाहणी केली असून, परिसरात नियमित पोलिस गस्त ठेवण्यासाठी कार्यवाही सुरू करण्यात आली आहे. त्यामुळे सकाळ-संध्याकाळ गार्डनमध्ये येणाऱ्या महिला आणि नागरिकांना दिलासा मिळण्याची अपेक्षा आहे.
रामलीला गार्डनमध्ये गेल्या काही दिवसांपासून नशेचे पदार्थ सेवन करणाऱ्या व्यक्तींचा तसेच गर्दुल्यांचा वावर वाढल्याची तक्रार स्थानिक महिलांकडून करण्यात येत होती. सकाळी आणि संध्याकाळी योग, व्यायाम तसेच फेरफटका मारण्यासाठी येणाऱ्या महिलांना त्यामुळे भीतीच्या वातावरणात वावरावे लागत होते. विशेषतः संध्याकाळच्या वेळी अपुऱ्या प्रकाशव्यवस्थेमुळे महिलांच्या सुरक्षेचा प्रश्न अधिक गंभीर बनला होता.
गार्डनमधील काही दिव्यांची तोडफोड करण्यात आल्याचे तसेच लोखंडी ग्रील कापून नेल्याचेही निदर्शनास आले आहे. याबाबत स्थानिक शिवसेना नगरसेविका वंदना पाटील यांनी महापालिका प्रशासन आणि पोलिस यंत्रणेकडे वारंवार पत्रव्यवहार करून उपाययोजना करण्याची मागणी केली होती.
दरम्यान, स्थानिक महिलांनी शिवसेना शहरप्रमुख सचिन मांजरेकर यांच्याकडेही आपल्या समस्या मांडल्या. त्यानंतर मांजरेकर यांनी पोलिस प्रशासनाशी संपर्क साधून गार्डनमधील सुरक्षेचा मुद्दा उपस्थित केला. पोलीस उपायुक्त राहुल चव्हाण यांनी प्रकरणाची दखल घेतल्यानंतर पोलिस कर्मचाऱ्यांनी प्रत्यक्ष गार्डनमध्ये जाऊन पाहणी केली. पोलिसांनी गार्डन परिसरात नियमित गस्त वाढवण्याची कार्यवाही सुरू केली असून, अमली पदार्थांचे सेवन करणाऱ्या तसेच महिलांना त्रास देणाऱ्या व्यक्तींवर कारवाई करण्याचा इशाराही दिला आहे. त्यामुळे गार्डनमधील गैरप्रकारांना आळा बसण्याची अपेक्षा व्यक्त केली जात आहे.
दुसरीकडे, वंदना पाटील यांच्या पुढाकाराने गार्डनमधील तुटलेल्या ग्रील आणि स्लायडिंगच्या दुरुस्तीचे कामही हाती घेण्यात आले आहे. पोलिसांची नियमित गस्त, दुरुस्तीची कामे आणि प्रशासनाकडून सुरक्षेच्या उपाययोजना प्रभावीपणे राबवल्या गेल्यास रामलीला गार्डन पुन्हा महिला, ज्येष्ठ नागरिक आणि लहान मुलांसाठी सुरक्षित ठिकाण बनेल, अशी अपेक्षा स्थानिकांकडून व्यक्त केली जात आहे.
.png "Videos"){kind=small}
