जुन्नर शहरातील दोन दुकानांना आग; अनेक वस्तू जळून खाक

सराई पेठेत भरवस्तीत असणाऱ्या ऋषी शूज हाऊस या दुकानास देखील या दरम्यान आग लागली. या आगीत विविध कंपन्यांचे बूट, चप्पल, सॅंडल तसेच फर्निचर जळून सुमारे दोन लाखांचे नुकसान झाल्याचे मालक ऋषिकेश शिंदे यांनी सांगितले.

Follow Us:

Follow Us:

जुन्नर : जुन्नर शहरातील भरवस्तीत असणाऱ्या खोत इलेक्ट्रॉनिक्स व ऋषी शूज हाऊस या दोन दुकानांचे सोमवारी (दि.१३) रात्री लागलेल्या आगीत मोठे नुकसान झाले. दोन्ही दुकाने बंद करून मालक घरी गेल्यानंतर आगीच्या घटना घडल्या.

बोडकेनगर येथील खोत इलेक्ट्रॉनिक्स या इलेक्ट्रिक दुचाकी व इलेक्ट्रॉनिक वस्तूंच्या दुकानाला रात्री आठच्या सुमारास आग लागली. यावेळी जुन्नर नगर पालिका व श्री विघ्नहर सहकारी साखर कारखान्याच्या अग्निशमन दलाचे बंब त्वरित घटनास्थळी आले. हे दुकान पत्राशेडमध्ये असल्याने आगीमुळे पत्रे गरम झाले. त्यामुळे दुकान उडघता आले नाही. परिणामी, दुकानातील आग मोठ्या प्रमाणावर पसरली. जेसीबीच्या साहाय्याने शेडचे पत्रे तोडण्यात आल्यानंतर आग आटोक्यात आणणे सोयीचे झाले.

इलेक्ट्रिक दुचाकीसह इतर साहित्य जळून खाक

आगीत दुकानातील जॉय कंपनीच्या सतरा इलेक्ट्रिक दुचाकी व एलईडी टीव्ही, रेफ्रिजरेटर, वॉशिंग मशीन, एसी युनिट व दुकानातील फर्निचर जळुन खाक झाले. आगीत दीड कोटीचे नुकसान झाल्याचा प्राथमिक अंदाज आहे. इलेक्ट्रिक गाडीच्या बॅटरीचा स्फोट झाल्याने ही आग लागली असण्याची शक्यता मालक हेमंत खोत यांनी व्यक्त केली.

यावेळी जुन्नर शहर राष्ट्रवादी काँग्रेसचे अध्यक्ष धनराज खोत, नगराध्यक्ष शाम पांडे, नगरसेवक सुनिल ढोबळे, नरेंद्र तांबोळी, अंबर परदेशी, सुमीत परदेशी, अभि आहेर, राहुल परदेशी, कन्हैयाशेठ खोत,संदेश बारवे, सचिन गिरी, प्रतिक मुर्तडक, गोटु परदेशी तसेच बोडकेनगर गणेशोत्सव मंडळाचे कार्यकर्त्यांनी आग आटोक्यात आणण्यासाठी मदत केली.

दुसऱ्या दुकानालाही आग

सराई पेठेत भरवस्तीत असणाऱ्या ऋषी शूज हाऊस या दुकानास देखील या दरम्यान आग लागली. या आगीत विविध कंपन्यांचे बूट, चप्पल, सॅंडल तसेच फर्निचर जळून सुमारे दोन लाखांचे नुकसान झाल्याचे मालक ऋषिकेश शिंदे यांनी सांगितले. आगीचे नेमके कारण समजू शकले नाही. मात्र, परिसरातील तरुणांनी आग लागल्याचे दिसताच शिंदे यांना कळविले. शटर उघडून आग आटोक्यात आणली.

Web Title: Fire at two shops in junnar city burn many things pune nrka

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com