कुळथाची पिठी कशी बनवायची? चवीला भारी, आरोग्यालाही पौष्टिक… वासाने स्वयंपाकघरात सुटेल घमघमाट; लगेच नोट करा रेसिपी

Kulthachi Pithi Recipe : तळकोकणातील भागांमध्ये सुप्रसिद्ध असणारी कुळथाची पिठी थंडीच्या वातावरणात आरोग्यासाठी फायदेशीर मानली जाते. गरमा गरम भातासोबत तर ती फारच उत्तम लागते आणि झटपट तयारही होते.

आपल्या महाराष्ट्रात कुळथाचे (हुलगे) खूप महत्त्व आहे. विशेषतः हिवाळ्यात कुळथाचे पदार्थ खाल्ले की शरीराला उष्णता मिळते, हाडे मजबूत होतात आणि पचनही चांगले राहते. कुळथाचे सूप, पिठलं, पिठी असे अनेक प्रकार घराघरात बनवले जातात. ग्रामीण भागात तर कुळथाच्या पिठीला फार मोठे स्थान आहे. ही भाजी साध्या जेवणातही छान लागते, तसेच भाकरीसोबत तिची जोडीदार चवदार होते.

महाराष्ट्राचा फेमस आणि पारंपरिक पदार्थ ज्वारीचे शेंगोळे कधी खाल्ले आहेत का? रसरशीत भाजी अन् चव चाखाल तर फॅन व्हाल

कुळथाची पिठी ही पौष्टिक, झटपट आणि पारंपरिक डिश आहे. हिच्या सेवनाने शरीराला आवश्यक प्रथिने (प्रोटीन), कॅल्शियम आणि लोह मिळते. हिवाळ्यात अंग गरम ठेवण्यासाठी, थंडीपासून बचाव करण्यासाठी कुळथाचे पदार्थ जरूर खाल्ले जातात. तुम्ही ही पिठी भात, भाकरी, चपाती कशासोबतही खाऊ शकता. साधी पण मनाला सुख देऊन जाणारी ही रेसिपी एकदा घरी बनवून पहाच. चला तर मग जाणून घेऊया यासाठी लागणारे साहित्य आणि कृती.

साहित्य

• १ कप कुळथाचे पीठ
• ३-४ लसूण पाकळ्या
• २-३ हिरव्या मिरच्या
• १ कांदा (बारीक चिरलेला)
• २ टेबलस्पून तेल
• १/२ टीस्पून मोहरी
• १/२ टीस्पून जिरे
• हिंग चिमूटभर
• हळद १/४ टीस्पून
• मीठ चवीनुसार
• पाणी आवश्यकतेनुसार
• कोथिंबीर सजावटीसाठी

कोलकाता फेमस पुचका आता घरीच बनवा; मसालेदार स्टफिंग, कुरकुरीत पुरी आणि चटकेदार पाण्याची चव; नाश्त्यासाठीची परफेक्ट रेसिपी

कृती

• कुळथाची पिठी बनवण्यासाठी सर्वप्रथम कढईत तेल गरम करून त्यात मोहरी, जिरे, हिंग आणि हळद टाका.
• त्यात बारीक चिरलेला कांदा, हिरवी मिरची व लसूण घालून सोनेरी होईपर्यंत परतून घ्या.
• आता त्यात पाणी घालून उकळी आणा.
• पाणी उकळल्यावर हळूहळू कुळथाचे पीठ घाला आणि गुठळ्या होऊ नयेत म्हणून सतत ढवळत राहा.
• मीठ घालून मध्यम आचेवर ८-१० मिनिटे शिजू द्या.
• पिठी घट्टसर होईल आणि छान सुगंध यायला लागेल.
• शेवटी वरून कोथिंबीर टाकून गॅस बंद करा.
• गरमागरम कुळथाची पिठी भाकरीसोबत किंवा तांदळाच्या भाताबरोबर खायला खूपच स्वादिष्ट लागते.
  हिवाळ्यात ही डिश शरीराला उष्णता देऊन रोगप्रतिकारशक्ती वाढवते.

FAQs (संबंधित प्रश्न)

कुळथाची पिठी म्हणजे काय?
कुळथाची पिठी ही कुळथाच्या पिठापासून बनवली जाणारी एक पातळ भाजी किंवा आमटी आहे. ही विशेषतः कोकण आणि तळकोकणातील भागांमध्ये प्रसिद्ध आहे.

पदार्थाची प्रमुख वैशिष्ट्ये काय?
हा पदार्थ फार झटपट तयार होतो ज्यामुळे जास्त वेळ वाया जात नाही. कुळथ हे एक पौष्टिक धान्य आहे आणि त्याची पिठी आरोग्यासाठी फायदेशीर मानली जाते.