Recipe : शाही, सुगंधित चवीचा ‘बगारा राईस’ तुम्ही कधी खाल्ला आहे का? एकदा घरी बनवूनच पहा

Bagara Rice Recipe : हैदराबादची खासियत असलेला हा बगारा राईस चीवीला साधा पण सुगंधित आणि कमी वेळात तयार होणारा पदार्थ आहे. नाॅनव्हेजसोबत खायला जो आणखीनच छान लागतो. याची शाही चव मनाला तृप्त करते.

• बगारा राईस हा हैदराबादचा पारंपारिक पदार्थ आहे.
• हा भात चवीला साधा पण सुगंधित लागतो.
• हा भात रश्शासोबत खाल्ला जातो. विशेषतः मटण किंवा चिकन करी.

भारतीय स्वयंपाकात भाताचे अनेक प्रकार आढळतात, आणि प्रत्येक प्रकाराची स्वतःची खास चव आणि सुगंध असतो. त्यापैकी बगारा राईस हा हैदराबादी खाद्यसंस्कृतीतील एक अत्यंत लोकप्रिय आणि सुगंधी भाताचा प्रकार आहे. हा भात साधा दिसत असला तरी त्यात वापरलेल्या मसाल्यांमुळे आणि फोडणीमुळे त्याची चव खूपच खास बनते. “बगारा” या शब्दाचा अर्थच फोडणी देणे असा होतो, त्यामुळे या भाताची खासियत म्हणजे त्याला दिलेली मसाल्यांची फोडणी.

Summer Special : सिजनल फळे शरीरासाठी चांगली; उन्हाळ्यात घरी बनवा रिफ्रेशिंग ‘कलिंगडाचा ज्यूस’, रेसिपी नोट करा

बगारा राईस सहसा मसालेदार करी, दाल किंवा ग्रेव्ही पदार्थांसोबत खाल्ला जातो. हलका, सुगंधी आणि चविष्ट असल्यामुळे तो रोजच्या जेवणासाठी तसेच खास प्रसंगीही उत्तम पर्याय ठरतो. विशेषतः शाही किंवा दावत शैलीच्या जेवणात याचा समावेश आवर्जून केला जातो. चला रेसिपी नोट करून घेऊयात.

साहित्य

• 1 कप बासमती तांदूळ
• 2 कप पाणी
• 2 टेबलस्पून तेल किंवा तूप
• 1 तमालपत्र
• 1 दालचिनीचा तुकडा
• 2-3 लवंगा
• 2 वेलची
• 1 टीस्पून जिरे
• 1/2 टीस्पून मोहरी
• 8-10 काजू (ऐच्छिक)
• 1 कांदा (पातळ चिरलेला)
• 2 हिरव्या मिरच्या (चिरलेल्या)
• मीठ चवीनुसार
• थोडी कोथिंबीर सजावटीसाठी

जेवणात तोंडी लावण्यासाठी बनवा चटकदार कच्च्या कांद्याची चटणी, लहान मुलांसह मोठेसुद्धा आवडीने खातील पदार्थ

कृती

• सर्वप्रथम तांदूळ स्वच्छ धुवून 20-30 मिनिटे भिजत ठेवा.
• कढईत किंवा कुकरमध्ये तेल किंवा तूप गरम करा.
• त्यात मोहरी, जिरे घालून फोडणी द्या.
• नंतर तमालपत्र, दालचिनी, लवंगा आणि वेलची घालून हलक्या आचेवर परता, जेणेकरून त्यांचा सुगंध बाहेर येईल.
• आता काजू घालून हलके सोनेरी होईपर्यंत परता.
• त्यात चिरलेला कांदा आणि हिरव्या मिरच्या घालून कांदा पारदर्शक होईपर्यंत शिजवा.
• भिजवलेले तांदूळ गाळून घ्या आणि कढईत घालून 1-2 मिनिटे हलक्या हाताने परता.
• आता त्यात पाणी आणि मीठ घालून चांगले मिसळा.
• झाकण ठेवून मध्यम आचेवर भात शिजू द्या. (कुकर वापरत असल्यास 1-2 शिट्ट्या घ्या.)
• भात शिजल्यावर हलक्या हाताने ढवळा आणि वरून कोथिंबीर घालून सजवा.
• गरमागरम बगारा राईस रायता, मिरची का सालन, दाल किंवा कोणत्याही ग्रेव्ही पदार्थासोबत सर्व्ह करा.
• अधिक सुगंधासाठी तूप वापरल्यास चव अधिक छान येते.
• बासमती तांदूळ वापरल्याने भात दाणेदार आणि हलका होतो.
• मसाले जास्त भाजू नयेत, अन्यथा चव कडू होऊ शकते.